Lipat sa P6.4B nga shabu
Sa di pa ta malipat nagsanga-sanga nang mga kontrobersiya, angay nga pahinumdoman ang atong kaugalingon nga ang sentro sa eskandalo nga nakatay-og sa Bureau of Customs (BOC) ug nakaduhig sa pipila ka sakop sa pamilya ni Presidente Rodrigo Duterte mao ang paglusot sa BOC sa 604 ka kilong shabu, nga gibanabanang mobalor og P6.4 bilyones, gikan sa China.
Human nangligdas ang kapin sa 10,000 ka patayng lawas sa kapin na sa tuig nga gubat sa drugas, nga ang kasagaran gipasanginlan nga namaligya o nanuyop og pudyot nga shabu, kahibudngan ang kamingaw sa mga opisyal sa gobyerno ning higanteng kontrabando.
-o0o-
Makapahibung tinuod nga samtang hapit matag adlaw ang pagpadayag sa kasilag sa mga durugista, pagpasidaan nila og kamatayon kon di mohunong sa ilegal nilang kalihokan ug pagtunglo nga wa na silay kapuslanan sa katilingban kon di mobiya sa ilang bisyo, way bisan gamay nga ek batok sa mga utok sa pagpayuhot sa nagbuntaog nga shabu.
Way balikas nga naluwatan batok sa kadagkoan sa BOC nga nalutsan. Way hudlat nga gibuhian batok sa mga gilambigit sa kontrabando. Abunda hinuon ang pagdupa sa mga suod sa presidente nga naduhig sa nangalisbong transaksiyon.
-o0o-
Ang mosunod nga gilambigit sa kontrabando pulos nanghimakak og kasayuran nga shabu ang sud sa container nga gipakaingon nilang gikargahan og mga sangkap sa kusina:
Si Richard Tan, tag-iya sa Hongfei Logistics nga nagpada sa kargamento gikan sa China ug sa bodega sa Valenzuela City nga gitugpahan sa shabu; si Kenneth Dong, nga gipasahan ni Tan sa listahan sa kargamento ug nikontrata sa fixer nga; si Mark Taguba, nga maoy nangita og consignee; si Teejay Marcellana, broker nga niangkon sa shipment; si Eirene Mae Tatad sa EMT Trading nga maoy nibayad sa buhis; ug si Fidel Anoche Dee, nga maoy sunod nga destinasyon sa kontrabando.
-o0o-
Inay palawoman pang pagsusi sa kontrabando, ang mga kongresista nangugat pagpataktak ni kanhi Customs Commissioner Nicanor Faeldon ug pagpapas sa BOC aron pulihan og bag-ong ahensiya; ug ang mga senador nagkinihaay sa Ethics Committee.
Nganong wa na may nitutok sa kinadak-ang eskandalo? Nahadlok bang may mga nahilambigit nga mas dagko ug mas duol sa luwag? [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment