Arangkada for January 18, 2018

Leo Lastimosa has attached the following document:

Arangkada for January 18, 2018

Snapshot of the item below:

Pagpakabana sa cha-cha

        Ang makabungog niya nga mayoriya sa Kongreso ug ang popularidad ni Presidente Rodrigo Duterte mao ang mopalusot sa federalismo ug uban nga kausaban sa 1987 Constitution nga iyang giduso.

        Mao ni ang naa sa libro sa Malakanyang: Ang charter change (cha-cha) seguro nga maaprobahan sa House of Representatives ug sa Senado ug ipatigbabaw sa katawhan pinaagi sa plebisito. Apan lahi ang aktuwal nga nahitabo: Nabaraw ang iyang plano pagpanudlo sa mga barangay kapitan ug natanggong ang pagbanhaw sa silot sa kamatayon.

                -o0o-

        Di maayo ang mga pasiuna nga mga timaan gikan sa mga kongresista ug mga senador:

• Samtang napasar dayon sa House ang resolusyon paghimo sa Kongreso nga constituent assembly (con-ass), tukion pa sa Senado ang resolusyon ni Senador Panfilo Lacson nga tukion nila ang cha-cha buwag sa House; ug
• Niinsistir ang mga kongresista nga mag-ipon ang mga senador ug mga kongresista atol sa botasyon sa cha-cha apan ang mga senador nilantugi nga, sama sa pag-usab sa ngan sa mga eskuylahan ug kadalanan ug uban nga kasarangan nga mga balaudnon, kinahanglan nga buwag ang botasyon sa Senado ug sa House.

                -o0o-

        Nagkasungi sab ang kalendaryo sa cha-cha sa tulo ka dagko nga haligi sa administrasyon:

• Si House Speaker Pantaleon Alvarez nitakda sa plebisito sa cha-cha dungan sa piniliay sa barangay ug Sangguniang Kabataan sa Mayo 14 karong tuiga;
• Si Presidente Duterte nipahibawo nga liwas na sa Semana Santa masumiter sa iyang gitukod nga Constitutional Commission (Con-Com) ang isugyot nga kausaban sa konstitusyon ngadto sa Kongreso; ug
• Si Senate Presidente Aquilino Pimentel III nagplano nga ang plebisito sa cha-cha idungan sa piniliay sa 2019.

                -o0o-

        Madayon man o dili, paspas man o langay, malaktod o masangit sa Korte Suprema, di angay nga mangiyugpos lang ang katawhan sa cha-cha. Angay nga paminawon si kanhi Senate Presidente Aquilino Pimentel Jr., amahan sa Local Government Code ug nangampanya sa federalismo, sa iyang pahimangno sa katawhan: "Ayaw pagpaabot nga di na mo katingog. Tingog na mo karon."

        Magmapuslanon ang atong pagtingog pabor o supak sa cha-cha kon may igo ta nga sukaranan. Busa kinahanglan nato nga tun-an ang gisugyot nga kausaban. Sa di pa malingla sa mga slogan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.