Tuesday, December 19, 2017

Arangkada for December 21, 2017

Leo Lastimosa has attached the following document:
Arangkada for December 21, 2017
Snapshot of the item below:

Lahugay sa Navy

        Tungod sa iyang pagsunod sa awhag ni Presidente Rodrigo Duterte sa mga opisyal ug mga kawani sa gobyerno sa pagsupak ug pagbutyag sa anomaluso nga mga transaksiyon nga ilang gituohan nga makawaldas sa buhis sa katawhan bisan pa og gipasiugdahan sa ilang mga labaw, gitaktak si Philippine Navy Chief Vice Admiral Ronald Mercado.

        Gikuwestiyon ni Mercado ang paagi sa pagpamalit sa duha ka barko sa gubat nga balor og P16 bilyones. Inay susihon unsa ang mga sukaranan sa baruganan ni Mercado, gilaktod siya sa pagpalagpot ni Defense Secretary Delfin Lorenzana.

                -o0o-

        Si Presidente Duterte nga mao ra ang may gahom sa pagtudlo ug pagtaktak sa hepe sa Navy nanghunaw og bisan unsa nga kalambigitan sa pagpapahawa ni Mercado sa katungdanan. Apan si Lorenzana niinsistir nga may pagtugot gikan sa presidente ang pagkatangtang ni Mercado.

        Si Lorenzana niangkon nga di iya ang hukom sa pagpalagpot ni Mercado. Igo lang siya nga nipatuman sa rekomendasyon sa mga sakop sa Bids and Awards Committee (BAC) nga niisip ni Mercado nga mao ang bugtong nga responsable sa upat na ka buwan nga kalangay sa transaksiyon.

                -o0o-

        Nipasabot si Lorenzana nga nawad-an na siya og pagsalig ni Mercado. Nga iyang gihulagway nga di makiangayon nga nikuwestiyon sa pagpili sa Hyundai Heavy Industries og lain nga supplier sa mga armas nga ibutang sa duha ka barko sa gubat.

        Apan napakyas si Lorenzana sa pagpatin-aw sa iyang pagpakauwaw ni Mercado. Nga iyang gidalidali sa pagtangtang sa bisperas sa anibersaryo sa Armed Forces of the Philippines (AFP) ug gipulihan pa gyod og lain opisyal inay sa ikaduha nga labing taas nga opisyal sa Navy.

                -o0o-

        Sama sa uban nga tinudlo nga mga opisyal sa gobyerno, sa mga sakop sa media ug sa mga magbubuhis, mahimo nga nasayop diay si Mercado sa paghubad sa tinuod nga gipasabot ni Duterte.

        Makahimo lang diay ang nagpakabana nga mga kawani ug opisyal sa gobyerno sa pagbaraw sa ilang gidudahan nga binuang nga mga maniobra sa gobyerno kon ang ilang mga labaw nga maoy nagpasiugda o bisan nagpaluyo lang sa transaksiyon di ingon ana kasuod sa presidente (samtang nadutlan si kanhi DILG Secretary Mike Sueno, kublan diay si Lorenzana). [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: