Arangkada for March 1, 2018

Leo Lastimosa has attached the following document:

Arangkada for March 1, 2018

Snapshot of the item below:

Gasto sa federalismo

        Way makakuwestiyon sa determinasyon ni kanhi Senate President Nene Pimentel paghatag og dugang gahom ug katigayonan sa mga lalawigan, dakbayan, kalungsoran ug kabaranggayan pinaagi sa pag-iban sa nagbuntaog nga gahom ug katigayonan sa nasudnong kagamhanan.

Tungod tingali kay taga Mindanao ug nahimo sab nga lokal nga opisyal, siya ang labing nahibawo nga mas dali nga matagbaw ang labing batakang panginahanglan sa katawhan pinaagi sa lokal nga kagamhanan, inay sa nasudnong kadagkoan nga tua ra magtungkawo sa kaulohan. Apan isip politiko nakasabot si Pimentel nganong di boluntaryong motahan sa nasudnong gobyerno.

        -o0o-

        Inay mokuyog sa pipila niya ka kauban nga niawhag na og rebolusyon, si Pimentel nisugyot sa Local Government Code (LGC). Nga malampuson niyang napangamahanan hangtod nga nahimong balaod niadtong 1991 ug nakahatag na sa local government units (LGUs) og mas dakong bahin sa nasudnong katigayonan.

        Dakong pasidungog kamaayong pagkapanday nilang Pimentel ug ubang mga sakop sa Kongreso sa LGC nga may nitumaw nga mga sugyot nga inay usbon ang sistema sa gobyerno ngadto sa federal mas padak-an lang ang bahin sa LGUs nga inay 40% lang karon himuon nang 60% o 70% gyod.

                -o0o-

        Way nahibung nganong si Pimentel ang usa sa labing unang gitudlo ni Presidente Rodrigo Duterte sa consultative committee (Con-Com) nga iyang gitahasan sa pagsubli sa mga probisyon sa 1987 Constitution nga angayng usbon. Lahi sa ubang niawhag og federalismo nga wa kahibawo sa ilang gipanulti, si Pimentel nasuhito unsaon pag-usab ang sistema sa gobyerno.

        Maong siya ang labing larino nga nipasabot sa ilang pagduso sa federal-presidential system nga may duha ka bay balaoranan nga maglakip sa 87 ka senador ug 12 ka federal states.

                -o0o-

        Apan ang pasiunang mga sugyot nilang Pimentel ug ubang mga sakop sa Con-Com nakasugat na dayon og mga pagsaway. Labi na sa pagtukod sa federal states nga, kay dugang mang sapaw sa burukrasya (magtukod og bag-ong katungdanan sa 12 ka gobernador, 12 ka bise gobernador ug gatosan ka sakop sa state legislature), nagkahulogan og dugang gasto.

        Di kaha mahurot sa dugang suholan ang bisan unang madugang sa bahin sa LGUs? Ug kay mao ra man gihapon ang nasudnong panudlanan, di kaha sila matental pagpahamtang og dugang buhis sa katawhan? [30] leo_lastimosa@abs-cbn.com 

Google Docs: Create and edit documents online. Google LLC, 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for February 21, 2018

Leo Lastimosa has attached the following document:

Arangkada for February 21, 2018

Snapshot of the item below:

Sugyot nga wa mapatuman

        Samtang nagsugod nang imbestigasyon sa Kongreso sa pagtibugsok sa imbentaryo sa bugas humay sa National Food Authority (NFA), apil na sa pasangil nga wa mamalit ang NFA gikan sa mga mag-uuma kay nag-apas sa dagkong komisyon nga makuha sa ilang kadagkoan sa importasyon sa bugas humay gikan sa ubang kanasuran, niluwat og bag-ong kasayuran ang Philippine Rice Research Institute (PhilRice):

• Sobra ang suplay sa bugas sa tibuok nasud sa unang tulo ka buwan ning tuiga; ug
• Di mabasol ang NFA sa ilang kapakyas pagpamalit og tipasi gikan sa mga mag-uuma.

                -o0o-

        Matod sa PhilRice tungod sa abundang ani sa lokal nga mga mag-uuma sa niaging tuig ug sa nahibilin sa imported rice sa 2017, may sobra pang tulo ka milyon ka tonelada nga bugas humay nga igo hangtod sa Marso ning tuiga.

        Kanus-a gitakdang makadunggo nang 325,000 ka tonelada nga imported rice nga giaprobahan sa NFA Council dayong tapos sa niaging tuig ug makabuylo nang ani sa mga basakan sa Kabisay-an, Mindanao ug Luzon. Di ni maayong balita alang sa mga mag-uuma kansang ani mahimong langawon kay madungan sa importasyon.

                -o0o-

        Nipasabot ang PhilRice nga napakyas ang NFA pagpamalit og mas daghang lokal nga bugas humay atol sa ani sa niaging tuig kay mas taas ang presyo nga gitanyag sa pribadong mga negosyante: Ang P17 matag kilo nga support price sa NFA para sa uga na nga tipasi; apan ang P17 sa mga negosyante alang sa mao pay pag-ani nga mga tipasi.

        Inay mogasto sa pagpauga ug pagpangita og pundohanan sa tipasi aron makabaligya sa NFA, gipili sa mga mag-uuma ang pagdiretso og tugyan sa lapyo pa nilang mga tipasi ngadto sa mga negosyante.

                -o0o-

        Niangkon ang PhilRice nga mas barato gihapon ang imported rice kay sa lokal nga bugas humay. Sa ato pa, mas makaayo alang sa mga konsumidor, kay matino man ang baratong presyo sa kamerkadohan, kon magpadayon ang gobyerno sa pagdasig sa importasyon.

        Apan di sab mahimong pasagdan ang mga mag-uuma. Rekomendasyon sa PHilRice: Palambuon ang produksiyon ug ibanan ang gasto sa mga mag-uuma. Samang sugyot nga nadawat sa nangagi nga mga pamunoan. Samang sugyot nga padayong gipasagdan nga wa mapatuman. [30] leo_lastimosa@abs-cbn.com 

Google Docs: Create and edit documents online. Google LLC, 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for February 13, 2018

Way kapuslanan ang NFA

Nakumbinser gyod sa National Food Authority (NFA) si Presidente Rodrigo Duterte nga gikinahanglan ang dinalian nga importasyon sa bugas humay. Bisan nagduda ang usa sa labing sinaligan sa presidente, si Cabinet Secretary Jun Evasco, ang Bol-anon nga tsirman sa National Food Authority Council (NFAC), nga pangilad ang ilang pangangkon sa pagtidlom sa ilang imbentaryo.

Nangangkon ang NFA nga nisugot na si Presidente Duterte sa pagpangompra og 250,000 ka tonelada nga bugas humay gikan sa ubang kanasuran. Bisan sa nitumaw nga mga ebidensiya nga wa magtuman ang NFA sa ilang trabaho.

-o0o-

Gisukwahi sa pasiuna nga pakisusi sa Senate Committee on Agriculture and Food nga gipangulohan ni Senador Cynthia Villar ang pangangkon sa NFA nga wa silang kapalit og lokal nga bugas humay gikan sa mga mag-uuma bisan sa kaabunda sa ani sa niaging tuig kay mas mahal ang palit sa pribadong mga negosyante.

Nakaplagan sa mga senador nga daghang mag-uuma sa Luzon ug Mindanao nga napugos intawon sa pagbaligya sa ilang tipasi sa presyo nga ubos kaayo sa P17 matag kilo nga support price kay way taga NFA nga nitabang nila.

-o0o-

Diin ra man diay nagsuruysuroy ang taga NFA sa pagpangita og mga tipasi nga ilang makompra pagpalambo sa ilang imbentaryo sa NFA rice aron nga makapadayon pagpabaha sa kamerkadohan og baratong alternatibo ug labaw sa tanan aron nga may matunol dayon nga hinabang alang sa mga biktima sa katalagman?

Ang kataphaw sa pagtuman sa batakan nilang tahas pagpanalipod sa mga konsumidor ug mga mag-uuma makadason sa pagduda nga ang kadagkoan sa NFA mas interesado sa gipasangil nga dagkong komisyon sa mga importasyon sa bugas humay.

-o0o-

Ang gitugotan ni Presidente Duterte nga importasyon sa 250,000 ka tonelada mapuno sa 325,000 ka tonelada nga importasyon sa pribadong sektor nga gitugotan sa NFAC. Ang unang importasyon modunggo karong buwana samtang ang ikaduha moabot sa pagsugod sa ani karong tuiga.

Wa gyod tay dag-anan sa NFA. Wa mapanalipdi ang mga konsumidor gikan sa pagpaginansiya sa commercial rice traders sa pagkawagtang sa NFA rice. Samtang way molingi sa ani sa mga mag-uuma inig abot sa 575,000 ka toneladas nga imported nga bugas. [30] leo_lastimosa@abs-cbn.com

Arangkada for February 12, 2018

Leo Lastimosa has attached the following document:

Arangkada for February 12, 2018

Snapshot of the item below:

Pagkabungkag sa cartel

        Ipahibawo sa higanteng mga kompaniya sa lana karong adlawa ang laslas sa presyo sa ilang mga produkto. Nga maoy labing una karong tuiga. Ug mapahimuslan sa mga motorista sugod ugma sa buntag human sa unom ka sunudsunod nga semana sa makalilisang nga uminto.

        Di hinuon ta angayng mopugong sa ginhawa. Pagmatuod nga gawasnon ang ilang kumpetinsiya, managsama hangtod sa kataposang usa ka dako ang laslas nga ilang ipatuman. Pasiunang banabana sa mga eksperto sa industriya: P1.35-P1.45 matag litro sa krudo; P1.10-P1.20 matag litro sa gasolina; ug P0.80-P0.90 matag litro sa kerosene.

                -o0o-

        Unsa may mga hinungdan sa pagkabugto sa labing dagkong uminto sa presyo sa lana dayong tapos sa 2017 ug sa unang unom ka semana karong tuiga? Ang pagtidlom sa presyo sa lana nga nagsugod niadtong Pebrero 2 ug nagpadayon sa tibuok semana sa niaging semana nanukad sa mosunod:

• Una, ang paspas ngapagsulbong sa produksiyon sa lana sa Estados Unidos, nga di apil sa kauyonan sa OPEC ug non-OPEC countries paglaslas sa kalibotanong produksiyon; ug
• Ikaduha, ang paglig-on sa Amerikanhong dolyar nga maoy gibasehan sa presyo sa lana.

                -o0o-

        Way mahimo ang OPEC nga gipangulohan sa Saudi Arabia ug non-OPEC countries nga gipangulohan sa Russia sa pagbaraw sa shale oil producers sa Estados Unidos sa pagpabaha sa ilang suplay sa merkado sa kalibotan. Kay mas hawod pa man ang mga Amerikanhon nila busa di nila kagawongan ni mahudlat.

        Bugtong nilang mahimo ang pagtagbo pag-usab sa mosunod nga mga semana aron sa pagsabot sa pagpatuman og mas dako nga laslas sa ilang produksiyon aron nga mosaka og balik ang presyo sa lana.

                -o0o-

        Tungod sa bag-ong teknolohiya sa Estados Unidos sa mas paspas nga produksiyon sa lana, di na hingpit ang pagkontrolar sa OPEC sa kalibotanong merkado sa lana. Kinahanglan nang makig-alyansa sa Russia ug ubang oil producing countries nga di sakop sa OPEC sa pagmaniobra sa pag-iban sa ilang produksiyon aron motidlom ang suplay ug moburot ang presyo.

        Apan ang kalamposan sa ilang kauyonan mao say makadasig sa Estados Unidos sa pagbuylo sa ilang produksiyon nga mopabaha sa suplay ug busa makapabira paubos sa presyo sa kalibotanong merkado. Hinaot nga di magkakonsabo, hinunoa magpadayon sa pagpuhalay. [30] leo_lastimosa@abs-cbn.com 

Google Docs: Create and edit documents online. Google LLC, 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for February 10, 2018

Leo Lastimosa has attached the following document:

Arangkada for February 10, 2018

Snapshot of the item below:

Sabotahe sa bugas

        Gawas nga gipasanginlan nga namakak sa tinuoray nga suplay sa bugas humay sa ilang mga bodega, gidudahan na sab karon ang kadagkoan sa National Food Authority (NFA) nga nisabotahe sa ilang kaugalingong imbentaryo. Nitumaw ang mga timaan nga nagdumili ang NFA sa pagpamalit sa lokal nga bugas humay nga bunga sa abundang ani sa niaging tuig nga nisangpot sa pagtidlom sa ilang pundong bugas.

        Ang katuyoan? Aron mapugos ang pamunoan ni Presidente Rodrigo Duterte sa pagtugot sa dinalian nga pagpangompra og dugang bugas humay gikan sa ubang kanasuran.

                -o0o-

        Nahaunang lusot sa NFA sa pagtibugsok sa ilang imbentaryo mao ang giingon nilang kanihit sa ani sa mga mag-uuma sa nasud sa niaging tuig. Apan niinsistir si Agriculture Secretary Manny Piñol nga ang ani sa niaging tuig mao ang labing taas sa nangaging katuigan.

        Maong nidalidali pag-usab ang NFA sa ilang katin-awan: Wa diay silang kapalit og igo nga lokal nga bugas humay kay nipili ang mga mag-uuma sa pagbaligya sa ilang ani ngadto sa pribadong mga negosyante nga nitanyag og mas dakong presyo kay sa buying price sa NFA nga P17 matag kilo sa tipasi.

                -o0o-

        Apan nabuko na sab ang NFA. Gibutyag ni Piñol nga may nahibilin pa nga daghang tipasi sa nagkalainlaing umahan sa nasud nga gitanyag sa mga mag-uuma sa tag-P17 ang kilo. Gipahibawo sab sa Samahang Industriya ng Agrikultura (Sinag) nga tag-P17 matag kilo ra ang mga tipasi sa Mindoro.

        Nganong inay gastuhon ang ilang pundo sa pagtabang sa lokal nga mga mag-uuma pinaagi sa pagkompra sa mga tipasi sa ilang naandan nga buying price nga tag-P17 matag kilo, moinsistir man ang NFA sa pagpangompra og bugas humay gikan sa ubang kanasuran?

                -o0o-

        Posibleng katin-awan mao ang pagkawani sa kadagkoan sa NFA sa importasyon sa 325,000 ka tonelada nga bugas humay nga moabot na karong buwana kay gitugyan sa NFA Council ngadto sa pribadong mga negosyante.

        Karon gibanhaw sa kampo ni NFA Administrator Jason Aquino ang ilang kampanya sa mas laktod nga direktang pag-import sa gobyerno og bugas humay. Nga napamatud-an nang nisamot pagpaburot di lang sa utang sa NFA kon dili hasta na sa bolsa sa mga mapahimuslanon. [30] leo_lastimosa@abs-cbn.com 

Google Docs: Create and edit documents online. Google LLC, 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for February 8, 2018

Leo Lastimosa has attached the following document:

Arangkada for February 8, 2018

Snapshot of the item below:

Di inutil sa trapiko

        Paglingkod ni Atty. Victor Caindic isip bag-ong direktor sa Land Transportation Office (LTO) sa Central Visayas dayong tapos sa niaging buwan, gikanselar niya ang deputation sa tanan nilang mga ahente. Ang gipabilin nga deputized agents mao ra ang mga sakop sa Philippine National Police (PNP) kansang direktang tahas mao ang pagtabang pagduma sa trapiko, sama sa Highway Patrol Group (HPG).

        Sa iyang pagtambong sa Arangkada sa DYAB Abante Pa, Bisaya! gahapon sa buntag, gipasabot ni Caindic nganong wa siya magkarakara sa pagtugyan og balik sa deputation sa traffic enforcers sa local government units (LGUs).

                -o0o-

        Wa malilong ni Caindic ang tiyabaw sa LGUs nga inutil sila sa pagpatuman sa mga lagda sa trapiko kon way deputation sa LTO kay pikatan lang sa mga motorista ang ilang traffic enforcers nga igo rang makaluwat og citation tickets kay wa may gahom sa pagsakmit sa mga lisensiya ug pagpanghatag og temporary operator's permit (TOP).

        Kay sa wa pa matudlo sa LTO, nahimo siyang sakop sa board sa City Traffic Operations Management (CITOM) sud sa lima ka tuig ug nakalingkod gyod gani isip executive director sa CITOM sud sa pila ka buwan.

                -o0o-

        Gitataw ni Caindic nga mahimo lang nga deputized agents sa LTO ang regular nga mga kawani sa gobyerno. Kasagaran sa traffic enforcers mga kaswal nga kawani. May nailhan gani siyang traffic enforcers sa CITOM nga nagpabiling job order (JOs) sud na sa dul-an sa 20 ka tuig.

        Giangkon ni Caindic nga nag-abuso ang pipila sa deputized agents sa LTO sa nangaging katuigan. Naapil og katudlo ang mga di takos ug bisan ang mga kurakot.

                -o0o-

        Gipasabot hinuon ni Caindic nga di inutil ang LGUs bisan way deputation sa LTO. Kay makahimo sila sa pag-umol og mga ordinansa nga mohatag og gahom sa ilang traffic enforcers pagpanakop sa badlungong mga motorista.

        Gitumbok niya ang traffic ordinance sa Dakbayan sa Sugbo. Nga tungod tingali sa kakaraan ug sa kadaghan na sa napuno nga kausaban nataligam-an na ang komprehensibo nga mga probisyon. Nga nagduma sa tanang aspeto sa paghimong hapsay sa kadalanan, sama sa pagtakda sa mga ruta ug bisan sa mga hunonganan sa mga sakyanang pamasahero. [30] leo_lastimosa@abs-cbn.com 

Google Docs: Create and edit documents online. Google LLC, 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for February 7, 2018

Leo Lastimosa has attached the following document:

Arangkada for February 7, 2018

Snapshot of the item below:

Abril pa ang sulbad

        Gawas sa pagpahibawo nga nidangop na si Presidente Rodrigo Duterte sa diplomatikanhon nga ruta sa pagsulbad sa nag-ung-ong nga krisis sa bugas humay, wa nay laing kasayuran nga giluwatan ang Malakanyang unsa ang tinuod nga kahimtang sa imbentaryo sa National Food Authority (NFA).

        Nagsige og pasalig ang NFA nga nagpabilin nga abunda ang suplay ug ubos ang presyo sa bugas humay. Apan ang paghunong nila sa allocation sa accredited nga NFA retailers sugod sa Biyernes sa niaging semana dinhi sa Sugbo ug Central Visayas nakapatumaw sa kabalaka nga duna silang problema.

                -o0o-

        Gipahibawo sa NFA nga ang nasudnong imbentaryo sa bugas humay molungtad og 92 ka adlaw. Uban ang inadlaw nga konsumo nga 31,000 ka tonelada, nagpasabot ni nga duna pay 2.9 milyones nga toneladang bugas humay nga naa sa mga bodega sa mga negosyante.

Apan ang problema mao ang suplay sa NFA. Kay molungtad na lang og tulo ka adlaw. Mas ubos kay sa gitakda sa Legislative-Executive Council (LEDAC) nga panginahanglan sa 15 ka adlaw nga pundo. Mas ubos pa gyod sa 30 ka adlaw nga pundo nga panginahanglan sa tingnihit nga mga buwan.

        -o0o-

Gawas sa sunudsunod nga katalagman ug sa kapakyas pagpamalit sa ani sa mga mag-uuma sa niaging tuig, ang laing hinungdan sa pagtibugsok sa bugas humay sa NFA mao ang kalangay sa importasyon tungod sa away nilang NFA Administrator Jason Aquino ug sa iyang labaw nga si NFA Council Chairman Jun Evasco.

Giaprobahan na sa NFA Council ang pagkompra og 250,000 ka tonelada nga bugas humay gikan sa ubang kanasuran. Apan moagi pa sa laing sapaw sa burukrasya una mapahigayon ang bisan unsang importasyon.

        -o0o-

Gikinahanglan pa ang pagtugot sa National Food Security Committee (NFSC) nga giduma ni National Economic and Development Authority (NEDA) Director General Ernesto Pernia isip chairman ug sa deputy national statistician sa Philippine Statistics Authority (PSA) isip vice chairman.

        Nakaparat mao nga tulo pa ka buwan una makadunggo sa Sugbo ug ubang bahin sa nasud ang unang hugna sa imported nga bugas humay. Sa ato pa, unya pa sa Abril makaginhawa og luag ang mga konsumidor gikan sa pahimus sa hakog nga mga negosyante og bugas. [30] leo_lastimosa@abs-cbn.com 

Google Docs: Create and edit documents online. Google LLC, 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for February 6, 2018

Leo Lastimosa has attached the following document:

Arangkada for February 6, 2018

Snapshot of the item below:

Nalangay tungod sa away

        Naapiki ang suplay sa bugas humay sa National Food Authority nga, human sa daghan uyamot nga panghimakak, nikumpisal na gyod ang NFA nga gihunong nang ilang allocation alang sa accredited nilang retailers tungod sa kabalaka nga wa nay mahibilin sa ilang mga bodega kon may motumaw nga dakong katalagman.

        Managlahi ang katin-awan nga giluwatan sa kadagkoan sa NFA sa paspas nga pagtidlom sa ilang suplay. May nibasol sa kagamay sa ani sa mga umahan sa niaging tuig. May nitumbok sab sa pagsulbong sa hinabang nga bugas alang sa mga biktima sa gubat sa Marawi, mga bagyong Urduja, Vinta ug Agaton ug pag-ulbo sa bulkang Mayon.

                -o0o-

        Way bisan usa nila nga naghisgot sa labing dakong hinungdan sa kalangay sa importasyon sa bugas humay: Ang higanteng panagsungi nga niulbo tali nila ni Cabinet Secretary Jun Evasco, nga maoy pangu sa NFA Council (NFAC), ug NFA Administrator Jason Aquino.

        Si Aquino niinsistir nga ang gobyerno maoy mo-import aron mabadlong nang smuggling sa pribadong mga negosyante. Apan si Evasco nitataw nga mosamot ang alkanse sa NFA kon gobyerno ang mo-import, gawas nga mas barato ug mas maayo ang kalidad sa bugas kon pribadong sektor ang mohimo sa importasyon.

                -o0o-

        Si Aquino nga suod nilang kanhi Davao City Vice Mayor Polong Duterte, ang kontrobersiyal nga anak sa presidente, ug Presidential Special Assistant Bong Go maoy nidaog sa unang hugna sa away. Gitaktak ni Presidente Rodrigo Duterte ang sinaligan ni Evasco sa NFAC nga si Undersecretary Maia Chiara Halmen Reina Valdez.

        Apan si Evasco ang nipatigbabaw sa kataposan. Gipatigbabaw sa gabinete ug ni Duterte ang iyang baruganan nga itugyan ngadto sa mga negosyante ang pagpangompra og bugas humay gikan sa nagkalainlaing kanasuran.

                -o0o-

        Ang kalangay sa Malakanyang paghusay sa panagsungi maoy nakapa-uwahi sa importasyon. Dayong tapos na sa niaging tuig nga nahatagan og permiso ang mga negosyante pag-import og 805,000 metric tons (MT) nga bugas humay: 293,100 MT sa Thailand ug Vietnam; 50,000 MT sa China, India ug Pakistan; 15,000 MT sa Australia; and 4,000 MT sa El Salvador.

Salamat sa wa pag-abot ang unang hugna sa importasyon niadtong Disyembre, nag-piyesta karon ang mapahimuslanon nga commercial rice traders. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for February 4, 2018

Leo Lastimosa has attached the following document:

Arangkada for February 4, 2018

Snapshot of the item below:

Balay Paglaom sa kabataan

        Atubangan sa sibaw nga awhag sa higpit nga pagpatuman sa mga ordinansa nga nagdili sa mga bata paglaruy-laroy sa kadalanan lapas sa alas-10 sa gabii ug sa wa pay alas-4 sa kadlawon, apil na sa pasidaan ni Cebu City Mayor Tommy Osmena pagputol sa binuwan nga suholan sa mga barangay tanod nga di makapatuman sa lagda, nitumaw ang nataligam-an nga bahin sa krisis nga angayang patalinghugan.

        Si Cebu City Councilor Philip Zafra, Kapitan sa Tisa ug Presidente sa Association of Barangay Councils (ABC) Federation, nipahinumdom nga mapuslan lang ang curfew ordinance kon tugbangan sa mas malungtaron nga sulbad.

                -o0o-

        Wa mangayo si Zafra og bag-o. Igo lang siya nga nag-awhag nga ipatuman ang mga probisyon sa kontrobersiyal nga Juvenile Justice and Welfare Act sa 2006 (R.A. 9344), nga gipabilin sa mas bag-o nga R.A. 10630 niadtong 2013: Ang pagtukod sa "Balay Paglaom" (Bahay Pag-asa) nga maoy pahimutangan sa dinakpan nga mga bata.

          Ubos sa balaod, ang Balay Paglaom moatiman sa mga bata nga dinakpan tibuok adlaw ug gabii ubos sa pagduma sa local government units (kinahanglan nga mogahin og kuwarta sa pagtukod ug pagduma ang matag lalawigan ug highly urbanized city) ug lisensiyado nga non-government organizations (NGOs).

                 -o0o-

          Gawas sa Dakbayan sa Sugbo nga may "Operation Second Chance," wa nay laing LGU sa Sugbo nga nakatuman. Wa say nagtagad nga nasudnong ahensiya sa gobyerno, labi na ang Department of Social Welfare and Development (DSWD) nga mao untay gitahasan pagpatuman sa balaod.

        Kon way mga Balay Paglaom, ang mga dinakpan nga makalapas sa curfew igo lang nga itunol sa kapolisan o sa mga tanod ngadto sa ilang mga ginikanan. Dako ang kahigayonan nga mobalik ra sab sila sa paglaruy-laroy kon way laing himuon gawas sa pagsige og dakop nila.

                -o0o-

        Ang tinuod nga kapuslanan sa Balay Paglaom mao ang pagka Intensive Juvenile Intervention and Support Center (IJISC) nga may social worker, psychologist, doktor, guidance counselor ug sakop sa Barangay Council for the Protection of Children (BCPC).

Motabang sab pag-atiman sa mga bata nga dinakpan ang DSWD, Department of Health (DOH), Department of Education (DepEd), Department of Interior and Local Government (DILG) ug ubang ahensiya. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for February 3, 2018

Leo Lastimosa has attached the following document:

Arangkada for February 3, 2018

Snapshot of the item below:

Pagsangyaw sa Divine Mercy

        Haskang lisora sa kinabuhi ni Helena Kowalska. Way kinutoban nga katimawa, pagtamay ug pagsalikway ang nahiagoman sukad sa iyang pagkatawo hangtod sa iyang pagkamatay. Ikatulo siya sa napu ka managsuon. Panday ug mag-uuma ang iyang amahan, kabos ug relihiyuso ang ilang pamilya.

        Una niyang nabatyagan ang awhag sa relihiyusong kinabuhi sa pangedarong 7 apan gibalibaran sa iyang mga ginikanan ang pagsud unta sa kumbento human sa pila ka tuig sa eskuylahan. Nisud siya isip katabang sa panimay sa pangedarong 16 aron makatabang sa iyang mga ginikanan.

                -o0o-

        Sa pangedarong 19, gituman ang nabatyagang sugo ni Kristo sa pag-adto sa Warsaw, ulohan sa Poland, aron mag-madre. Apan gibalibaran sa mga kumbento nga iyang gituktok. Usa nila nipahibawo niya nga wa sila magkinahanglan og katabang.

        Human sa pila ka semana nga pagpangita, gidawat siya sa Congregation of the Sisters of Our Lady of Mercy. Apan may kundisyon: Kinahanglang mobayad sa iyang sapot sa pagka madre. Nisud siya isip katabang sa panimay sud sa usa ka tuig una nakabayad sa iyang sapot ug nahatagan sa iyang relihiyusong ngan nga Sister Maria Faustina.

                -o0o-

        Bisan ang mga nidawat niya nagduda sa mga pangangkon nga nakigsulti si Kristo niya. Wa siya tabangi sa kaubanang mga madre pagtuman sa sugo ni Kristo pagpintal sa iyang imahe isip "Hari sa Balaanong Kaluoy" nga nagsul-ob og puti nga may mga bidlisiw nga puwa ang kasingkasing.

        Bisan si Padre Michael Sopoćko, nga iyang gitug-anan sa pakigsulti ni Kristo niya, nipasusi sa kahimtang sa iyang pangutok. Nakapasar si Faustina sa tanang psychiatric tests ug gideklarar nga maayo ang panghunahuna.

                -o0o-

        Human niadto, si Sopoćko hingpit nang nipaluyo sa iyang kalihokan. Nidasig niya pagsuwat sa tanang gisulti ni Kristo. Mao say nipaila sa pintor nga si Eugene Kazimierowski nga maoy nihimo sa bugtong Divine Mercy painting nga nakit-an ni Faustina.

        Laing tigpaluyo si Arsobispo Karol Wojtyla sa Krakow nga dihang nahimong Pope John Paul II maoy nihingpit sa iyang pagka Santa niadtong Abril 2000. Apan ang labing dako niyang kampeyon nipasalig niya sa higayon nga labing naluya sa mga pagsuway: "Akong Anak, himoa ang tanan nimong mahimo pagsangyaw sa Akong Balaanong Kaluoy, Ako ang motapak sa imong kakuwang." [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.