Arangkada for February 2, 2018

Leo Lastimosa has attached the following document:

Arangkada for February 2, 2018

Snapshot of the item below:

Sulbad sa Mandaue

        Ilusad sa Dakbayan sa Mandaue sa di madugay ang "Mandaue App" nga motanyag nimo og sayon nga paagi sa pagkuha og kasayuran gikan sa City Hall, o pagpangayo og tabang ug pagtaho og krimen o aksidente sa kapolisan, o pagsud og nagkalainlain nga transaksiyon.

        Kabahin lang ni sa daghang kausaban nga gipahibawo ni Mandaue City Mayor Luigi Quisumbing sa iyang pagtambong sa Arangkada sa DYAB Abante Pa, Bisaya! gahapon sa buntag. Pagtugot sa Bangko Sentral ng Pilipinas na lang ang ilang gipaabot aron kasugdan ang binayranay sa mga buhis online.

                -o0o-

        Gibutyag sab ni Quisumbing nga ang ilang pagsagop sa bag-ong sistema sa paghikay sa mga dokumento sa mga negosyo sa Mandaue, nga niwagtang na sa naandan nga pagduma sa mga kawani sa dakong bahin sa proseso, sobra pa sa nakadoble sa ilang koleksiyon sa buhis karong tuiga kon itandi sa niaging tuig.

        Tungod ini, kasugdan na nila sa pagpatuman ang komprehensibo nga drainage plan, nga gipanghinaot nga hingpit na gyod nga makasulbad sa lapad ug karaan nang problema sa trapiko sa Mandaue, nga gahinan og dul-an sa usa ka bilyon ka pesos.

                -o0o-

        Nideklarar si Quisumbing og kadaogan sa kampanya batok sa kriminalidad sa Mandaue. Matod niya nitidlom sa kinaubsan nga ang-ang sa niaging tulo ka dekada ang mga krimen sa pagpatay, pagpanulis, pagpangawat ug pagpanlugos.

        Apan nisulbong ang mga kaso physical injuries. Dihang nahibawo nga kasagaran sa mga kaso sa pagpangulata naglambigit og lima lang ka bay kahilayan sa Mandaue, istrikto na niyang gipabantayan ang mga bay kahilayan, apil nang Sentral Bar nga gipanag-iya sa iyang ig-agaw.

                -o0o-

        Nakasabot si Quisumbing sa nagkasungi nga mga baruganan sa P1.4 bilyones nga tri-level flyover sa UN Avenue nga gitakdang sugdan na pagtukod karong tuiga. Iyang gitataw nga bisan unsa pa ang proyekto nga aktuwal nga mapilian, angay nga ipatuman sa labing daling panahon.

        Gibutyag ni Quisumbing ang ilang pagtuon sa Mandaue nga pribadong mga sakyanan, nga kasagaran tagsa ray sakay sa matag sakyanan, ang labing nakapahuot sa trapiko. Nga masulbad lang sa luwas ug kasaligan nga mass transport system. Kon ang mga pasahero di na mopadagan sa ilang mga sakyanan, makaginhawa na og balik ang kadalanan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for February 1, 2018

Leo Lastimosa has attached the following document:

Arangkada for February 1, 2018

Snapshot of the item below:

Hulga sa kauhaw

        Salamat sa kapating sa National Water Resources Board (NWRB), padayon nga nameligro ang suplay sa tubig sa Sugbo. Niinsistir ang NWRB nga sila ra ang makapatuman sa mga probisyon sa Water Code of the Philippines bisan wa silay igo nga kawani, kakugi ug kaisog.

        Hagbay ra nga nag-awhag ang lokal nga mga opisyal sa Sugbo nga hatagan sila og deputation sa NWRB aron nga makatabang sa pagpanalipod ug pagpalambo sa nahulga na nga mga tinubdan sa tubig sa mga dakbayan ug kalungsoran sa Sugbo. Apan, nakatag-an ka, nagpalingug-lingog lang ang NWRB.

                -o0o-

        Bisan tua ra sa kaulohan ang buhatan sa NWRB, sayon ang pagbantay sa gidaghanon sa tubig nga nakonsumo sa mga Sugbuanon niadtong katuigan nga ang Metro Cebu Water District (MCWD) ra ang gitugotan sa pagsuplay og tubig sa kabalayan sa ilang franchise area.

        Apan human gibungkag sa Korte Suprema ang monopoliya sa MCWD, nanguhong ang pribadong mga kompaniya sa tubig nga nag-iyahay pagsuyop og tubig gikan sa ilawom sa yuta ug pagpakatay og mga tubo ngadto sa kabalayan nga nahikawan sa suplay sa tubig sud sa daghan na uyamot nga katuigan.

                -o0o-

        Mag-agad ra ang NWRB sa mga taho sa MCWD ug pribadong water districts sa gidaghanon sa tubig nga ilang nasuyop ug naapud-apod matag adlaw. Apan kay tua ra man magtungkawo sa kaulohan way katakos ang NWRB pagsusi sa tinuod nga hulagway dinhi sa ato.

        Makapakugang ang nahibaw-an sa mga inhinyero sa MCWD sa niaging tuig nga nagsugod na og kaparat ang tubig sa Mabolo, Cebu City ug sa Mandaue City, Lapu-Lapu City ug Liloan tungod sa naghinobrang suyop sa groundwater.

                -o0o-

        Ambot konsuylo ba, o dugang ebidensiya sa ka-inutil sa NWRB, di lang Sugbo maoy ilang gi-isnab. Hasta ang Davao City, ang pinangga nga pinuy-anan ni Presidente Rodrigo Duterte, nabawo sab sa ilang pagsuway pagpanalipod sa ilang mga tinubdan sa tubig.

        Uban ang pagtuo nga sila ang labing nasuhito sa ilang suplay ug panginahanglan sa tubig, nag-umol ang taga Davao sa ilang kaugalingon nga water code ug nangayo sa deputation sa NWRB. Apan gikasab-an sila sa NWRB tungod sa pagpanghilabot. Ambot kanus-a malingian sa Malakanyang ang ilang katikig ug kakanahan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for January 31, 2018

Leo Lastimosa has attached the following document:

Arangkada for January 31, 2018

Snapshot of the item below:

Sukwahi sa tanang pasalig

        Hapit tanang kompaniya sa lana nakapahamtang na karong semanaha sa makalilisang nga excise tax sa ilang mga produkto ubos sa Tax Reform for Acceleration and Inclusion (TRAIN) ni Presidente Rodrigo Duterte. Nga nakapapa-apiki pag-ayo sa mga motorista kay nagsige sab og layat ang presyo sa lana sa merkado sa kalibotan sukad sa pagsugod sa bag-ong tuig.

        Nawani ang pasalig sa economic managers ni Presidente Duterte, ang tinuod nga mga utok sa TRAIN, nga karon ang tukmang panahon sa pagpatuman sa excise tax samtang nagsige pa og tidlom ang presyo sa lana.

                -o0o-

        Di pa ni mao. Nipasidaan ang mga eksperto sa lana nga mahimong magpadayon ang pagsaka sa presyo sa lana sa mosunod nga mga semana tungod sa pagtuman sa mga sakop sa Organization of Petroleum Exporting Countries (OPEC) nga gipangulohan sa Saudi Arabia ug sa non-OPEC countries nga gipangulohan sa Russia sa kauyonan pagpadayon sa laslas sa ilang produksiyon hangtod sa Disyembre karong tuiga.

        Gitumbok sab nila ang padayon nga pagsaka sa kalibotanong demanda ug ang posibleng mas dakong pagtidlom sa produksiyon tungod sa mga krisis sa Venezuela, Libya ug Nigeria.

                -o0o-

        Sa pikas nga bahin, may mga eksperto sab nga nipadayag og pagsalig nga hapit na mosangko sa kinutoban ang pila na ka buwan nga sunudsunod nga pagmahal sa lana tungod sa duha ka hinungdan:

• Mahimong molig-on pagbalik ang Amerikanhong dolyar kansang pagtibugsok sa niaging mga buwan maoy nakapataas sa demanda ug sa presyo sa lana; ug
• Nakabuylo na sab ang produksiyon sa shale oil sa Estados Unidos dinasig sa mas dakong ginansiya gikan sa mas taas nga presyo.

                -o0o-

        Apan bisan unsa pa ang dangatan sa presyo sa lana sa merkado sa kalibotan, mas dako gihapon nga patong ang excise tax sa krudo, gasolina ug ubang produkto sa lana di lang karong tuiga kon dili hasta na sa 2019 ug 2020.

        Nga seguro nang mopasaka sa plitehan sa mga sakyanang pamasahero, mahimong aprobahan sa Land Transportation Franchising ang Regulatory Board (LTFRB) sunod buwan ug ikapatuman na sa Marso, ug sa presyo sa inadlaw nga palaliton. Ug sobra pang makapapas sa gi-ulog-ulog sa Malakanyang nga dugang take home pay sa mga mamumuo. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for January 30, 2018

Leo Lastimosa has attached the following document:

Arangkada for January 30, 2018

Snapshot of the item below:

Asoy sa usa ka irihis

        Lain ang among tuyo sa Carcar City niadtong uwanon nga sayong buntag sa Dominggo. Nihapit mi sa bay sa usa ka inilang pari nga nangimbitar og mamahaw. Apan di diay pamahaw lang ang iyang giandam.

        Gida mi niya sa atbang sa ilang panimay diin nagtigom ang gatosan ka molupyo sa nagkalainlain nga mga dakbayan ug kalungsoran sa Sugbo ug kasilinganan nga mga isla. Nangaliya sila ug naminaw sa mga pagtulon-an ug kalihokan sa Archbishop Teofilo Camomot Divine Mercy Communities samtang nagpaabot sa ilang turno nga matambalan.

                -o0o-

        Sentro sa kalihokan ang kanhi magtutudlo sa agrikultura sa Dakbayan sa Toledo sa kasadpang Sugbo. Nga usa niana ka adlaw unom ka tuig na ang nilabay una nga nakamatikod sa talagsaon niya nga gasa. Nanginit pag-ayo ang iyang mga tudlo nga, dihang iya lang untang gipasagdan, nidan-ag og kahayag nga asul.

        Dihang gihikap niya ang nalawos nga tanom, nituyhakaw kini. Dihang giagak niya ang nakuyapan niya nga tinun-an, nitimbakuwas ug naulian sa panimuot. Nikatap sa eskuylahan ug kasilinganan nga mga barangay ang iyang katakos ug nagsugod sila sa pagpatambal niya.

                -o0o-

        Gipakita mi sa video sa iyang pagpanambal sa kaliboan ka pasyente. May bata nga amang nga nakasulti, hamtong nga bakol nga nakalakaw ug ubang pasyente nga nangangkon nga naayo sa leukemia, sakit sa kasingkasing ug ubang balatian.

        Ang pari nga nangimbitar namo, nga nangu sa daghang kawsa apil nang pag-usab sa pipila ka lagda sa Simbahang Katoliko, wa dayon motuo. Gisukitsukit una ang pito ka pasyente uban ang mga dokumento sa ilang mga doktor sa ilang pagkasakit ug pagkaayo. Karon siya na ang nitabang sa magtutudlo aron matambalan ang mas daghang masakiton.

                -o0o-

        Utro sab ko nga kuwang sa pagtuo. Human sa among pamahaw niadtong Dominggo, gikahinabi nako ang magtutudlo sa labing unang higayon. Nakugang dihang gipahibawo ko niya sa akong balatian ug, sa way daghang salida, giayo.

        Gihangyo ko nila sa di pagsibya sa ilang ngan ug paghatag og dugang kasayuran sa ilang kalihokan. Apan di mahimo nga iluom lang nako ang talagsaon nga kasinatian. Maong nangahas ko pagsuwat ning mubo nakong asoy. Pasayloa nga mangayo pa ko sa ilang pagtugot una makahatag og dugang kasayuran. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for January 29, 2018

Leo Lastimosa has attached the following document:

Arangkada for January 29, 2018

Snapshot of the item below:

Panglaktod ug pagmaniobra

        Nikumpisal na ang mga naghimo sa 1987 Constitution ngano nga wa maklaro kon maghiusa o magbuwag ba ang botasyon sa Senado ug sa House of Representatives sa pag-usab sa batakang balaod nga maoy pabilo sa panagsungi sa mga sakop sa duha ka bay balaoranan:

        Kay giumol nila ang probisyon uban ang pagtuo nga usa ra ka bay balaoranan ang ilang tukuron; apan dihang gituki na ang mga probisyon sa Kongreso nahukman nila ang pagtukod sa House ug sa Senado ug nakalimtan na ang pag-usab sa nahauna nga probisyon pag-usab sa konstitusyon.

                -o0o-

        Wa katabang sa kapakyas pagkamatikod sa kasaypanan ang talagsaon nga popularidad ni anhing Presidente Cory Aquino nga mao ang nagtukod sa Constitutional Commission (Con-Com) sa 1986 ug nagtudlo sa 48 ka sakop nga gipangulohan ni anhing Chief Justice Cecilia Munoz-Palma nga nipanday sa batakang balaod.

        Nga mahimong masubli ning nag-ung-ong nga pag-usab sa 31 ka tuig nang konstitusyon. Ang talagsaon nga popularidad ni Presidente Rodrigo Duterte mahimo nga mopalusot sa bisan unsa nga kausaban sa konstitusyon nga ilang isugyot, sa way makiangayon nga pagtuki makaayo ba sa nasud ug katawhan.

                -o0o-

        Ang kasaypanan sa Con-Com sa 1986 di hinuon magamit nga lisensiya sa mga kongresista sa paghimo og bisan unsa na lang nga hubad. Kay abunda ang ubang mga probisyon sa 1987 Constitution nga nagtakda nga buwag ang botasyon sa House ug sa Senado sa kasarangan nga mga balaudnon. Dakong salikwaot kon lamyon sa House ang Senado sa pagtuki na sa batakang balaod.

        Nahibawo nang mga alyado ni Presidente Duterte nga ipatigbabaw sa Korte Suprema ang buwag nga botasyon. Ganahan lang gyod sila nga mosuway sa paglusot.

                -o0o-

        Di mahimo nga tanang katawhan ang moapil sa pag-usab sa konstitusyon. Mao nga kinahanglan gyod unta sila og mga representante nga pilion alang lang gyod sa makuti nga tahas sa pag-usab sa konstitusyon, di ang mga senador ug mga kongresista nga napili alang sa mas kasarangan nga katuyoan.

        Mas pait kon ang mga niinsistir sa pagkuha sa gahom pag-usab sa batakang balaod wa maghunahuna sa kaayuhan sa nasud ug sa katawhan. Hinunoa naghigwaos sa paglugway sa ilang mga termino ug pagpaburot sa pribado nila nga mga interes. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for January 28, 2018

Leo Lastimosa has attached the following document:

Arangkada for January 28, 2018

Snapshot of the item below:

Panudya sa FB ug Google

Ang pagkumpisal sa Facebook nga ang pagpahimus sa mga gobyerno ug kahugpongan nga may daotan nga katuyoan sa ilang plataporma makahulga sa demokrasya gipasabot sa ilang kadagkoan nga maoy timaan sa determinado nila nga mga paningkamot pagpahibalik sa ilang negosyo isip puwersa sa kaayuhan.

Gipasidunggan si Mark Zuckerberg, ang batan-ong bilyonaryo nga tag-iya sa Facebook, sa iyang isog sa pasalig nga pangitaan og sulbad ang fake news ug uban nilang mga problema karong tuiga. Apan may sukaranan ang mga pagtuo nga ang tumong ning tanang pamostura sa Facebook mao ang pagluwas sa iyang kaugalingon.

        -o0o-

        Si George Soros, ang bilyonaryo nga pilantropo, ang niluwat sa labing kusganon nga pasidaan di lang sa Facebook kon dili hasta na sa Google ug ubang higanteng mga kompaniya sa internet: Inihap na lang ang inyong mga adlaw.

        Nipasangil si Soros nga pulos gamhanan nga mga monopoliya ang Facebook ug Google ug makadaot sila sa mga indibiduwal, kalibotanon nga ekonomiya ug sa demokrasya. Nitataw siya nga ang mga gobyerno sa nagkalainlaing kanasuran mopahamtang og bag-ong mga buhis ug mga lagda nga makapaluhod sa mga hawod sa Silicon Valley.

                -o0o-

        Gisilotan na ang Google tungod sa pagmaniobra sa iyang search engine, mobile operating system nga Android ug ad platform; gipaninglan ang Apple sa pagpanikas sa buhis; ug gisilotan ang facebook tungod sa paglapas sa privacy sa iyang users.

        Padayong gi-imbestigar sa US Congress ang Facebook ug Google tungod sa pagmaniobra sa Rusya sa ilang mga plataporma aron pagpabor ni Presidente Donald Trump batok sa iyang kaatbang nga si Hillary Clinton sa piniliay niadtong 2016.

                -o0o-

        Managsama ang pasiuna nga mga panagang sa Facebook ug Google: Pagdasig sa ilang users sa pagtabang pagbadlong sa fake news ug ubang mga maniobra kay di pa takos ang ilang algorithm ug di pa sila andam paghupot sa papel sa paghukom unsay tinuod nga balita ug unsay pangilad ug propaganda.

        Niburot ang Facebook ug Google tungod sa binilyon nila ka users nga nakasipong sa tanang advertisers ug nakahulga sa tradisyonal nga media. Karon ang users na sab ang pahaw-ason sa Facebook ug Google gikan sa gahong samtang silang Zuckerberg ug kaubanan ang padayong nagpabusdik sa higanteng kita. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for January 27, 2018

Leo Lastimosa has attached the following document:

Arangkada for January 27, 2018

Snapshot of the item below:

Di sila mag-unay

        Atubangan sa nikatap nga daghan uyamot nga huhongihong sa iyang politikanhon nga kaugmaon, nitawag si kanhi Cebu City Mayor Mike Rama sa Arangkada sa DYAB Abante Pa, Bisaya! gahapon sa buntag aron pagtino sa mosunod:

• Di mahitabo nga silang duha si Bise Mayor Edgar Labella ang managan pagka mayor batok ni Mayor Tommy Osmena sa sunod nga piniliay; ug
• Sama nga way seguro nga mahinayon ang piniliay sa barangay ug Sangguniang Kabataan (SK) karong Mayo 14, wa say seguro may piniliay ba sa sunod tuig kay mahimong maapsan sa federalismo.

                -o0o-

        Matod ni Rama mas ganahan siya nga mangandam alang sa piniliay sa 2022 nga mas dako ang kahigayonan nga mapahigayon human sa init ug kutas nga lalis sa pag-usab sa 1987 Constitution nga gi-apura sa mga alyado ni Presidente Rodrigo Duterte sa Kongreso.

        Supak siya sa pagpamugos sa paghimo sa Kongreso nga constituent assembly, uyon siya sa tinuyo nga piniliay sa mga delegado sa Constitutional Convention ug pabor siya nga palambuon lang ang otonomiya sa local government units (LGUs) inay sa pag-usab sa sistema sa gobyerno ngadto sa federal.

                -o0o-

        Gitataw ni Rama nga ahat pa ang pagdeklarar nga patay na ang iyang pamolitika sa Dakbayan sa Sugbo tungod sa pagdumili ni Presidente Duterte pagpapas sa iyang ngan gikan sa listahan sa mga gipasanginlan nga drug protectors.

        Gibutyag sab ni Rama nga nag-abot na sila ni Presidente Duterte atol sa San Beda Law Alumni Homecoming sa Nobyembre sa niaging tuig, nagkuptanay sa ilang mga kamot ug nag-abot ang ilang mga mata apan wa pa gyod magkasulti.

                -o0o-

        Malipayon sab nga nitaho si Rama nga nagpadayon ang pagdis-og ug masaaron ang pag-ihap pagbalik sa mga balota sa mga presinto sa Dakbayan sa Sugbo nga naapil sa iyang protesta batok sa kadaogan ni Mayor Osmena sa niaging piniliay.

        Apan sama sa naandan nihit ang iyang detalye. Igo lang nipasidaa nga mapamatud-an nga di sama katukma ang vote counting machines (VCMs) nga gigamit sa Commission on Elections (COMELEC). Ug nga mas modako ang iyang kahigayonan nga makalingkod sa City Hall kon makabuylo na ang recount sa protesta ni kanhi Senador Bongbong Marcos batok ni Bise Presidente Leni Robredo. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for January 26, 2018

Leo Lastimosa has attached the following document:

Arangkada for January 26, 2018

Snapshot of the item below:

Pangaliya sa tukma nga balita

        Nangahas ko og hubad sa matahom nga pangaliya ni Pope Francis nga kabahin sa iyang mensahe alang sa kalibotanon nga pagsaulog sa World Communications Day karong tuiga. Iyang giila ang nagbuntaog nga hulga sa sayop nga kasayuran nga nakahilo sa panghunahuna sa daghan uyamot nga katawhan.

Gitumbok niya nga nakalingla sa katawhan ang fake news kay gitumong sa pagpaukyab sa dugay na nga nagpahipi nila nga mga emosyo sama sa kahimangod, kasuko, kahingawa ug kahadlok. Dinasig sa pangaliya nga gipasidungog ni St. Francis sa Assisi, nia ang Iningles nga pangaliya ni Pope Francis (nga akong gi-Binisaya sa ubos):

        -o0o-

Lord, make us instruments of your peace.

Help us to recognize the evil latent in a communication that does not build communion.

Help us to remove the venom from our judgements.

Help us to speak about others as our brothers and sisters.

You are faithful and trustworthy; may our words be seeds of goodness for the world:

where there is shouting, let us practise listening;

where there is confusion, let us inspire harmony;

where there is ambiguity, let us bring clarity;

where there is exclusion, let us offer solidarity;

where there is sensationalism, let us use sobriety;

where there is superficiality, let us raise real questions;

where there is prejudice, let us awaken trust;

where there is hostility, let us bring respect;

where there is falsehood, let us bring truth.

Amen.

                -o0o-

Ginoo, himoa mi nga kahimanan sa imong kalinaw.

Tabangi mi pag-ila sa nagpahipi nga kadaotan sa komunikasyon nga wa mopabarug og panagsawo.

Tabangi mi pagtangtang sa hilo gikan sa among paghukom.

Tabangi mi paghulagway sa uban isip among mga igsuon.

Matinud-anon ka ug kasaligan; himoa ang among mga pung nga binhi sa kaayo sa kalibotan:

kon may siniyagitay, pabansaya mi sa pagpaminaw;

kon may kalibog, padasiga mi sa pagsabtanay;

kon may kahanap, padad-a mi og katin-awan;

kon may pagsalikway, patanyaga mi og pagtinabangay;

kon may pagpaukyab, pagamita mi sa kakalma;

kon may kataphaw, paisaha mi sa tinuod nga mga pangutana;

kon may pagpihig, papukawa mi sa pagsalig;

kon may kasilag, padad-a mi sa pagtahud;

kon may kasaypanan, padad-a mi sa kamatuoran.  

Amen. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for January 25, 2018

Leo Lastimosa has attached the following document:

Arangkada for January 25, 2018

Snapshot of the item below:

Kahigam sa habal-habal

        Atubangan sa pagkabanhaw sa mga awhag sa paghimong legal sa mga motorsiklo nga pamasahero tungod sa bag-ong mga balaudnon nga gipasaka sa House of Representatives, nga gikabalak-an hinuon nga mabasura ra gihapon sama sa mga balaudnon nga gisubli-subli og pasaka ni Kongresista Red Durano sa ikalimang distrito sa Sugbo sa nangaging katuigan, niang akong mga sugilanon sa habal-habal:

        Una, ang pagkatap sa mga habal-habal sa niaging Sinulog nimatuod nga way bisan usa, bisan ang kadagkoan sa LTFRB pa, nga mangahas pagbaraw sa pagpabor ni Mayor Tommy Osmeña sa mga habal-habal.

                -o0o-

        Ikaduha, habal-habal ang nakaluwas nako gikan sa grabeng kahuot sa kadalanan nga wa maapil sa Sinulog Grand Parade niadtong Dominggo. Nasum-ok ko sa Barangay Pasil og pinangita og taxi apan wa gyoy nasakyan. Gitambagan ko sa mga molupyo nga mag-habal-habal na lang.

        Apan way bisan usa nila nga nipasidaan nako sa ka-agresibo sa akong natsambahan nga drayber: Di siya ganahang mababagan, di mahimutang nga di magdagan, nagsige og pangita og kalutsan, naumod mi og trisikad, natikwang na unta sa kanal apan nakasandig sa sinako nga uling ug dihang nakalusot nipabulhot og dagan nga morang way ugma.

                -o0o-

        Ug ikatulo nakong sugilanon nahitabo pila ka tuig dihang naghatod mi sa mga hinabang sa Kapamilya Relief Campaign sa mga biktima sa pagdahili sa yuta sa Jagna, Bohol nga nilungtad og pila ka semana.

        Ni-una mi og pauli kay may tambongang tigom sa Sugbo ang among kauban, kinsa ni-apura sa habal-habal pagdali aron makaapas mi sa fastcraft sa Tagbilaran. Labihang paspasa sa among dagan nga morang nalumping ang among aping sa hagiyos sa hangin.

                -o0o-

        Nakaabot gyod mi sa dayon na nga tangtang sa damyo sa barko. Nakaabot sab sa akong tuyo sa Talisay niadtong Dominggo ug luwas nga nakabalik sa among pinuy-anan sa Consolacion.

        Apan nahibawo ko nga gamayng sayop nga liko, o ligas sa ligid, o buwasot sa mas lawom nga libaong, nabalintuwad na ang mga motorsiklo, nalagpot na ko sa hingpit nga kaalaotan. Nga mahimong mao sab ang nahunahunaan sa ubang pasahero sa habal-habal. Nahadlok hinuon ko nga bisan sa tanang kakuyaw, andam gihapon ming mosakay og mga habal-habal sa sunod namong dinalian nga mga lakaw. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.