Tuesday, December 12, 2017

Arangkada for December 14, 2017

Leo Lastimosa has attached the following document:
Arangkada for December 14, 2017
Snapshot of the item below:

Bakuna ni Noynoy

        Sa iyang pag-atubang karong adlawa sa mga senador nga nagsusi sa kontrobersiya sa Dengvaxia, makaplagan ni kanhi Presidente Noynoy Aquino ang di malalis nga timaan sa hingpit nga lahugay sa politika sa nasud--gikan sa pagka labing taas nga opisyal sa republika usa ug tunga ka tuig ang nilabay, siya na karon ang sumsoman sa tanang pasangil sa kahiwian sa napulihan nga pamunoan.

        Di siya makapaabot sa mayoriya sa mga senador, nga di na niya alyado, nga mo-ulog-ulog ug mosipsip niya. Angay siya nga mangandam pagtubag sa kinalisdan nila nga mga pangutana.

                -o0o-

        Usa sa labing lisod nga pangutana: Nganong nangompra man sila og Dengvaxia sa tuig sa piniliay nga unom ka buwan na lang ang nahibilin sa iyang termino?

        Posible nga tubag ni Aquino: Ang kabangis sa dengue ug ang kadaghan sa mga biktima ini di makapaabot; mas lisod ipasabot kon gilangay pa ang paggamit sa labing una nga bakuna sa dengue kay umaabot na ang piniliay; ug namalit sila sa Dengvaxia nga wa magpaabot sa komplikasyon nga wa pa mahibaw-i sa Sanofi Pasteur ug bisan sa World Health Organization (WHO).

                -o0o-

        Laing lisod nga pangutana: Diin man kuhaa ang P3.5 bilyones nga wa man maapil ang pagpangompra sa Dengvaxia sa naaprobahan nga nasudnon nga budget alang sa 2016?

        Posible nga tubag: Makagasto ang gobyerno og labing menos P60 bilyones sa pag-atiman sa kaliboan ka pasyente sa dengue matag tuig; ug ang P3.5 bilyones gamay ra nga bahin sa pundo nga gigahin na nga daan alang sa nagkalainlain nga mga programa batok sa dengue.

                -o0o-

        Di mag-inusara si Aquino sa pag-atubang sa mga senador. Gawas ni kanhi Health Secretary Janette Garin, mahimo nga motambong uban niya sila si kanhi Budget Secretary Butch Abad ug kanhi Executive Secretary Paquito Ochoa.

        Kon mapamatud-an nga ang P3.5 bilyones, nga gikuha gikan sa panudlanan sa Philippine Children's Medical Center (PCMC), kabahin sa pundo sa mga programa batok sa dengue, mahimo nga makalusot sila. Apan kon gikuha gikan sa pundo sa lahi ug mas mapuslanon nga programa, mahimo nga maapiki sila. Ug mahimo nga dugang sukaranan sa pasangil nga wa silay kalainan sa kurakot nga pamunoan nga ilang gipulihan. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: