Monday, January 1, 2018

Arangkada for January 3, 2017

Leo Lastimosa has attached the following document:
Arangkada for January 3, 2017
Snapshot of the item below:

Katulin ni Agaton

        Kon unsa siya kalangay sa pagsud sa nasud, nga ang pagpaabot nga nagsugod pa sa niagi nga tuig naabtan sa bag-o na nga tuig, nga inay mahimo nga kataposan nga bagyo sa 2017 ug nganlan og Wilma nahimo na hinuon nga una nga bagyo sa 2018 ug ginganlan og Agaton, mao sab siya kapaspas nga nibiya.

        Naabtan siya og upat ka adlaw sa pagsud sa Philippine Area of Responsibility (PAR). Apan nagkinahanglan lang og tulo ka oras sa paggawas sa Mindanao ug upat ka oras sa paggawas sa Kabisay-an.

                -o0o-

        Human sa pila ka adlaw nga pagdanga-danga, sa pagka-umol ug pagkabungkag ug pagka-umol na sab isip low pressure area (LPA) gawas sa PAR, nikalit lang siya og abtik: Nahimo nga bagyo nga Agaton sa alas-5 sa hapon niadtong Lunes; nitugpa sa yuta gahapon sa kadlawon; ug mobiya na sa PAR agi sa Palawan karong gabii.

        Gisubay ni PAGASA Visayas Director Oscar Tabada ang pito ka takna nga panaw ni Agaton: Nitugpa sa Siargao sa ala-una; nisaka sa Tagbilaran sa alas-4; nipatungod sa habagatang Sugbo sa alas-5; nagpaduol sa Dumaguete sa alas-7; ug niabot sa Western Visayas sa alas-8.

                -o0o-

        Nipasabot si Tabada nga ang paglugak sa hangin nga Amihan mao ang angay nga pasalamatan sa tulin nga pagkagiw ni Agaton:

  • Nisaka sa Kabisay-an si Agaton nga gitakda nga moungot sa Mindanao ug mosubay sa ruta sa bagyo nga si Vinta kay wa nay Amihan nga niduot niya paubos; ug
  • Ang kahuyang sa Amihan mao ang naka-paspas sa pag-irog ni Agaton (25 ka kilometro matag oras).

                -o0o-

        Kon sama pa kakusog sa puwersa sa Amihan sa pagpanghasi sa bagyo nga si Urduja sa niagi nga buwan, mo-ungot sab unta si Agaton ug makabuylo sa paghuwad sa kinakusgan ug kinadaghanan niya nga uwan sud sa pila ka adlaw sa tanan nga dapit nga iyang maagian.

        Pila lang ka gutlo human gipahibawo ni Tabada ang pagbiya ni Agaton sa Sugbo ug Central Visayas, nipakita dayon ang bidlisiw sa adlaw. Alas-9 gahapon sa buntag, walo ka oras human sa landfall ni Agaton, gilibkas na sa PAGASA ang tanan nga pasidaan sa kusog nga uwan dinhi sa ato. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: