Sunday, January 7, 2018

Arangkada for January 9, 2018

Leo Lastimosa has attached the following document:
Arangkada for January 9, 2018
Snapshot of the item below:

Tinuig nga bunal

        Niinsistir ang mga kompaniya sa lana nga nahurot na ang ila nga mga kinompra sa niagi nga tuig, 2017, kanus-a wa pa mapatuman ang exicse tax sa krudo, gasolina, auto-LPG, LPG, kerosene ug uban nga mga produkto, ug busa angay nga tugotan na sila nga makapatuman sa mas dako nga uminto sa presyo sa lana karong semanaha.

        Ubos sa kontrobersiyal nga oil deregulation law, di kinahanglan nga mananghid ang mga kompaniya sa lana sa gobyerno sa di pa makapa-uminto sa ilang presyo. Apan klaro nga nabalaka sa pasidaan sa Department of Energy (DOE) batok sa profiteering.

                -o0o-

        Busa mahimo nga matuman ang gusto sa DOE ug sa Department of Finance (DOF), kansang kadagkoan mao ang tinuod nga utok sa Tax Reform for Acceleration and Inclusion (TRAIN) nga gipirmahan ni Presidente Rodrigo Duterte, nga unya na sa sunod semana mapatuman ang P3 matag litro nga uminto sa mga produkto sa lana.

        Apan mahimo sab nga ang DOE ug DOF, sama sa naandan moduko sa bisan unsa nga gusto sa higante nga mga kompaniya sa lana ug dakdakan ang mga konsumidor sa gisaad nga labing maayo nga pinaskohan.

                -o0o-

        Hagbay ra ang gobyerno nga nagpa-upoy-upoy sa gikaintapan nga cartel sa lana. Di lang ang pamunoan ni Duterte kon dili apil na ang gipulihan niya nga mga tagduma sa Malakanyang.

        Di na ta kinahanglan nga mokubkob og lawom aron pagpangita og mga ebidensiya. Tan-awa na lang ang nahitabo karong buntag, nga mao sab ang nahitabo sa nangagi nga daghan na uyamot nga mga Martes, nagkadungan sila pagpahamtang og mga uminto nga managsama hangtod sa kataposan nga usa ka dako.

                -o0o-

        Ma-karong semanaha o sunod semana man, mahinayon gyod ang makalilisang nga usbaw sa presyo sa mga produkto sa lana. Ma-karong buwana man o tulo pa ka buwan gikan karon, mosaka gyod ang plitehan sa mga sakyanan ug presyo sa inadlaw nga mga panginahanglan.

        Ang nag-ung-ong nga kalbaryo di mabakwi pagka sunod adlaw nga komedya lang. Kay balaod ni nga nagmando sa tinuig nga bunal sa dagko nga mga buhis sa mosunod nga tulo ka tuig. Ang bugtong alibyo sa mga magbubuhis mao nga maanad ra ta mas taas nga mga bayranan. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: