Arangkada for January 14, 2018

Leo Lastimosa has attached the following document:

Arangkada for January 14, 2018

Snapshot of the item below:

Pagsugo sa inuduro

        Salamat sa paspas nga lumba sa higante nga mga kompaniya sa pagdominar sa sunod nga ang-ang sa mga teknolohiya nga mopalambo sa katakos sa computers aron nga makaambas sa kinaadman sa tawo, sa di pa matapos karong tuiga makahimo ka na sa mosunod:

• Pagsugo sa inuduro sa pag-init sa lingkoranan taliwa sa katugnaw sa kabuntagon ug pag-abli sa tabon sa dayon nga gamit ug pagtabon ini human og gamit; ug
• Pagsugo sa washing machine sa pagbutang og tubig, pagsabon, pagwaswas ug pagpauga sa imong mga sapot sa way paghikap sa makina.

                -o0o-

        Nakauna sa teknolohiya sa pagpakigsulti sa personal computers ug smart phones ang Google (pinaagi sa pagsulti og "Google Assistant"), Apple (pinaagi ni "Siri") ug Microsoft (pinaagi sa "Cortana"). Apan ang nakauna sa paghimo og buwag nga kahimanan nga ikasulti (mapangutana ug motubag) mao ang Amazon pinaagi ni "Alexa."

        Naabtan ang mga karibal sa Amazon og duha ka tuig una nakahunahuna sa pagsunod ni "Alexa." Ang Google nagdalidali sa paghimo sa "Google Home" sa niagi nga tuig ug ang Apple gitakda nga mopagawas sa mas mahalon nga "Apple HomePod" karong tuiga.

                -o0o-

        Ang CES (International Consumer Electronics Show) sa Las Vegas sa niaging semana, gidominahan sa duha ka higante:

• Ang Google nihabol sa tibuok CES sa makapakugang nila nga pakig-alyansa sa uban nga mga kompaniya pagbutang sa "Google Assistant" sa 1,500 ka kahimanan apil na sa refrigerators ug mga sakyanan; apan
• Ang Amazon wa sab papiri kay tungod sa duha ka tuig nga bentaha nipasigarbo nga nakapahimutang na sa "Alexa" sa 4,000 ka kahimanan.

                -o0o-

        Kon mosulbong ang halin sa tanan nga kahimanan nga niggakos sa bag-o nga mga plataporma ni "Alexa" ug sa "Google Assistant," ang Amazon ug Google na ang magbahin sa gituohan nga 30 bilyones dolyares nga merkado sa Internet of Things (IoT).

        Apan napamatud-an sa Apple nga makadominar sa merkado bisan kon nauwahi na sila sa pagsud: Sama sa iPhone nga igo ra nga nagsunod sa mas una nga smart phones niadtong 2007 ug sa iPod nga dihang gipagawas niadtong 2001 nilupig sa mas nag-una nga portable media players, apil sa Walkman nga gipagawas sa Sony niadtong 1979. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.