Arangkada for January 11, 2018

Leo Lastimosa has attached the following document:

Arangkada for January 11, 2018

Snapshot of the item below:

Pagdoble sa suholan

        Labing dako nga babag sa plano ni Presidente Rodrigo Duterte pagdoble sa suholan sa mga magtutudlo dili ang iyang politikanhon nga mga kaatbang. Kay mga politiko man sab sila og popular man ang pagpalambo sa suholan ug mga benepisyo sa mga magtutudlo--sa way paghisgot nga mga botante ang minilyon ka sakop sa ilang pamilya.

        Kon dili si Budget Secretary Benjamin Diokno. Kinsa karon pa lang nipadayag na og kabalaka kon makalahutay ba ang nasudnon nga panudlanan sa tunga sa trilyon ka pesos nga gikinahanglan sa pagdoble sa suholan sa kapin sa 600,000 ka magtutudlo sa mga eskuylahan nga publiko.

                -o0o-

        Si Diokno ang nibaraw sa dugay na nga saad ni Presidente Duterte sa pagdoble sa suholan sa mga polis ug mga sundawo. Siya ang isog nga nipasidaan ni Duterte nga mahisama siya ni kanhi Presidente Noynoy Aquino nga nipatuman sa Disbursement Acceleration Program (DAP) nga gibasura sa Korte Suprema nga ilegal ug unconstitutional.

        Nisugot na lang si Diokno sa dako nga uminto sa suholan sa mga polis, sundawo ug ubang unipormado nga mga kawani diha nga nihulga na si Duterte sa pag-resign. Matod sa presidente mauwaw siya nga magpabilin sa Malakanyang kon di mapatuman ang usa sa labing mahinungdanon niya nga saad.

                -o0o-

        Samtang wa mosalikway sa pag-doble sa suholan sa mga magtutudlo, si Diokno nipahibawo nga usa ka independente nga buhatan ang motuon sa plano sa presidente. Apan nibangil na nga daan nga ang labing tukma nga higayon sa pagtuki sa uminto sa suholan sa mga magtutudlo unya pa sa 2020, o duha ka tuig gikan karon.

        Kay nianang higayona, hingpit na nga mapatuman ang upat ka tuig nga anam-anam nga uminto sa suholan sa mga magtutudlo ug uban nga mga kawani sa gobyerno pinaagi sa salary standardization law ni kanhi Presidente Noynoy Aquino.

                -o0o-

        Nipasumbingay na nga daan si Diokno nga ang labing dako nga bahin sa nasudnon nga panudlanan gamiton alang sa P8 trilyones nga mga infrastruktura ug ubang proyekto sa administrasyon.

        Apan nakaagpas na si Presidente Duterte sa panagang ni Diokno. Nisugyot siya nga isukip ang dugang suholan sa mga magtutudlo sa ikaduha nga hugna sa Tax Reform for Acceleration and Inclusion (TRAIN). [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.