Arangkada for December 8, 2017

Leo Lastimosa has attached the following document:

Arangkada for December 8, 2017

Snapshot of the item below:

Samokan nga kompaniya

        Kusganon nga gipanghimakak ni Barangay Kapital Rey Ompoc sa Mabolo sa Dakbayan sa Sugbo ang mga pasangil nga inay mobadlong sa kalapasan sa Vic Enterprises siya ang nangahente sa pagpamalit sa kompaniya sa ilang silingan nga mga luna. Atol sa Arangkada sa DYAB Abante Pa, Bisaya!, gisalikway sab ni Ompoc nga nangumbinser siya sa mga molupyo nga nahasol sa operasyon sa kompaniya sa pagpaubos sa presyo sa ilang luna.

        Gitataw ni Ompoc nga nagsige siya og awhag sa tag-iya nga si Vic Ong sa pagbadlong sa abusado niya nga mga drayber ug mga kustomer, ug paghipos sa abog ug lapok, nga nakahasol sa ilang mga silingan ug mga motorista ug mga pasahero.

                -o0o-

        Gihimakak sab ni Ompoc nga nakadawat siya og suholan ug uban nga mga pabor gikan sa Vic Enterprises. Giangkon hinuon niya nga daghan og natabang ang kompaniya sa mga panginahanglan sa barangay:

• Nihatag sila og 300 ka sako nga semento aron sa pagpalig-on sa koral sa Mabolo Elementary School; ug
• Nitabang sab sa pagpalit ug pagtaod og bag-o ug mas klaro nga sound system sa St. Joseph Patriach Parish sa Mabolo.

                -o0o-

        Masaligon si Ompoc nga makumbinser si Mayor Tommy Osmena nga natubag na sa kompaniya ang mga reklamo sa mga Sugbuanon nga nakaaghat sa City Hall sa paghulga sa pagkandado sa ilang tindahan ug mga bodega:

• Wa nay mga trak nga nagtabuk-tabok ug nagparada sa M. J. Cuenco Avenue (wa hinuon mahisguti ang reklamo sa taga Mandaue nga tua na sab magsamok ang ilang mga trak sa Tipolo ug Subangdaku); ug
• May mga kawani na nga nagsige og bisbis sa mga abog ug silhig sa mga lapok sa naglibot nga kadalanan.

                -o0o-

        Gipasabot sab ni Ompoc nga sayop ang pasangil ni Osmena nga gisigaan siya og mata sa usa sa mga anak ni Ong atol sa ilang tigom sa City Hall sa niaging buwan. Matod ni Ompoc may depekto sa mata ang kamanghoran ni Ong ug busa kinahanglan nga motutok sa iyang ka-istorya.

        Mapupos na sunod semana ang 10 ka adlaw nga lugway ni Osmena sa pagpasabot ni Ong ngano nga di tak-opan ang kompaniya. Atong atangan tinud-on ba ni Osmena ang iyang pasidaan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.