Arangkada for January 13, 2018

Leo Lastimosa has attached the following document:

Arangkada for January 13, 2018

Snapshot of the item below:

Hamok sa quorum

        Giangkon ni Speaker Pantaleon Alvarez sa House of Representatives nga usa sa labing dako niya nga nahimo mao ang pag-usab sa laksot nga tradisyon sa kakuwang og quorum sa ila nga mga sesyon. Gani ang iyang nasundan nga mga tagduma sa House nanghulga pagpadakop sa mga kongresista aron lang nga makaangkon sila og quorum.

Matod ni Alvarez siya ra ang speaker nga nakapatuman sa lagda pagtak-op sa mga ganghaan sa Batasang Pambansa Complex sa untop alas-4 sa hapon ug sa di na pagpasud sa mga kongresista nga mauwahi sa pag-abot.

                -o0o-

        Ang kaabunda sa quorum sa House mao ang gitumbok ni Alvarez nga hinungdan ngano nga nisutoy ang ila nga pagpasar sa mahinungdanon nga mga balaudnon. Nipadayag hinuon siya og kasubo nga nausik ang ila nga kakugihan kay kasagaran sa mga balaudnon natanggong pa hangtod karon sa Senado.

Ang labing mahinungdanon nga balaudnon nga hagbay ra nga napasar sa mga kongresista, apan gitumbok ni Alvarez nga dugay kaayo nga nadasonan sa mga senador, naglakip sa nasudnon nga budget sa 2018 ug sa kontrobersiyal nga Tax Reform for Acceleration and Inclusion (TRAIN) Law.

                -o0o-

        Apan ang kamapagarbuhon ni Alvarez sa quorum sa House mosumbalik niya kon ipatigbabaw sa mga mahistrado sa Korte Suprema ang petisyon sa mga kongresista sa Makabayan bloc nga nagkuwestiyon sa legalidad sa TRAIN.

        Hamukon si Alvarez kon mapamatud-an ang sukaranan sa petisyon: Pagtuki sa TRAIN sa lawom na nga gabii sa Disyembre 13 sa niagi nga tuig, 15 na lang ka kongresista ang nahibilin sa hawanan sa House kay ang mayoriya nanambong sa Christmas Party sa PDP-Laban nga gipangulohan nilang Alvarez ug Senate President Koko Pimentel.

                -o0o-

        Daghan ang modason sa paghulagway sa Makabayan bloc sa mayoriya sa mga kongresista nga way kalainan ni Emperador Nero nga gipasanginlan nga nagpatokar og lira samtang nagdilaab ang Roma.

Mas dako nga trahedya ang ilang gimugna samtang nagpabusdik sa kaon ug inom: Bugti sa taphaw nga ulog-ulog sa mas dako nga take home pay, magbaguod ang kinabag-an nga mga kabos sa mas taas nga presyo sa lana, pagburot sa bayranan sa kuryente, pagsaka sa plitehan sa mga sakyanan nga pamasahero ug pagmahal sa inadlaw nga mga panginahanglan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.