Sunday, January 21, 2018

Arangkada for January 23, 2018

Leo Lastimosa has attached the following document:
Arangkada for January 23, 2018
Snapshot of the item below:

Mas bangis nga terorismo

        Sa ilang pagsaulog sa Piyesta Senyor niadtong Dominggo, ang mga Sugbuanon nahiagom sa terorismo nga mas bangis, mas grabe ug mas dako ang kadaot kay sa aktuwal nga pag-ulbo sa bomba. Mao ni makapakugang nga pasangil sa dakong opisyal sa gobyerno nga nahilambigit sa pagduma sa Sinulog Grand Parade.

        Supak siya sa pagpawong sa cell sites sa Dakbayan sa Sugbo ug kasilinganan nga mga dapit aron pagpugong sa bisan unsa nga plano sa mga terorista sa pagpaulbo og bomba ginamit ang mobile phones. Apan way gahom pagbaraw sa rekomendasyon sa kapolisan.

                -o0o-

        Gidasonan ang iyang baruganan sa inila nga negosyante sa Sugbo. Kinsa nipasabot nga kon kamao ang mga terorista nga mopaulbo ang bomba ginamit ang mobile phones, labaw pa sila nga kamao nga mohimo og bomba nga mapaulbo bisan pawong ang cell sites.

        Nipasabot ang negosyante nga mas epektibo gihapon sa pagbaraw sa bisan unsa nga plano sa pagpamomba ang pagpakatap sa mas daghan nga mga polis, paghingusog ug pagpalapad sa pagpaniid sa palibot ug pagdasig sa katawhan sa pagtaho gilayon kon may bag-o ug kadudahan nga mga tawo o mga butang nga ilang makit-an.

                -o0o-

        Sa iyang bahin, si Atty. Thads Bentulan, kanhi maglilindog sa Business World, nitataw nga di makiangayon nga isakripisyo ang batakan nga mga panginahanglan sa komunikasyon sa upat ka milyon ka Sugbuanon tungod lang sa hulga nga giangkon sa mga tigpasiugda nga wa diha.

        Nabalaka siya nga makamugna ni sa mas dako nga kaguliyang kon may linog ug ubang katalagman ug emerhensiya sa mga pasyente. Sama nga nisangpot sa pagkahanaw sa mga panginabuhi ug pagka-inutil sa mga transaksiyon sa credit cards sa shopping malls niadtong Dominggo.

                -o0o-

        Sa di pa paundayonan sa kapolisan ang katapol paghimo sa ilang trabaho ug pagkara-kara na lang og pawong sa cell sites sa umaabot nga dagkong kalihokan, maayo nga ilang paminawo ug pamalandongan ang sulti sa Federal Communications Commission (FCC) sa Estados Unidos: "Jamming technology generally does not discriminate between desirable and undesirable communications. Use of cell phone jammers poses an unacceptable risk to public safety."

Mas lapad sa signal jammers nga gidili sa FCC ang pagpawong sa cell sites. Ug mas binuang ug mas makadaot. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: