Utok sa Dengvaxia
Inay angkunon ang responsibilidad sa pagpangompra sa P3.5 bilyones nga Dengvaxia alang sa libre nga pagpamakuna sa usa ka milyon ka bata sa mga dapit nga labing nahulga sa dengue, si kanhi Health Secretary Janette Garin nanulisok sa mosunod:
- Si kanhi Presidente Noynoy Aquino, di siya, ang nag-apura sa pagpamalit sa Dengvaxia;
- Si kanhi Health Secretary Enrique Ona, di siya, ang niduso nga sugdan ang libre nga pagpamakuna sa Hunyo 2015; ug
- Ang Philippine Children's Medical Center (PCMC), di ang Department of Health (DOH), ang namalit sa mga bakuna.
-o0o-
Apan abunda ang mga ebidensiya nga ang kalambigitan ni Garin sa kontrobersiya sa Dengvaxia mas lawom kay sa iyang giangkon:
- Si Garin, di si Aquino, ang nakigtagbo sa kadagkoan ug nilibot sa planta sa Sanofi Pasteur sa Paris, France niadtong Mayo 2015;
- Si Garin, di si Ona, ang niduso sa pagsugod sa pagpamakuna sa usa ka milyon ka bata niadtong Abril 2016; ug
- Si Garin, di ang PMPC, ang nipili sa 9 ngadto sa 14 anyos nga mga bata sa Metro Manila, Central Luzon ug Calabarzon ang unahon sa pagbakuna.
-o0o-
Di ganahan si Garin nga mahibaw-an ang iyang lakaw sa Paris. Kay nahitabo ang pakigtagbo sa kadagkoan ug paglibot sa planta sa Sanofi niadtong Mayo 14 ug 15, 2015:
- Unom ka buwan sa wa pa aprobahi sa Food and Drug Administration (FDA) sa Pilipinas ang Dengvaxia niadtong Disyembre 2015;
- Pito ka buwan sa wa pa tukia sa Philippine Formulary Executive Council sa DOH ang Dengaviaxia niadtong Enero 2016; ug
- Usa ka tuig ug usa ka buwan sa wa pa aprobahi sa World Health Organization (WHO) sa Dengvaxia niadtong Hunyo 2016.
-o0o-
Moangkon na ba si Garin sa hingpit nga responsibilidad sa pag-apura sa transaksiyon sa Dengvaxia kon moatubang na sa mga imbestigasyon sa Senado ug sa House of Representatives karong semanaha? O mopadayon ba sa pagpanghunaw? Ug manulisok sa uban?
Si Garin, nga kanhi kongresista sa Iloilo, suod sa pamunoan ni Presidente Rodrigo Duterte isip sinaligan nga consultant ni House Speaker Pantaleon Alvarez. Gamiton ba siya sa Malakanyang sa pagduot sa niaging pamunoan? O pasagdan nga magkapuliki og panagang sa mga implikasyon sa iyang mga binuhatan? [30] leo_lastimosa@abs-cbn.com
No comments:
Post a Comment