Arangkada for September 21, 2017

Leo Lastimosa has attached the following document:

Arangkada for September 21, 2017

Snapshot of the item below:

P672 milyones nga sensiyo

        Samtang nangandam nang Land Transportation Franchising and Regulatory Board (LTFRB) sa pagtuki sunod semana sa mga petisyon sa transport groups sa Sugbo ug sa kaulohan pagpasaka sa minimum nga plitehan sa mga jeep pamasahero, maayo nga sublion nato pagtuki ang dakong inhustisya nga nahiagoman sa mga pasahero nga wa masuklii og 50 sentabos matag hatag nila og plite.

        Tungod ni sa pataka sa LTFRB sa pagtakda ug sa pagpangiyugpos sa pagpatuman sa bungkig nga minimum nga plitehan. Ug sa pagsakay sa mga drayber ug operators sa kakuwang sa mga sensiyo.

                -o0o-

        Aron mahulagway ang kadako sa inhustisya, tuguting among gamiton ang mga numero sa LTFRB: Dunay 200,000 ka jeep pamasahero sa tibuok nasud nga nagpasakay og 3.2 milyones ka pasahero matag adlaw.

        Palihug tabangi mi og kuwenta: Kon kaduha ra mosakay ang mga pasahero matag adlaw (gikan ug padung sa ilang bay ug trabahoan o eskuylahan), P3.2 milyones alkanse sa mga pasahero matag adlaw; o P96 milyones matag buwan; o P672 milyones sa niaging pito ka buwan (kay Pebrero man karong tuiga kataposang giusbawan sa LTFRB ang plitehan).

                -o0o-

        Mas dako pa gyod ang alkanse sa mga pasahero sa kinatibuk-an kay gibungkig man sab sa LTFRB ang nangagi pang minimum nga plitehan. Maibanan unta og diyutay ang atong bagulbol kay nadugangan ang kita sa kabos nga mga drayber.

        Apan nahibawo tang tanan nga bisan unsa nga dugang unta nga kita sa mga drayber mapapas dayon. Kay kuhaon ra sab sa operators pinaagi sa way kinutoban nga pagsaka sa abangan (o boundary) sa mga jeep pamasahero.

                -o0o-

        Hinaot nga ang kadagkoan sa LTFRB makaamgo na sa kadako sa kadaot nga namugna sa ilang paugat nga pagbungkig sa plitehan. Hinaot nga ang ilang resolusyon sa mga petisyon sa transport groups motabang sa paghimong mas makiangayon sa relasyon sa mga pasahero ug mga drayber ug operators.

        Kay hagbay rang gipasagdan ang mga buslot sa tradisyonal nga mga sakyanang pamasahero--kagangkagang nga mga sakyanan, manlubag nga mga drayber ug tulisan nga operators. Inay pugson ang mga drayber ug operators pagpalambo sa ilang pangalagad, ang bag-o hinuong mga kumpetinsiya ang giapiki. Ug, kon tuohan ang pasangil ni Senador Antonio Trillanes, gikilkilan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.