Asoy sa usa ka irihis
Lain ang among tuyo sa Carcar City niadtong uwanon nga sayong buntag sa Dominggo. Nihapit mi sa bay sa usa ka inilang pari nga nangimbitar og mamahaw. Apan di diay pamahaw lang ang iyang giandam.
Gida mi niya sa atbang sa ilang panimay diin nagtigom ang gatosan ka molupyo sa nagkalainlain nga mga dakbayan ug kalungsoran sa Sugbo ug kasilinganan nga mga isla. Nangaliya sila ug naminaw sa mga pagtulon-an ug kalihokan sa Archbishop Teofilo Camomot Divine Mercy Communities samtang nagpaabot sa ilang turno nga matambalan.
-o0o-
Sentro sa kalihokan ang kanhi magtutudlo sa agrikultura sa Dakbayan sa Toledo sa kasadpang Sugbo. Nga usa niana ka adlaw unom ka tuig na ang nilabay una nga nakamatikod sa talagsaon niya nga gasa. Nanginit pag-ayo ang iyang mga tudlo nga, dihang iya lang untang gipasagdan, nidan-ag og kahayag nga asul.
Dihang gihikap niya ang nalawos nga tanom, nituyhakaw kini. Dihang giagak niya ang nakuyapan niya nga tinun-an, nitimbakuwas ug naulian sa panimuot. Nikatap sa eskuylahan ug kasilinganan nga mga barangay ang iyang katakos ug nagsugod sila sa pagpatambal niya.
-o0o-
Gipakita mi sa video sa iyang pagpanambal sa kaliboan ka pasyente. May bata nga amang nga nakasulti, hamtong nga bakol nga nakalakaw ug ubang pasyente nga nangangkon nga naayo sa leukemia, sakit sa kasingkasing ug ubang balatian.
Ang pari nga nangimbitar namo, nga nangu sa daghang kawsa apil nang pag-usab sa pipila ka lagda sa Simbahang Katoliko, wa dayon motuo. Gisukitsukit una ang pito ka pasyente uban ang mga dokumento sa ilang mga doktor sa ilang pagkasakit ug pagkaayo. Karon siya na ang nitabang sa magtutudlo aron matambalan ang mas daghang masakiton.
-o0o-
Utro sab ko nga kuwang sa pagtuo. Human sa among pamahaw niadtong Dominggo, gikahinabi nako ang magtutudlo sa labing unang higayon. Nakugang dihang gipahibawo ko niya sa akong balatian ug, sa way daghang salida, giayo.
Gihangyo ko nila sa di pagsibya sa ilang ngan ug paghatag og dugang kasayuran sa ilang kalihokan. Apan di mahimo nga iluom lang nako ang talagsaon nga kasinatian. Maong nangahas ko pagsuwat ning mubo nakong asoy. Pasayloa nga mangayo pa ko sa ilang pagtugot una makahatag og dugang kasayuran. [30] leo_lastimosa@abs-cbn.com
No comments:
Post a Comment