Arangkada for February 13, 2018

Way kapuslanan ang NFA

Nakumbinser gyod sa National Food Authority (NFA) si Presidente Rodrigo Duterte nga gikinahanglan ang dinalian nga importasyon sa bugas humay. Bisan nagduda ang usa sa labing sinaligan sa presidente, si Cabinet Secretary Jun Evasco, ang Bol-anon nga tsirman sa National Food Authority Council (NFAC), nga pangilad ang ilang pangangkon sa pagtidlom sa ilang imbentaryo.

Nangangkon ang NFA nga nisugot na si Presidente Duterte sa pagpangompra og 250,000 ka tonelada nga bugas humay gikan sa ubang kanasuran. Bisan sa nitumaw nga mga ebidensiya nga wa magtuman ang NFA sa ilang trabaho.

-o0o-

Gisukwahi sa pasiuna nga pakisusi sa Senate Committee on Agriculture and Food nga gipangulohan ni Senador Cynthia Villar ang pangangkon sa NFA nga wa silang kapalit og lokal nga bugas humay gikan sa mga mag-uuma bisan sa kaabunda sa ani sa niaging tuig kay mas mahal ang palit sa pribadong mga negosyante.

Nakaplagan sa mga senador nga daghang mag-uuma sa Luzon ug Mindanao nga napugos intawon sa pagbaligya sa ilang tipasi sa presyo nga ubos kaayo sa P17 matag kilo nga support price kay way taga NFA nga nitabang nila.

-o0o-

Diin ra man diay nagsuruysuroy ang taga NFA sa pagpangita og mga tipasi nga ilang makompra pagpalambo sa ilang imbentaryo sa NFA rice aron nga makapadayon pagpabaha sa kamerkadohan og baratong alternatibo ug labaw sa tanan aron nga may matunol dayon nga hinabang alang sa mga biktima sa katalagman?

Ang kataphaw sa pagtuman sa batakan nilang tahas pagpanalipod sa mga konsumidor ug mga mag-uuma makadason sa pagduda nga ang kadagkoan sa NFA mas interesado sa gipasangil nga dagkong komisyon sa mga importasyon sa bugas humay.

-o0o-

Ang gitugotan ni Presidente Duterte nga importasyon sa 250,000 ka tonelada mapuno sa 325,000 ka tonelada nga importasyon sa pribadong sektor nga gitugotan sa NFAC. Ang unang importasyon modunggo karong buwana samtang ang ikaduha moabot sa pagsugod sa ani karong tuiga.

Wa gyod tay dag-anan sa NFA. Wa mapanalipdi ang mga konsumidor gikan sa pagpaginansiya sa commercial rice traders sa pagkawagtang sa NFA rice. Samtang way molingi sa ani sa mga mag-uuma inig abot sa 575,000 ka toneladas nga imported nga bugas. [30] leo_lastimosa@abs-cbn.com