Arangkada for August 1, 2017

Leo Lastimosa has attached the following document:

Arangkada for August 1, 2017

Snapshot of the item below:

Huwaman si Espenido

        Dihang natangtang si Chief Inspector Jovie Espenido pagka hepe sa kapolisan sa Albuera, Leyte bisan sa talagsaong kalamaposan sa pagbungkag sa pamunoan sa mga Espinosa (nga gipangulohan ni anhing Mayor Rolando Espinosa Sr. ug Rolando "Kerwin" Espinosa Jr, nga gipasanginlang drug lord sa Eastern Visayas), nitumaw ang mga pangagpas nga gisilotan siya sa pagpangahas pagbangga sa mga puwersa nga mas duol sa luwag:

• Sama ni Ormoc City Mayor Richard Gomez nga iyang gilambigit sa sindikato sa mga Espinosa; ug
• Kanhi CIDG 8 Chief Marvin Marcos nga iyang gipasanginlang nangilkil sa mga Espinosa.

                -o0o-

        Way makalalis sa kasuod ni Gomez sa Malakanyang tungod sa iyang hingpit nga suporta sa kandidatura ni Presidente Rodrigo Duterte. Nalutsan sab og preventive suspension order si Espenido tungod sa kasong kriminal nga gipasaka ni Gomez.

        Labawng di malalis ang hingpit nga pag-unong ni Duterte nilang Marcos ug kaubanan. Human na-downgrade ang ilang kasong murder ngadto sa homicide, atubangan sa kusganong pagsaway sa mga senador ug sa human rights groups, gimando ni Duterte ug gipatuman ni PNP Director General Bato dela Rosa ang pagbalik nila sa aktibong serbisyo.

                -o0o-

        Apan sa bangis nga engkuwentro tali sa kampo ni Ozamis City Mayor Reynaldo Parojinog ug sa kapolisan nga gipangulohan ni Espenido ug sa Criminal Investigation and Detection Group (CIDG) niadtong Dominggo sa kadlawon, naklaro nga wa diay siloti si Espenido.

        May mas dinalian diayng hinungdan ang iyang pagkabalhin sa giilang teritoryo sa Kuratong Baleleng. Gani, gidalidali paglibkas sa National Police Commission (NAPOLCOM) ang pagkasuspenso ni Espenido pila ka adlaw sa wa pa ang duguong operasyon.

                -o0o-

        Gihulagway ni kanhi Capitol Security Consultant Loy Madrigal si Espenido nga kas kaayo og mayor. Human sa Albuera ug Ozamis, nakaangkon og sukaranan ang mga pangagpas nga ang sunod nga balhinan ni Espenido mahiagom og susamang mga panghitabo.

        Timaan sa nalab-as nga popularidad ni Espenido, nga lumad nga taga Barangay San Antonio sa Dakbayan sa Sugbo, mao ang nisibaw nga mga awhag sa mga molupyo sa mga dakbayan ug kalungsoran nga naproblema sab sa drugas nga huwaman nila si Espenido. Apil sa gisugyot nga sunod niyang destinasyon sa Sugbo: Daanbantayan, San Fernando ug Carcar City. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for July 31, 2017

Leo Lastimosa has attached the following document:

Arangkada for July 31, 2017

Snapshot of the item below:

Way mangahas pagbaraw

        Gawas nga kusganong gisupak sa mga polis ang awhag sa presidente nga di hatagan sa tanang pagmatngon ang pagduma sa ilang dinakpan ug mas maayo gani nga gamitan og puwersa, gisaway sab nila ang ka-iresponsable sa pamahayag sa presidente nga makahatag og sayop nga mensahe ngadto sa pipila ka polis ug apil na sa mga sibilyan.

        Ang isog nga baruganan wa hupti sa mga polis sa Pilipinas ug ang ilang gibuyag di si Presidente Rodrigo Duterte. Ang kapolisan sa Estados Unidos maoy isog nga nisaway si Presidente Donald Trump.

                -o0o-

        Nga igo lang niawhag nga di tapin-an sa mga polis ang mga ulo sa ilang dinakpan nga bag-o lang nakapatay samtang pasakyon sa ilang sakyanan. Igo lang nipahibawo si Trump nga di siya mosupak kon ipangsalibay sa mga polis sud sa ilang mga sakyanan ang bagis nilang mga dinakpan.

        Matod sa mga polis sa New York, Los Angeles, Boston ug ubang dagkong dakbayan sa Estados Unidos nakiglambigit sila sa nagkalainlaing sektor alang sa mas tawhanon ug makiangayon nga pag-atiman sa mga dinakpan nga giilang yawe sa mas epektibong kampanya batok sa kriminalidad.

                -o0o-

        Di tang kapaabot ni PNP Director General Bato dela Rosa ug mga sakop nga mohupot og susamang isog nga baruganan batok ni Presidente Duterte. May pipila ka opisyal nga nangisog sa pagbisto sa laktod nga pagpatuman sa mga balaod apan wa mangahas pagpaila ni pagpakita sa ilang mga nawong.

        Way polis dinhi sa ato nga mangahas pagbuyag ni pagsaway ni Presidente Duterte sa iyang gibalikbalik nga awhag nga patyon ang mga durugista kay naprito na sa shabu ang ilang mga utok ug wa na silay kapuslanan.

                -o0o-

        Di lang mga polis ang nitak-om. Ang kinabag-an sa katawhan utrong nagpakahilom. May nisunod gani sa sipsip nga mga itoy sa administrasyon nga niabiba ug nikatawa sa bisan unsang isulti sa presidente, apil nang pagawal sa daghan niyang babaye ug mga bugalbugal sa pagpanlugos.

        Nangiyugpos sang atong katiguwangan sa unang dekada sa diktadura ni Ferdinand Marcos. Nagsugod sila og tiyabaw dihang uwahi nang tanan: Nakawat nang nasudnong katigayonan, napatay na si Ninoy Aquino ug nahipos nang tanang kaatbang. Hinaot nga di ta sama katalawan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for July 30, 2017

Leo Lastimosa has attached the following document:

Arangkada for July 30, 2017

Snapshot of the item below:

Pagpapas sa smart phones

        Karon nga ang smart phone nahimong mahinungdanong kabahin sa atong inadlawng kinabuhi, nga kon mahibilin o mawagtang morang mawad-an og kabahin sa lawas, nakabuylo na sang mga pagtuon sa mga teknolohiya nga mohimo sa smart phones nga wa na kinahanglana.

        Di hinuon mawagtang ang smart phones. Ang bag-ong mga teknolohiya igo lang mopahiyos sa nagkadako niyang papel sa atong panikay-sikay matag adlaw. Magpabilin ang smart phones apan kapuslan na nga di kinahanglang hulbuton gikan sa atong mga bolsa ug ubang mga sudlanan.

                -o0o-

        Pasiunang mga teknolohiya nga nihimong mas sayon sa paggamit sa smart phones mao ang paggamit og voice assistants. Pinaagi sa Siri sa Apple, Google Assistant, Alexa sa Amazon ug Cortana sa Windows makapangutana ka og kasayuran, makatawag, maka-text ug makaabli og apps pinaagi lang sa tingog.

        Apan limitado ang imong mahimo. Kinahanglan nga hinumdoman ang tanang voice commands, pipila ra ka butang ang mahimo, mubo rang mensahe ang mapada ug mapugos pagbalikbalik og sulti kon di dayon makasabot ang voice assistants unsa gyod ang tinuod nimo nga ipasabot o gikinahanglan.

                -o0o-

        Ari mosud ang Augmented Reality (AR). Nga maoy sunod nga natad sa kulba-hinam nga lumba sa higanteng mga kompaniya sa teknolohiya, sama sa Google, Apple, Microsoft ug Facebook. Ang AR mao ang imahe sa computer nga mosapaw sa tinuod nimong palibot.

        Ang Pokemon mao labing popular nga duwa nga naggamit sa AR. Kon hingpit nang mapatuman, ang AR mohatag nimo og kahigayonan pag-abli og apps, pag-post sa Facebook, pagpada og email, pag-chat ug pag-text ginamit ang imahe sa keyboard ug apps nga molutaw sa imong atubangan.

                -o0o-

        Labing sayon nga kahimanan sa AR maong pagsul-ob og antipara. Nga hasol para sa mga wa pay problema sa mata apan mas sayon kay sa pagsul-ob og may samin nga maskara. Maong gibanhaw ang Google Glass nga gihulagway nga abante ra sa iyang panahon.

        Labing sayon alang nato maong pagpalihok sa atong mga tudlo pagsugo sa AR ug smart phones. Padayon pa hinuong mga paningkamot pagpatuman ini. Nia nang joystick ug susamang kahimanan apan mas lisod gamiton. Ang maka-una og hingpit sa AR maoy sunod nga modominar sa kalibotan human sa smart phones. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for July 29, 2017

Leo Lastimosa has attached the following document:

Arangkada for July 29, 2017

Snapshot of the item below:

Langay ug makalibog

        Sakto si Senate President Ralph Recto nga way kapuslanan kay lunlon langay-langay lang ang lagda nga kinahanglang moagi ug aprobahan una sa kadagkoan sa National Disaster Risk Reduction and Management Council (NDRRMC) sa Kampo Aguinaldo ang weather advisories sa di pa ma-text blast sa mga kompaniya sa telepono ngadto sa ilang subscribers sa mga dapit nga maagian sa mga bagyo ug ubang katalagman.

        Mao diay nga kasagaran sa text messages nga nagpasidaan sa nangagi nga mga bagyo sa Sugbo ug silingang mga lalawigan atong nadawat dihang gumagawas nang mga bagyo.

                -o0o-

        Tukma ang paniid ni Recto nga way ikapuno ang NDRRMC sa forecasts sa Philippine Atmospheric, Geophysical and Astronomical Services Administration (PAGASA). Labaw nang wa silay katakos sa pagkurihir sa kasayuran gikan sa tinuod nga mga eksperto sa kahimtang sa panahon.

        Bugtong nahimo sa binuang nga lagda mao ang paglangay sa dinalian nga kasayuran nga angay gyod untang mapadangat dayon sa mobile homes sa mga molupyo aron nga makapangandam dayon sa ilang mga pinuy-anan, makahipos dayon sa ilang kabtangan ug kahayopan, o maka-bakwet dayon sa mas luwas nga mga dapit.

                -o0o-

        Ang nakaplagan ni Recto nisunod sa awhag ni Senador Grace Poe nga tukuron ang buwag nga departamento nga moduma sa mga pangandam sa mga katalagman, molikay sa mga molupyo gikan sa kadaot ug motabang sa mga biktima.

        Mahimo hinuong di kinahanglan nga palingkuron sa gabinete ang tagduma sa NDRRMC aron nga mahimong mas epektibo. Mahimong ang gikinahanglan mao rang pagtarung sa mga lagda aron nga mas paspas nga makapangandam ug makatubag sa mga emerhensiya.

                -o0o-

        Samtang sublion nilang mga lagda sa NDRRMC, mangahas mi og saling-it sa mosunod nga mga sugyot:

• Di angayng maghuwat og bagyo una mag-text blast kay usahay mas dako ang kadaot ug mas daghan ang makalas bisan low pressure areas (LPAs) ray makit-an sa PAGASA o pat-ak pat-ak nga bunok sa uwan ray ilang mamatikdan; ug
• Angayng magtinabangay ang mga eksperto sa PAGASA ug telcos pag-umol sa labing sayon nga sabton nga text messages nga molaktaw sa teknikal nga mga termino apan mohatag sa mga molupyo sa labing tukma nga sukod ug epekto sa gikusgon sa hangin ug gidaghanon sa uwan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for July 28, 2017

Leo Lastimosa has attached the following document:

Arangkada for July 28, 2017

Snapshot of the item below:

Hustisya di alang sa kabos

        Dihang nauli ang iyang 13 anyos nga anak nga nagkadugo ang bilahan ug nangangkong gilugos og abogado nga magsisibya pila ka oras human sa insidente, gida sa amahan ang tibuok niyang pamilya--iyang asawa ug tulo ka anak apil nang ikaduha nga maoy biktima--ngadto sa Pink Room sa Vicente Sotto Memorial Medical Center (VSMMC).

        Apan kay adlaw mang Sabado, way doktor sa pink room. Gipabalik sila pagka Lunes na. Nasusi sa mga doktor ang kahimtang sa bata ug natino nga napanamastamasan siya tulo ka adlaw na human sa insidente.

                -o0o-

        Ang labing masulub-on nga hulagway sa kasinatian sa pamilya sa bata, nga bisan sa mga hudlat ug mga pasidaan nihukom sa pagbarug pagpangita og hustisya, mao nga ang ilang kakabos ug kagamay maoy labing dakong babag sa ilang pakigbisog.

        Pasiunang mga institusyon nga ilang giduol pulos nagpakita nga wa mag-apura ang sistema sa hustisya sa pagtabang nila. Human sila gipabalik-balik sa Pink Room sa VSMMC, gipabalik-balik sab sila sa Parian Police Station nga ubos sa Cebu City Police Office (CCPO) ug labaw pa nga gipabalik-balik sa rehiyonal nga buhatan sa National Bureau of Investigation (NBI).

                -o0o-

        Ang kakuwang sa mga doktor ug mga kawani sa Pink Room wa hinuon mosangpot sa kakuwang og pagpakabana. Gitunol dayon nila ngadto sa presinto sa Parian ang biktima ug ang medical certificate nga nahilabtan siya.

        Nasamotan ang kalbaryo sa pamilya sa biktima sa pag-abot nila sa presinto sa Parian. Inay andamon dayon ang kasong pagpanlugos, niinsistir ang mga polis pagpangita og dugang ebidensiya. Ang kagaw sa paglangay-langay nanakod sa NBI.

                -o0o-

        Nangita pang mga polis og CCTV pagsusi tinuod bang sulti sa bata nga gilugos siya sud sa sakyanan sa abogadong magsisibya. Samtang gi-drug test sa NBI ang amahan sa bata ug gisukit-sukit ang iyang mga kauban sa klase ug mga magtutudlo.

        Namasin bang mga polis nga nalilian sa CCTV ang pagpanlugos? Nagpaabot bang NBI nga mapapas ang dokumento sa pagpanlugos kon adik ang amahan (negatibo siya sa drug test) ug kon mapamatud-an nga wa siya ma-enrol sa nagpadayon nga school year? O naglubay-lubay lang kay trisikad driver ang amahan ug labandera ang inahan sa biktima samtang abogadong magsisibya ang gipasanginlan? [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for July 27, 2017

Leo Lastimosa has attached the following document:

Arangkada for July 27, 2017

Snapshot of the item below:

Pagpatuyang sa gibati

        Kon patuyangan silang Presidente Rodrigo Duterte ug iyang mga sinaligan, mangligdas sa kadalanan ang tanan nilang gipasanginlan nga mga kriminal ug mga durugista, mapapas nang Court of Appeals (CA) ug mahukasan sa ilang lisensiya pagka manlalaban ang mga mahistrado, makandadohan ang Kongreso ug mausab ang 1987 Constitution.

        Di kana ra. Kon way makapugong nila, si Duterte ang mouna paglugos sa langyawng misyonera nga sama kaguwapa sa artista ug makapanlugos ang mga sundawo ug mga polis og hangtod katulo. Ug mahimo rang ibasura ang kaminyuon kon di na malipayon ang magtiayon.

                -o0o-

        Labing uwahing puntirya sa kasuko ni Duterte mao ang Commission on Human Rights (CHR). Nga iyang giisip nga maoy labing dakong babag sa iyang kampanya batok sa ilegal nga drugas. Ambot may nakahunghong ba niya nga ang CHR di angayng daginuton.

        Tungod sa talagsaon niyang popularidad, ang CHR inutil sa ilang gimbuhaton. Ang mga imbestigasyon sa CHR sa mga pasangil sa extrajudicial killings sa Sugbo ug ubang bahin sa nasud wa kaugpo. Kay pulos nahadlok ang mga saksi ug mga tagtungod.

                -o0o-

        Apan ang CHR di diay mahimong papason tungod lang sa sulti ni Duterte. Kay segun sa kadagkoan sa ahensiya may mas kuti diay nga panginahanglan, ang tukma nga kausaban sa batakang balaod.

        Wa hinuoy arang ni Duterte. Ang iyang hingpit nga pagkontrolar sa nagkalainlaing mga institusyon sa gobyerno mahimong mopasayon sa pag-usab sa sistema sa gobyerno ug pagpapas sa tanang babag sa pagpabarug og lab-as nga diktadura.

                -o0o-

        Si Duterte wa matawo gahapon. Maong atubangan sa lapad nga suporta sa kinabag-an sa katawhan sa bisan unsa nga kuwestiyonable niyang mga sulti ug mga lakang sa kapin sa tuig na niyang pamunoan, masuk-anong gikutikuti sa pagsalikway ang matag usa sa mga pagsaway batok sa iyang pamunoan.

        Kay ang nanggungis nang bagis sa Davao maoy labing nasuhito nga ang iyang kahumot di dumalayon. Nga ang lehitimong mga pagsukwahi sa iyang mga pagpatuyang motuhop ra sa kabuot ug panghunahuna sa katawhan. Siya ang labing nahibawo nga way aso nga makumkom. Nga sa di madugay mabantang na sa katawhan ang tinuod niyang dagway. Nga gawas nga di nila magustohan mahimo sang makaaghat nila pagpalayas niya sa katungdanan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for July 26, 2017

Leo Lastimosa has attached the following document:

Arangkada for July 26, 2017

Snapshot of the item below:

Mga hagba ni Duterte

        Human sa kapin sa tuig nga pagduma sa Malakanyang, makapangangkon na si Presidente Rodrigo Duterte og kalamposan sa pipila sa iyang gisaad sa niaging kampanya. Apil sa iyang ikapasigarbo mao ang pagdugang sa pension sa retiradong mga sakop sa Social Security System (SSS) ug pagpagawas og executive order sa Freedom of Information (FOI).

        Apan di makapatuyang og warawara si Duterte kay katunga ra sa gipasalig niyang P2,000 nga uminto sa pension sa SSS ug inay mapaspas nisamot hinuon kalangay ang pagkuha og kasayuran sa nagkalainlaing ahensiya tungod sa iyang FOI.

                -o0o-

        Ang labing dakong kapakyasan ni Duterte mao ang iyang gisaad nga malungtarung kalinaw ug kalamboan sa Mindanao. Bisan sa iyang pasalig nga hingpit nang pulbuson, ang Abu Sayyaf wa lang magpabilin sa Sulu malampuson pa gyong nakaabot sa Bohol.

        Bisan sa pasalig nga mas suhito siya sa Mindanao ug busa mas takos nga mobaraw sa bisan unsang pagsuway pagsud sa mga terorista, wa lang masudli nasakmit pa gyod sa ISIS ug Maute Group ang pipila ka bahin sa Marawi City ug nisud nang gubat sa ikatulong buwan.

                -o0o-

        Labing dako niyang kauwawan mao ang kapakyas sa pagtuman sa saad pagsulbad sa kriminalidad ug ilegal nga drugas sud lang sa tulo ngadto sa unom ka buwan. Human nahilambigit ang mga polis sa pagpatay sa langyawng negosyante sud sa Kampo Crame, gisuspenso ang gubat aron malimpiyohan una ang kapolisan gikan sa mga badlungon.

        Way nahitabo nga bisan unsang kausaban gawas sa paghimo sa ngan nga Oplan Tokhang Reloaded, gilusad pagbalik sa kapolisan ang gubat sa drugas. Bisan sa pangangkon nga naibanan na, mas daghan pa hinuong drugas ang ilang nasakmit.

                -o0o-

        Labing sipa nga pagkahagba sa pamunoang Duterte mao ang kapakyas pagkab-ot sa malungtarung kalinaw uban sa mga rebeldeng komunista. Human nipasalig nga suod niyang mga higala silang Joma Sison ug ubang mga haligit sa Communist Party of the Philippines (CPP), kaduha na gikanselar ang sabutsabot ug kaduha na si Duterte nideklarar og gubat.

        Napamatud-an sa pila na ka hugna nga sabutsabot nga si Duterte kutob ra sa pag-apura og ceasefire. Apan wa mohimo og bisan unsang pagsuway pagtugkad sa gamot nga mga hinungdan sa rebolusyon. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for July 25, 2017

Leo Lastimosa has attached the following document:

Arangkada for July 25, 2017

Snapshot of the item below:

Pagsaka-kanaog sa lana

        Nanghimalingka na sab ang mga motorista sa ilang pagpatubil karong buntag tungod sa kadako sa uminto sa mga presyo sa gasolina, krudo ug kerosene. Nakaangkon na sab og sukaranan ang ilang pasangil nga ang bisan unsang gamay ug panagsa nga laslas mapapas dayon sa mas dagko ug mas subsob nga mga uminto.

        Ambot makaiban o makapasamot ba sa ilang sapot ang katin-awan sa uminto: Nagpaabot ang industriya sa lana nga magkauyon ang kadagkoan sa OPEC ug non-OPEC countries nga lugwayan ang laslas sa ilang produksiyon hangtod sa Marso sunod tuig.

                -o0o-

        Ang tigom gahapon sa St. Petersburg sa Russia sa Joint Ministerial Monitoring Committee (JMMC), nga gitukod sa OPEC ug non-OPEC contries sa niaging tuig, gipanghinaot nga makapalig-on sa kalibotanong presyo sa lana nga nitibugsok na og 12% sa niaging 12 ka buwan.

        Gawas sa gipaabot nga pasalig sa Saudi Arabia ug Russia pagpadako pa sa laslas sa ilang produksiyon sa lana, gilaoman sab nga makumbinser ang Libya ug Nigeria, nga nagpatuyang og pasaka sa ilang produksiyon sa nangaging mga buwan, sa pag-apil na sa kauyonan.

                -o0o-

        Apan may duha ka dagkong babag sa determinadong paningkamot sa OPEC ug non-OPEC countries pagpaburot pagbalik sa presyo sa lana, nga pulos di makontrolar sa mas dakong cartel nga gipangulohan sa Saudi Arabia ug Russia:

• Nagpabilin nga ubos ang kalibotanong demanda sa lana tungod sa kaluya sa mga ekonomiya sa China, Estados Unidos, India ug ubang higanteng mga konsumidor; ug
• Gipaabot nga mosamot pa pagsaka ang produksiyon sa shale oil sa Estados Unidos sa sunod tuig.

                -o0o-

        Ang pangagpas sa mga eksperto mao nga bisan padayon pa nga magkasabot ang Saudi ug ang Russia magpabiling ubos ang presyo sa lana, nga ang labing taas nga maabtan $50 matag baril na lang, wa rang katunga sa gitinguha untang pagbalil og sulbong sa presyo ngadto sa kapin sa $100 matag baril duha ka tuig ang nilabay.

        Apan kon makumbinser nang Saudi ug Russia nga way kapuslanan ang artipisyal nga paglaslas sa ilang produksiyon sa lana ug makig-indig na hinuon sa mga Amerikanhon pagpabaha sa lana sa merkado sa kalibotan, mahimong matinuod ang mga pangagpas nga motugsad ang presyo sa labing ubos niyang ang-ang. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for July 24, 2017

Leo Lastimosa has attached the following document:

Arangkada for July 24, 2017

Snapshot of the item below:

LTFRB ang sad-an

        Ngiob ang palibot ug nagtutaligsik ang palibot. Segun sa PAGASA tungod ni sa pagbalik na sa Habagat sa Kabisay-an nga gisamotan sa low pressure area duol sa Surigao del Sur. Kinahanglan ra ba ming manglakaw sa akong asawa.

Napu ka gutlo ibabaw sa nasudnong highway ang among pinuy-anan. Kon mag-taxi, may tulo mi ka kapilian: Pagpanawag sa landline sa taxi nga kasagaran mobalibad nga way taxi sa duol; pagpamalihug og drayber sa habal-habal pagpara ug pag-giya sa taxi padung sa amo; ug paglugsong aron pagpangunay og atang og taxi sa highway.

                -o0o-

        Mao nga, ug ato-ato ra ni, naghunahuna gihapon ko nga mosuway og gamit sa apps sa akong telepono sa Uber o Grab. Bisan sa subli-subli nga pasidaan sa kadagkoan sa LTFRB nga kolorum ang kasagaran sa mga sakyanan nga gipakatap sa Uber ug Grab.

        Wa kong kahibawo, ug way planong magsusi, may pagtugot ba sa LTFRB ang among makuhang sakyanan. Wa kong kahibawo, ug way planong mangutana, may insurance bang matsambahan nga sakyanan. Hiktin rang among panginahanglan: Makaabot sa among padulngan sa tukmang panahon sa labing sayon nga paagi.

                -o0o-

        Sa nangaging mga semana akong napanid-an nga di na balibaran matag book nako og Uber. Lahi sa nangaging mga buwan nga sige lang "no cars available." Nagpasabot bang mas daghan nang sakop sa Uber tungod sa mas luag nilang mga lagda sa pagpanawat?

        Apan karong nangisog nang LTFRB, mangahas pa kaha og pamasahero ang Uber ug Grab? Human sa pagluwat og ultimatum nga dakpon nang tanang kolorum nilang mga sakyanan sugod karong Miyerkules, Hulyo 26, mapugos ba sa pagpanghipos?

                -o0o-

        Samtang nagsuwat ini, gi-ablihan ang akong apps sa Uber ug GrabCar. Niingon ang Uber nga P201 ang plitehan paingon sa among destinasyon. Samtang ang GrabCar nipahibawo nga P273 ang plitehan (mas gamay na kay sa binuang nila sa una nga patongan og P400 kon bukid ang padulngan).

        Makalapas ba mi sa balaod sa pag-risgo nga kolorum ang masakyan? Mas maayong pangutana: Kon epektibo pang napatuman sa LTFRB ang mga lagda sa hapsay, luwas ug makiangayon nga publikong transportasyon, mangita pa kahang mga pasahero og alternatibo sa mga sakyanan nga ilang gisininaan og prangkisa? [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for July 23, 2017

Leo Lastimosa has attached the following document:

Arangkada for July 23, 2017

Snapshot of the item below:

Way arang ni Duterte

        Samtang nagsuwat ko ini, nagpadayon ang hinugpong nga tigom sa mga senador ug mga kongresista pagtuki sa awhag ni Presidente Rodrigo Duterte paglugway sa martial law sa Mindanao hangtod sa kataposan ning tuiga. Sama sa gipaabot, niulbo dayon ang lalis sa mga lagda unsaon pagpahigayon ang husay.

        Akong naabtan si Kongresista Edcel Lagman nga nilampos pagkumbinser sa liderato sa duha ka bay balaoranan nga hatagan siya og higayon pagpasabot sa iyang mosyon nga pabarugon ang mga kongresista pagpasabot sa ilang baruganan pabor o supak sa paglugway sa martial law.

-o0o-

Apan nalubong dayon ang sugyot ni Lagman sa makabungog nga mayoriya sa mga kongresista. Nga di lang ganahang modason sa presidente apan gusto sab nga mahuman dayon ang hinugpong nga sesyon. Kay gawas nga nakaputol sa ilang bakasyon nakapamubo pa gyod sa ilang pangandam sa State of the Nation Address (SONA) ni Duterte.

Nga mao nay gipaabot nga sangpotanan bisan sa wa pa mapahigayon ang hinugpong nga sesyon. Maisip na ganing kadaogan sa mga kaatbang sa administrasyon ang pagsugot sa mga alyado sa administrasyon sa hinugpong nga sesyon. Nga kusganon nilang gihikaw atol sa pagtuki sa orihinal nga proklamasyon sa martial law niadtong Mayo 23.

        -o0o-

Bisan ang awhag sa pipila ka senador nga buwagon ang botasyon sa duha ka bay balaoranan nameligro nga malampornas. Kay samang di malalis ang mayoriya sa administrasyon sa Senado ug sa House of Representatives di sab ikalimod ang kataas sa popularidad ni Duterte ug sa iyang pagdeklarar sa martial law ug pagsuspenso sa pribilihiyo sa writ sa habeas corpus sa Mindanao.

        Gani, mahimo ra gyong palapdan nilang martial law sa tibuok Pilipinas. Ug sundon ang awhag ni House Speaker Pantaleon Alvarez nga lugwayan hangtod sa 2022.

                -o0o-

        Ang talagsaong popularidad ni Duterte ug ang kadako sa tentasyon sa pag-abuso ini makapahinumdom nato sa pagsulbong sab sa popularidad ni US President Franklin Delano Roosevelt pag-asumir niya sa White House sa 1933.

        Gipaluyohan sa mga Amerikanhon bisan unsang radikal nga kausaban nga iyang gipasiugdahan. Nga ang bantogang magsisibya ug maglilindog nga si Will Rogers nakaingon: "Bisan sunugon pa niyang Capitol, mamakpak ang mga tawo ug mopasidungog niya sa pagsugod sa kayo." [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.