Saturday, December 16, 2017

Arangkada for December 18, 2017

Leo Lastimosa has attached the following document:
Arangkada for December 18, 2017
Snapshot of the item below:

Bagyo sa Pasko

        Mahimo nga mogawas ang bagyo nga si Urduja ug mosud ang nagsunod nga bagyo nga si Vinta sa Philippine Area of Responsibility (PAR) sa sama nga adlaw, karong Miyerkules, Disyembre 20. Mao ang banabana sa Philippine Atmospheric, Geophysical and Astronomical Services Administration (PAGASA).

        Apan tungod sa kahinay sa irog ni Urduja, mahimo nga maabtan siya hangtod karong Huwebes, Disyembre 21, sud sa PAR. Ug mahimo sab nga mas sayo nga makasud si Vinta ugma, Martes, Disyembre 19. Di hinuon sila magkaabot: Si Urduja tua na sa Palawan ug si Vinta gitakda nga mosud sa Surigao.

                -o0o-

        Samtang may kahigayonan nga mosimang si Vinta, nga modiretso sa ibabaw ug di motugpa sa bisan asa nga yuta sa Pilipinas, nga mao ang usa sa labing luwas nga gasa sa Pasko nga ato nga gipangaliya, mas daghan ang mga timaan nga nakita sa PAGASA nga mosubay si Vinta sa ruta ni Urduja.

        Nga kon simbako mao ang mahitabo, angay ta nga magmatngon sa pagsaulog sa Pasko. Human mosud sa silangan nga Mindanao ugma o sa Miyerkules, si Vinta mahimo nga moigo sa Sugbo ug Kabisay-an karong Sabado, Disyembre 23, duha ka adlaw sa di pa ang Pasko.

                -o0o-

        Gitumbok ni PAGASA Visayas Director Oscar Tabada ang tulo ka puwersa nga mao ang hinungdan sa dako nga kadaot nga nahatag sa hinay ra unta nga bagyo apan niungot nga si Urduja: Amihan (northeast monsoon), bugnaw nga hangin nga nihulip sa haw-ang sa init nga hangin sa bagyo (tail-end of a cold front) ug init nga hangin (subtropical ridge sa high pressure area).

Dihang nihinay ang bugnaw nga hangin, nisaka si Urduja. Apan dihang nibalik og duot ang cold front ug subtropical ridge, nipaubos na sab si Urduja.

        -o0o-

        Nabalaka si Tabada nga mao sab ni ang mahitabo ni Vinta. Nga tungod sa mas kusog ang hangin (ang pag-unos mahimo nga moabot og 60 ka kilometro matag oras) ug sa mas daghan ang uwan, mahimo nga makamugna og mas lapad nga kadaot.

        Apan bisan sa iyang kasuhito sa tanang weather forecast models ug sa taas nga kasinatian sa pagbantay sa mga bagyo, niangkon si Tabada nga labing makatabang ang paghangad sa kahitas-an. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: