Arangkada for June 17, 2017

Leo Lastimosa has attached the following document:

Arangkada for June 17, 2017

Snapshot of the item below:

Libreng bakuna sa dengue

        Lahi ang libreng pagpamakuna batok sa dengue dinhi sa Sugbo sa tulo ka rehiyon sa Luzon nga mas unang nakapahimus sa proyekto sukad sa niaging tuig. Samtang gihimo ang pagpamakuna sa mga eskuylahan sa Metro Manila, Central Luzon ug Calabarzon, sa mga barangay ipahigayon ang kalihokan sa Sugbo.

        Niangkon si Health Secretary Paulyn Ubial nga nibalibad ang Departamento sa Edukasyon (DepEd) pagtabang sa Department of Health (DoH) pagpatuman sa programa tungod sa kakuwang sa panahon sa pagpangandam, apil na sa pagbansay-bansay sa pagpamakuna. Matod ni Ubial nakasabot siya sa panagana sa DepEd.

                -o0o-

        Atol sa Arangkada sa DYAB Abante Pa, Bisaya!, gipasabot ni Dr. Shelbay Blanco, ang pangu sa Regional Epidemiology Surveilance Unit (RESU) sa DOH 7, nga:

• Gawas sa Cebu City, Mandaue City ug Lapu-Lapu City nga maoy nakauna pagpamakuna, ipatuman sab ang programa sa tanang dakbayan ug kalungsoran sa Sugbo; apan
• Tungod tingali sa mas ubos nilang mga kaso sa dengue, di maapil sa libreng bakuna batok sa dengue ang ubang bahin sa Central Visayas apil nang Bohol, Siquijor ug Negros Oriental.

                -o0o-

        Matod ni Ubial ang moduma sa pagpamakuna mao ang barangay health centers diin tapukon ang mga bata kuyog sa ilang mga ginikanan. Nipasabot si Blanco nga dakong bentaha nga maapil ang mga bata nga wa magtungha ug ang mga tinun-an sa pribadong mga eskuylahan.

        Gitataw ni Blanco nga salig sila sa katakos sa mga dakbayan ug kalungsoran pagpahibawo sa mga hingtungdan aron mabakunahan ang tanang bata nga 9 ngadto sa 14 anyos, nga maoy kasagarang maigo sa dengue, unya o sa di pang Hulyo 15 ning tuiga.

                -o0o-

        Matod ni Blanco kapin sa 1.8 milyones ka bakuna ang gitagana alang sa Sugbo sa tulo ka hugna sa pagpamakuna nga may gintang nga unom ka buwan: Unang hugna karon, ikaduhang hugna sa Disyembre ug ikatulong hugna sa Hunyo sunod tuig.

        Niangkon si Ubial nga kabahin sa mga bakuna sa Sugbo ang 500,000 ka bakunang wa magamit sa Luzon. Labing daghan sa mga batang makapahimus gikan sa Cebu City (93,652), Lapu-Lapu (41,427) ug Mandaue (36,812). Ang tulo ka dakbayan mao say labing daghan og kaso sa dengue sa rehiyon. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.