Arangkada for January 21, 2018

Leo Lastimosa has attached the following document:

Arangkada for January 21, 2018

Snapshot of the item below:

Terorismo sa Sinulog

        Pipila ka adlaw pa lang ang nilabay, nagsige og pasidaan ang PAGASA ug nabalaka ang kinabag-an sa mga Sugbuanon sa kahigayonan nga ang panag-abot sa low pressure area (LPA) ug ubang sistema sa panahon mosangpot sa kusog nga bunok sa uwan, lapad nga pagbaha ug pagdahili sa yuta ug pagdagko sa bawod nga mahimong mokanselar sa fluvial procession.

        Apan wa mahinayon ang labing makahahadlok nga mga pasidaan. Bisan ang kusog nga bunok sa uwan nga nakahasol sa novena masses ug sa Walk with Mary nabadlong sa dayon nga sugod sa Traslacion niadtong Biyernes.

                -o0o-

        Gipasidunggan nila ni Cebu Archbishop Jose Palma ug sa kaparian sa Basilica Minore del Sto. Nino ang balaanon nga bata sa kamaayo sa kahimtang sa panahon. Apil na sa prosesyon sa kadagatan gahapon nga gipangagpas sa PAGASA nga mahimo nga uwanon.

        Sa daghan na uyamot nga katuigan wa magkuwang si Sr. Sto. Nino sa paghimo nga mas hapsay sa pagsaulog sa iyang piyesta. Mao nga mas makapasubo nga ang kapolisan, nga mao unta ang gitahasan pagpanalipod sa mga deboto ug mga molupyo gikan sa mga hulga mao na man hinuon ang niapiki sa katawhan.

                -o0o-

        Sa ilang mga tigom sa niaging semana, nipasalig ang mga tigpasiugda sa Piyesta Senyor nga way seryuso nga hulga batok sa Sugbo. Gani, si kanhi Police Regional Office Central Visayas Director Jose Mario Espino nipasalig nga magpabilin nga normal ang serbisyo sa mobile phones.

        Apan human sa pasalig ni Espino, nipasidaan ang mga tigpasiugda nga mahimong mausab pa ang desisyon. Karong narelibohan na si Espino gipawong gyod nila ang  cell sites.

                -o0o-

        Apan kinsa man ang mangahas pagsukwahi sa kapolisan? Atubangan sa risgo nga pasanginlang adik o kriminal? Sama nga ang mga nikuwestiyon paglugway sa martial law sa Mindanao gipasanginlan nga terorista o komunista.

        Ato na lang paminawon ang tambag sa karaang mga politiko: Kon kusog ang hangin, hupo. Antuson nga mawad-an sa linya sa komunikasyon sa labing dinalian ug mahinungdanon nga mga panginahanglan. Nga mahimong mosangpot sa mas dakong kadaot ug kayagaw. Nga, kon nakalimot sila, mao ang usa sa labing bug-at nga silot nga ikapahamtang sa tinuod nga mga terorista. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.