Arangkada for July 1, 2017

Leo Lastimosa has attached the following document:

Arangkada for July 1, 2017

Snapshot of the item below:

Pagtabang nga way sukod

        Sa kataposang mga adlaw sa among pangandam sa Grand Halad sa Kapamilya, nga mao nay ika-20 sukad namo gilusad sa Plaza Independencia niadtong 1995, mas subsob nang nangabot ang mga hinabang nga naglakip sa kinarton nga mga tambal, mga antipara, binotelyang tubig ug softdrinks, ug nagbuntaog nga mga putos sa plastik nga mga baso, kutsara ug tinidor.

        Puno ni sa cash donations nga gipanghatod na ug sa nagkalainlaing putahe ug pagkaon nga kasagarang magbaha sa adlaw na mismo sa labing dakong piyesta sa libreng mga pangalagad sud sa Main Campus sa Cebu Technological University (CTU).

                -o0o-

        May nanawag sa among landline nga nagpahibawo nga ihatod nila ang kinilong mga isda ug nukos sayo karong buntag dayong sugod sa Grand Halad aron nga maluto dayon alang sa mga bakwet gikan sa Marawi City nga ilang nadunggan sa DYAB Abante Pa, Bisaya! nga mopahimus sa libreng mga tambal ug ubang pangalagad.

        Nagpitipiti sang text messages ug mga tawag nga nagsusi makasud na ba sila sa wa pay alas-6 sa buntag aron nga maoy labing unang makapanghatag sa init nga pan ug kape sa mga pasyente gikan sa lagyong mga dapit nga naglinya na sa ganghaan sa CTU kadlawon pang dako.

                -o0o-

        Hangtod nga nadapit ang akong pagtagad sa usa ka hamtong nga babaye nga nisud sa ABS-CBN Complex nga nagbitbit og putos. Matod niya naglung-ag siya og mani, nga gikan sa gamay nilang uma gikan sa bukid sa Consolacion, nga ganahan niyang pakisaw-an sa mga gipanggutom nga manambong sa Grand Halad.

        Puti nang iyang buhok ug napagtong sa init ang iyang panit apan tuyhad pang barug ug determinado bisan hinay nang iyang linakwan. Sa wa pa kong kasugod og pangutana, iya kong gipasaligan: "Karon sila, ugma ako."

                -o0o-

        Nahibawo siya nga ang mga pasyente sa Grand Halad nga makakaon sa linung-ag nga mani di makaila niya ug mahimong di gyod makabawos sa iyang kaayo. Apan nisalig sab nga sa panahon sa iyang panginahanglan di sab mapasagdan.

        Kalunsay sa iyang tabang. Nga mapilu-pilo sa makadaghan uyamot nga higayon karong adlawa sa panag-abot sa kaliboan nga motabang ug magpatabang. Dayon sa Grand Halad sa Kapamilya! [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for June 30, 2017

Leo Lastimosa has attached the following document:

Arangkada for June 30, 2017

Snapshot of the item below:

Tulay sa pagtinabangay

        Sa pagpahigayon sa ika-20 nga Grand Halad sa Kapamilya karong Sabado, Hulyo 1, ang mga nakatambong na sa labing dakong piyesta sa libreng mga pangalagad nahibawo ang duha ang papel sa mga mangapil sa kalihokan: Pagtabang ug pagpatabang.

        Tungod sa pagtuo nga way kabos nga way ikatabang ug nga way adunahan nga di magkinahanglan og tabang, nanghinaot mi nga maayo rang mga butang ang mosangpot sa panag-abot sa mga nagkinahanglan og tabang ug sa mga may katakos ug kasingkasing sa pagtabang. Ug nadasonan ang among pangindahay sa matag higayon.

                -o0o-

        Amo hinuong klaruhon nga nagtugkad sa yuta ang among mga tiil sa among determinasyon pagkab-ot sa mga panganod. Sa pipila sa nangaging mga Grand Halad, nitumaw ang laksot nga panagway sa pagpahimus.

        Pananglitan, may mga kompaniya nga nanghatag og mga tambal nga hupas na (maayo na lang nga nakit-an sa abtik nga mga boluntaryo sa wa pa maapud-apod ngadto sa mga pasyente), may mga ginikanan nga nituyo pagpa-ubo o pagpahilak sa gagmay nilang bata sa pagtuo nga ma-resetahan og mas daghang tambal ug may mga boluntaryo nga mas ganahang mopalambo sa ilang negosyo kay sa pagserbisyo.

                -o0o-

        Apan ang gagmay nga gum-os sa sidsid sa Grand Halad sa Kapamilya di makatabon sa mas lapad nga katahom ug kalunsay sa pasundayag sa paghinatagay ug pagsaw-anay sa katigayonan, katakos ug panahon: Pagtabang ug pagpatabang sa way pag-ihap.

        Masaligon ming mopahibawo nimo nga mas daghan ang ganahan ug matinud-anon nga nitabang, mas daghan ang nihangop sa kaaghop sa pagtabang sa way pagtunglo sa dakong kang-a tali sa gasang nadawat ug sa tinuod nilang panginahanglan.

                -o0o-

        Bisan kon sa matag lusad sa Grand Halad hakpon gihapon mi sa kabalaka nga gikapoyan nang katawhan sa pagtabang ug nangluod nang mga tabanganan kay pabiling nahikawan sa labing batakan nilang panginahanglan, padayon ming nangahas.

        Ug sa matag higayon nalumos mi sa nagbaha nga halad sa kamanggihatagon ug sa kadaghan sa mga namasin nga matabangan. Nga nimatuod nga way sukaranan ang among mga pagduda. Busa sa makausa pa, uban ang mapasalamaton nga kasingkasing, dayon sa laing Grand Halad sa Kapamilya, nga inyong gihimo nga tinuorayng taytayan sa gugma ug paghinatagay! [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for June 29, 2017

Leo Lastimosa has attached the following document:

Arangkada for June 29, 2017

Snapshot of the item below:

Salamat sa imong Halad

        Sa Grand Halad sa Kapamilya karong Sabado, Hulyo 1, sa CTU Main Campus:

Mga doktor sa Cebu City Medical Center, Cebu City Health Office, Saint Anthony Mother and Child Hospital, Mendero Medical Center, Cebu City Long Life Program, Cebu Provincial Health Office, Cebu Doctors University Hospital, Vicente Gullas Memorial Hospital, Philippine Navy, Philippine Coastguard ug Sacred Heart Hospital.

        Paramedics sa ERUF ug nurses sama nilang Roldan Maurin ug Noravil Ramirez. Tambal sa Yap Family, Tata Villanueva, Daisy Pader, Wen-Wen Rubio, Wow Travel and More, Helen Teo, Tata Pacaña, Inday Baring Nacario, Esther Jimenez, Porling Capuno, Zenon Camasura, Freeman Foundation, Dr. Riza Clarin, Melia Sumampong, Winna Terfilo, San Miguel Corporation Community and Employees Multipurpose Cooperative, Long Life Program, First Grandeur Builders, Lilylu Cortes ug ABS-CBN Foundation.

                -o0o-

        Laboratory services sa Stanford Laboratory, Perpetual Succour Hospital, Reactive Medical Laboratory, Mendero Medical Center, Phil Bluecross Biotech Corp. ug Chonghua Hospital. Dental services sa Juanito I. King Foundation, College of Dentistry sa SWU PHINMA, Oral Prophylaxis, Rotaract Cebu East, Phil Dental Association-Cebu Chapter, Philippine Coastguard ug RTK Marketing. Libreng optical services sa E. Fernandez Optical Clinic, Lina Maniwang, Yap Family, Dr. Christine Fernandez, Dr. Ester Concha ug Dr. Lydia Yongco.

        Wellness services sa DMDP Cebu City, St. Joseph-San Roque Foot Reflexology Mandaue, Helping Hands Organization, Dugukan Cebu Hilot ug Dr. Ronald Samaniego. Libreng veterinary services sa Cebu City Department of Veterinary Medicine and Fisheries, PHINMA-SWU-CVM, Philippine Pet Birth Control Foundation, Caminade Pet Shop ug IRO Foundation. IT services sa UPTime Links Solutions, Dante Babida ug Tesda Provincial Office. Legal ug notarial services sa USC Law ug IBP Cebu City Chapter.

                -o0o-

        Pagkaon nilang Ahmed ug Abeth Cuizon, Neil Seguan, Minda Ocliasa, Miggi's Catering, Great Minds Bar Review Center, Gold Coin Grills and Catering, Mabolo Bam-i House, Creselda Ranile, Teresa Villahermosa, Kings Quality Food, Travel Cafe and More, Liloan Councilor Edna Cala, JEDCO, San Miguel Corporation Community and Employees Multipurpose Cooperative, UV H.S. '82 Core Group, Bacayo BBQ, Maris Garciano, Coca Cola Femsa, Virginia Foods, Herry Siedacan, Atty. Ralph Sevilla, Klasmit Yul Julia, Rulls Bakeshop, Kanhi Cebu City Councilor Alvin Dizon, Vilma Andales ug Paul Hubahib.

        Tabang sa MCWD, Dept. of Public Services, San Nicolas Councilor Clifford Niñal, Phil. Special Force Agents, ALA Boxing Gym, Cebu City General Services Office, Inkblots Printers ug Cebu Metropolitan Cathedral. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for June 28, 2017

Leo Lastimosa has attached the following document:

Arangkada for June 28, 2017

Snapshot of the item below:

Nakalimot nga missing

        Usa ka oras human nagpahibawo si Bohol Provincial Board Member Niño Rey Boniel sa presinto sa kapolisan sa Bien Unido nga missing ang iyang asawa niadtong Hunyo 7, gidapit siya sa mga opisyal sa Bohol Provincial Police Office (BPPO) pag-adto sa ilang headquarters sa Kampo Dagohoy sa Tagbilaran, City.

        Way kasayuran nga gihatag si Boniel, ni ang mga polis sa Bien Unido, unsay nahitabo gikan sa alas-3 sa hapon kanus-a nagpa-blotter si Boniel hangtod sa alas-4 sa hapon kanus-a niabot sa iyang pinuy-anan sa Poblacion sa Bien Unido si Senior Inspector Jojie Mananquil, hepe sa BPPO Intelligence Branch.

                -o0o-

        Igo ra bang nagpahibawo si Boniel sa mga polis sa Bien Unido? O gipadangat sab niyang alarma ngadto sa BPPO? O sa Police Regional Office (PRO 7)? O sa Kampo Crame gyod? Taym pa, nagpa-blotter ba siya kay nabalaka nga wa na igkita ang iyang asawa? O may lain siyang tumong?

        Sa pikas nga bahin, unsa man say gihimo sa mga polis sa Bien Unido? Gi-alam-alaman ba si Boniel nga magpaabot una og 24 oras kay tingali og may gilakaw lang ang asawa? O gipayaka lang ang blotter hinikalimtan nga mayor sa Bien Unido ang gi-alarma nga missing?

                -o0o-

        Kon basahon ang petisyon ni Boniel sa habeas corpus sa Regional Trial Court sa Talibon sa Hunyo 8, hasta siya nakalimot nga missing ang iyang asawa. Wa gani kahunahuna nga posibleng nahilambigit sa kaso sa iyang asawa ang pagpatawag ni BPPO Chief, Senior Superintendent Felipe Natividad, niya.

        Matod ni Boniel, ug di ni niya mapanghimakak kay nasuwat sa iyang petisyon, boluntaryo siyang nikuyog ni Mananquil tungod sa pagtuo nga tukion nilang Natividad ang seguridad sa Bohol kay sakop man siya sa Bohol Provincial Peace and Order Council.

                -o0o-

        Unsang klaseha sa pagka-bana si Boniel? Usa ka oras human nagpa-blotter nga missing ang iyang asawa, dihang nakahigayon pagpakigsulti sa hepe sa BPPO, nga klarong mas makatabang pagpangita sa iyang asawa, ang seguridad sa Bohol man hinuoy nisantop sa iyang hunahuna?

        Tungod ba kay tinuod ang pangangkon sa higala sa iyang asawa nga lima ka buwan na silang buwag? Kon mao, nganong kalit man lang nagpakabana hain nang iyang asawa? [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for June 26, 2017

Leo Lastimosa has attached the following document:

Arangkada for June 26, 2017

Snapshot of the item below:

Ligo nga way tubig

        Kanihit sa tubig. Kakandingon. Kamausisahon. Google. Wikipedia.

        Mao nay talagsaong kumbinasyon nga nisangpot sa pagkamugna sa alternatibo sa naandan natong pagkaligo nga magamit og tubig. Kon maghinobra, mosangpot sa kausik sa tubig. Kon magkuwang, o kon hugaw ang tubig, mosangpot sa sakit ug kamatayon.

        Nagbuwad sa init ang mga batan-on sa ilang pinuy-anan sa Limpopo, South Africa dihang nangandoy ang usa nila nga makakaligo nga way tubig. Mao ni nakaaghat sa 17 anyos nga si Ludwick Marishane sa pagdangop sa internet pagpangita og tubag sa pangandoy sa iyang higala.

                -o0o-

        Kay wa may laptop, sa mobile phone rang Marishane nahimo ang makuti niyang pagtuon sa tanang matang sa sabon, lotion ug moisturizer ug unsay ilang kapuslanan. Gikan sa mga sagol sa kemikal, mga tanom ug prutas, nakamugna og iyang kaugalingon nga gel nga makapuli sa tubig ug sabon sa pagkaligo.

        Ang ka-way puhonan wa kababag sa iyang determinasyon. Ginamit ang iyang mobile phone, naghimo si Marishane og 40 ka pahina nga business plan ug gisumiter sa tanang panagtigi sa bag-ong mga negosyo sa South Africa. Ginamit ang tanang nadaog nga premyong kuwarta, gilusad ang iyang produkto: DryBath Gel.

                -o0o-

        Human sa 10 ka tuig, si Marishane nakatukod na og iyang kaugalingong kompaniya, ang Headboy Industries Inc. nga, gawas sa DryBath Gel, nagmugna na sab og ubang mapuslanong mga produkto.

        May lain siyang problema: Unsaon paglaslas sa presyo sa DryBath Gel aron nga maabot sa labing kabos nga mga molupyo sa mga dapit nga nihit ang tubig, nga maoy tinuod niyang gipahinungdan sa produkto. Iyang sulbad: Patas-an ang presyo alang sa adunahang mga konsumidor aron ma-subsidize ang presyo sa kinabag-an.

                -o0o-

        Masaligon siyang mobayad sa mas taas nga presyo ang hotels nga kabahin sa kampanya pagdaginot sa tubig, mga kompaniya sa ayroplano nga tag-as og flights ug mga atleta.

        Sa pagsusi sa ilang website (headboy.org), akong nahibaw-an nga nagsugod na sila og pamaligya sa DryBath Gel Premium sa nagkalainlaing kanasuran sa kalibotan apil na sa Pilipinas. Wa pa hinuon silay mga tindahan. Busa maka-order lang online. Ilang presyo? P2,232.90 matag kahon nga may pito ka sachet. O P319 matag kaligo. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for June 25, 2017

Leo Lastimosa has attached the following document:

Arangkada for June 25, 2017

Snapshot of the item below:

Sunod nga rebolusyon

Sa pipila ka pinuy-anan sa labing adunahang mga negosyante sa labing malambuong mga nasud sa kalibotan, magsultianay nang ilang kabtangan: Inig alarm sa ilang smart phone sa sayong buntag, mosiga ang suga ug mapawong ang aircon sa kuwarto, moandar ang coffee maker sa kusina ug motingog ang radyo o TV uban sa balita o musika.

Sa gitakdang oras human sa pamahaw, moandar ang sakyanan sa grahe, mapawong ang mga suga ug ubang kahimanan sa bay nga wa na gamita, moabli ang gate ug inig biya sa sakyanan mokandado og balik dungan sa ubang pultahan kon wa nay tawo sa bay.

-o0o-

Human sa smart homes, matukod sa di madugay ang smart cities. Diin ang mga sakyanan, gawas nga wa nay drayber, makalikay na sa bara sa trapiko ug makadaginot og gasolina ug ang mga polis makadungog ug makatultol dayon sa mga buto sa armas ug mas paspas nga makapanalipod sa publiko.

Sa mga tambalanan, ang mga espesyalista maka-opera na sa mga pasyente nga nahimutang sa pikas nga bahin sa kalibotan ginamit ang real-time robotic tools ug busa mahimo nang mas paspas, mas sayon ug mas barato ang pagluwas og mga kinabuhi ug pag-ayo sa mga sakit.

-o0o-

May seryuso hinuong hulga sa paspas nga pagkatap sa Internet of Things (IoT): Ang kahakog sa pipila ka kompaniya nga nanag-iya sa bag-ong mga teknolohiya pagpakigsawo aron nga maangkon ang gawasnon nga technology standards sa tanang kahimanan aron nga makaapil ang tanan sa nag-ung-ong nga technological revolution.

Maong karon pa lang gipaningkamotan na nga gawasnong magkasulti ang chips ug sensors nga ipamutang sa refrigerators, TV sets, mga suga, gripo, kandado, sapatos, unlan, habol, katre, sinina ug ubang butang.

        -o0o-

        Palandonga ang kalibotan, nga nihiyos na pag-ayo tungod sa world wide web, nga hingpit na gyong mabugkos sa IoT. Gipanghinaot nga mosangpot sa mas makiangayon nga pag-apud-apod sa kalibotanong katigayonan ug makahatag og managsamang kahigayonan hasta sa labing gagmay.

        Ang paghimong gawasnon sa labing mahinungdanong mga teknolohiya sa IoT makapalambo sa tanan. Ang bisan unsang pagsuway pag-monopoliya nila makapasamot sa kadako sa haw-ang tali sa mga dagko ug mga gagmay ug busa angayng pungilon nang daan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for June 24, 2017

Leo Lastimosa has attached the following document:

Arangkada for June 24, 2017

Snapshot of the item below:

Fake news sa 4Ps

        Di na makapakugang nga 4Ps (Pantawid Pamilya Pilipino Program) sa Department of Social Welfare and Development (DSWD) maoy labing uwahing nabiktima sa fake news sa fake rice. Kay sukad pa sa pagsugod siyam ka tuig nang nilabay, ang 4Ps nahiagom na sa daghan uyamot nga kontrobersiya.

        Sukad gilusad ni kanhi Presidente Gloria Macapagal-Arroyo, gipalapdan ni kanhi Presidente Noynoy Aquino ug gipadayon ni Presidente Rodrigo Duterte, ang 4Ps wa gyod buwagi sa mga pasangil nga, sama sa gikataho nga fake rice sa Sta. Fe sa Bantayan, napamatud-an nga way sukaranan.

                -o0o-

        Sa sinugdanan, gidudahan ang 4Ps nga higanteng pamolitika--ang mga politiko namugos nga iapil ang ilang mga dumadapig isip beneficiaries o nga tangtangon gikan sa programa ang mga wa kabotar nila.

        Bisan ang mga senador ug mga kongresista nanagana sa paggahin og pundo alang sa 4Ps kay gilingla sila sa mga reklamo nga matag panghatag sa financial assistance mangligdas sa kahubog ang mga amahan sa mga pamilyang beneficiaries ug ang nahibilin sa hinabang gihurot sa mga sugal. Apan tungod sa kamalampuson sa programa gidaginot na lang og duhig sa nangalisbong bakak sa fake rice nga gi-piyestahan sa social media.

                -o0o-

        Wa hinuoy fake news ni intriga nga makalalis sa kamakiangayon sa mga kundisyon, nga nakapahamtang sab hinuon og dagkong limitasyon, sa 4Ps. Kahatagan og hinabang ang labing kabos nga mga pamilya kon makapa-bakuna ug makapatambal sa ilang mga masuso ug makapa-eskuyla sa ilang mga bata.

        Mao nga samtang naglaway lang sa programa ang mas kabos nga mga pamilya nga way gagmayng mga anak, kaliboan sab ka pamilyang beneficiaries ang nakapa-gradwar sa ilang mga bata ug makabarug na sa ilang kaugalingong mga tiil.

                -o0o-

        Gipa-imbestigar nang DSWD 7 Director Evelyn Macapobre ang pasangil nga gipugos ang beneficiaries sa Sta. Fe pagpalit og bugas humay nga ubos og kalidad ug bisan kon pipila nila mas ganahan og mais.

        Nipasabot siya sa Arangkada sa DYAB Abante Pa, Bisaya! nga samtang cash ug di bugas ang ilang gihatag gitugotan nila ang beneficiaries sa paghugpong ug pag-negosyo og bugas. Apan gitataw ni Macapobre nga bisan ang kahugpongan sa beneficiaries di makapugos sa mga sakop kinsa gawasnong mopili asa mopalit ug unsang bugasa ang paliton. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for June 23, 2017

Leo Lastimosa has attached the following document:

Arangkada for June 23, 2017

Snapshot of the item below:

Pagtakoban ug pagpangilad

        Usa sa labing dakong problema sa bisan unsang pagsuway pagbadlong sa fake news, sama sa balaudnon ni Senador Joel Villanueva nga mopahamtang og mas taas nga priso ug mas dagkong multa sa mga indibiduwal, mga opisyal sa gobyerno ug media organizations nga malisyusong mopakatap og sayop nga kasayuran, mao ang kasayon paggamit og alyas o pag-peke og mga ngan sa social media.

        Kay kinsa man ang masilotan kon magtakoban ang mga responsable? Unsaon man pagbadlong sa kalapasan nga nagpahipi man sa kangiob nga gitanyag sa internet ang mga nagpasiugda?

                -o0o-

        Kon tumanon ang lagda sa Facebook, di kamugna og account ang mga bata nga nagpangedaron og 17 paubos. Apan nahibawo tang tanan, labi nang kadagkoan sa FB, nga dakong bahin sa ilang users menor de edad.

        Palandonga ang kahimangod sa 10 anyos nga bata nga gibalibaran sa FB kay nitug-an sa tinuod niyang edad. Dayon, palandonga ang iyang kahinangop dihang gitugotan na sa FB nga makahimo og account human dobleha ang iyang edad. Unsa may makapugong niya pagtago sab sa iyang ngan ug pinuy-anan ug pagbutang og di mao nga profile picture?

                -o0o-

        Bisan sa tanan nilang pasalig nga motabang pagbaraw sa fake news, di kang kapaabot sa Facebook, Google ug ubang plataporma sa internet sa pag-istrikto sa sistema sa ilang rehistrasyon. Di moabot og binilyon ang ilang users kon gipangayoan pa og birth certificates ug mga pasaporte.

        Nga mao say hinungdan nga di mahitabong mosugot ang higanteng mga kompaniya sa telepono sa Pilipinas, ug di mahitabong mamugos ang inutil nga mga ahensiya sa gobyerno, nga kinahanglan pang magpa-rehistro ang tanang mogamit sa ilang pre-paid nga SIM cards.

                -o0o-

        Bisan sa hulga sa Senate Bill 1492 ni Villanueva nga lima ka tuig nga priso ug P5 milyones nga multa, mahimong maibanan ang mo-share sa fake news (mahimo hinuong magpabilin ang gidaghanon sa likes kay, ubos sa Cybercrime Prevention Act, di man krimen ang pag-like og kuwestiyonableng post) apan mahimo sab hinuong madugangan ang fake identities.

        Di balaod ni pagarpar lang ang makabadlong sa fake news. Mas epektibo ang pag-edukar sa kinabag-an sa katawhan. Makatabang sab kon himuong mas lisod ang pagpangilad ginamit ang bag-ong mga teknolohiya. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for June 22, 2017

Leo Lastimosa has attached the following document:

Arangkada for June 22, 2017

Snapshot of the item below:

Panghudlat sa Mindanao

        Sukad sa sinugdanan, nagkasungi ang mga sulti nilang Presidente Rodrigo Duterte ug sa kadagkoan sa Armadong Kusog mahitungod sa krisis sa Marawi City:

• Dihang nideklarar dayon si Duterte og martial law sa tibuok Mindanao pila ka oras human ni-atake ang Maute group sa pipila ka bahin sa Marawi, nipahibawo si Defense Secretary Delfin Lorenzana nga wa siya mohimo sa rekomendasyon;
• Samtang nagsubli-subli pagpasalig ang militar nga hapit na masulbad ang krisis, si Duterte nagsige og pasidaan nga ang kaguliyang mahimong mokatap ngadto sa ubang bahin sa nasud;

                -o0o-

• Sa usa ka bahin, gitataw sa militar nga ang Maute group mahimong nagpa-papel lang aron makadapit sa pagtagad sa liderato sa ISIS sa panghinaot nga makakuha og dakong suporta gikan sa langyawng mga terorista, apan sa pikas sa bahin gitunglo nang Duterte ang Maute group nga sumpay na sa tinai sa ISIS; ug
• Human gitataw sa militar nga wa pay ebidensiya nga nakasud nang ISIS sa Mindanao, si Solicitor General Jose Calida nipahibawo sa Korte Suprema nga di lang usa, di lang duha kon dili 20 na gyod ka grupo sa ISIS ang naglihok karon sa Midanao.

                -o0o-

        Samtang naningkamot ang militar pagpahiyos sa problema sa Marawi, nga way katakos ang Maute sa pagtukod og base sa ISIS didto ni sa bisan asang bahin sa Mindanao, sukwahi ang mga pangangkon ni Duterte.

        Nipasidaan siya nga duol rang Kabisay-an sa Mindanao ug mahimo ganing moabot ang Maute sa Luzon busa mahimong ideklarar ang martial law sa tibuok nasud. Dihang mingaw ang suporta nga nadawat sa posibleng pagpalapad sa martial law, nihudlat si Duterte nga mahimong moulbo ang gubat sibil sa Mindanao.

                -o0o-

        Mga eksperto sa terorismo nagduda na nga gimaniobra sa pamunoang Duterte ang pagpaburot sa problema sa Marawi. Maong inay dasonan ang mensahe sa pagpakalma sa militar, nagsige og bandilyo nga angayng lubat-lubatan ang katawhan kay nameligro sab ang ubang bahin sa nasud.

        Nisamot ang mga pagduda nga wa magsulti sa kamatuoran ang pamunoang Duterte dihang gibisto sa mga eksperto nga giapil ni Calida paglambigit sa ISIS ang mga pundok nga wa na maglihok ug ang nagkalainlaing mga ngan sa usa lang ka pundok. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for June 21, 2017

Leo Lastimosa has attached the following document:

Arangkada for June 21, 2017

Snapshot of the item below:

Pagbanhaw sa Mindanao

        Samtang nagpadayon ang pinusilay sa Marawi City, gibanhaw ang talagsaong sugyot sa pagkab-ot sa malungtarung kalinaw sa Mindanao: Inay bahinon pinaagi sa pagpalig-on sa teritoryo sa mga Muslim, nga gipanghinaot nga mas epektibo kay sa Autonomous Region in Muslim Mindanao (ARMM), nga gitakdang hiwaon gikan sa mga lalawigan nga gidominahan sa mga Kristiyanos, angayng ibalik ang karaang Mindanao kanus-a ang katawhan wa pa mabahin-bahin sa nagkalainlaing relihiyon.

        Ang sugyot giluwatan ni Atty. Leo Zaragoza, ang bag-ong napili nga nasudnong presidente sa Lubas sa Dagang Bisaya (LUDABI), nga nagbase sa Iligan City, pila ka kilometro lang gikan sa Marawi.

                -o0o-

        Matod ni Zaragoza di angayng magpalingla ang mga Muslim ug mga Kristiyanos sa duguong yugto sa kasaysayan sa Mindanao ug moisip nila nga pulos mga biktima ug busa angay nga makigbisog aron pagpanimawos sa nahiagomang inhustisya aron ikapatigbabaw ang kaangayan.

        Nipasabot si Zaragoza sa iyang mga tinun-ang Muslim ug Kristiyanos dihang nagtudlo pa sa usa ka kolehiyo sa Iligan nga ang orihinal nga mga molupyo sa Mindanao managsama og kagikan, bulok sa panit ug pinulongan. Di sila Islam. Labaw na nga di sab Kristiyanos.

                -o0o-

        Gitataw ni Zaragoza nga ang mas lawom nga pagsubay sa kasaysayan sa Mindanao mobutyag nga ang Islam, sama sa Kristiyanismo, di lumad kon dili langyaw nga mga relihiyon: Unang niabot ang Arab missionaries nga nitudlo sa taga Mindanao sa relihiyong Islam; dayon, nisunod ang mga Katsila nga misyonero nga nitudlo sa mga molupyo sa Kristiyanismo.

        Dakong baligho, segun ni Zaragoza, nga ang duha ka relihiyon nga pulos nagtudlo og gugma ug kalinaw mao na hinuoy nahimong pabilo sa way kinutoban nga pagbanaw sa dugo.

                -o0o-

        Nipasidaan si Zaragoza nga ang pagbuwag sa mga Muslim ug mga Kristiyanos mahimong mosangpot sa hingpit nga pagkabuak-buak sa Mindanao ngadto sa mga nagkalainlaing mga tribu: Maranao, Yakan, Tausog, Badjao, Sugbuanon, Bol-anon, Maguinadanao, Ilonggo, Leyteno, Waray, Bicolano, Ilocano, Pampangueno ug uban pa.

        Matod niya ang magdumili pagkat-on sa mga pagtulon-an sa kasaysayan mopasamot lang sa tinuod nga katalagman sa Mindanao: Ang wa kinahanglana nga pagkabuak-buak, nga nisangpot sa way kapuslanan nga panag-away ug, nga kon di matul-id, moduhig pagtunglo sa umaabot nga kaliwatan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.