Arangkada for September 12, 2017

Leo Lastimosa has attached the following document:

Arangkada for September 12, 2017

Snapshot of the item below:

Atik sa taga Davao

        Human pasanginli sa pangurakot ug pahimus sa katungdanan, apil na sa pagpanudlo og consultants nga nagdawat og suholan nga tag-P200,000 ang buwan, ug sa paghulga ni Presidente Rodrigo Duterte pagpapas sa Sugar Regulatory Administration (SRA), ni-resign si SRA Administrator Anna Rosario Paner.

        Sa pikas nga bahin, bisan gipasanginlan nga nikuha og 20% nga komisyon sa mga proyekto sa mga kongresista ug bisan niawhag si House Speaker Pantaleon Alvarez pagpapas sa Road Board, ang Sugbuanong Executive Director sa ahensiya nga si Chito Clavano wa mokanaog sa katungdanan ug wa gani magtagad pagtubag bisan ek na lang.

                -o0o-

        Si Paner tinudlo ni Presidente Duterte. Busa ang bisan unsang kahiwian nga gipasangil batok sa iyang pamunoan nakapalasaw sa kusganon nga pasalig sa presidente nga hunungon niya ang tanang matang sa pangurakot.

        Si Paner di kasarangan nga negosyante nga napunitan ni Duterte sa Davao. Siya ang kanhi tagduma sa higanteng Victorias Milling Co. Inc. (VMC). Nga gipanag-iya sa labing dagkong negosyante sa nasud nga silang Lucio Tan ug Manuel Pangilinan pinaagi sa First Agri Holdings Corp. nga ubos sa payong sa First Pacific Co. Ltd.

                -o0o-

        Mas sikit hinuon sa luwag si Clavano nga tinudlo sab ni Duterte. Kauban niyang tag-iya sa Tinder Box, usa sa labing luho nga kan-anan ug imnanan sa Sugbo, si Sean Dino nga paryente ni Presidential Assistant Michael Dino. Paryente sab niya si Michael Clavano, sakop sa Board of Directors sa Mactan Cebu International Airport Authority (MCIAA).

        Kinakusgan hinuong alas ni Clavano mao ang iyang koneksiyon sa Davao. Gipasanginlan siya ni Senador Antonio Trillanes IV nga usa sa labing sinaligan nga gaway nilang Davao City Vice Mayor Paolo Duterte ug Atty. Mans Carpio.

                -o0o-

        Si Clavano usa sab sa gipasanginlan nga naghikay sa panagtagbo nilang Presidente Duterte ug sa gipasanginlan nga drug lord nga si Peter Lim sa Davao uban sa tabang ni Presidentail Aide Bong Go.

        Daghan hinuong nahibung nganong isog si Alvarez nga niawhag pagpapas sa Road Board. Nga kauban man silang Clavano nga mga sinumbong sa kasong plunder batok sa Piatco tungod sa NAIA III niadtong tuig 2000. Niabot na bang adlaw sa panudya ni Clavano? O atik ra sa mga taga Davao? [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.