Pagbasura sa pakauwaw
Ilegal ang kampanya sa pagpintal sa gidudahang mga pinuy-anan sa mga durugista tungod sa mosunod nga mga hinungdan:
- Kalapasan ni sa garantiya sa konstitusyon nga ang mga sinumbong sa bisan unsang krimen isipon nga inosente hangtod nga mapamatud-an nga sad-an;
- Abuso kini sa police power ug nakayatak sa tawhanong mga katungod;
- Maduhig sa kampanya ang ubang sakop sa pamilya nga way kalambigitan sa drugas; ug
- Ang kampanya gitumong lang sa mga durugista ug nilaktaw sa mga nakahimo sa ubang bangis nga krimen sama sa pagpatay, pagpanlugos ug pagpanagit.
-o0o-
Gibasura sa Court of Appeals (CA) ang kampanya sa pakauwaw nga gilusad ni kanhi Manila Mayor Alfredo Lim. Nga mahimong mao say mahitabo sa susamang kampanya nga gipasiugdahan karong bag-o ni Barangay Kapitan Ahong Chan sa Pajo, Lapu-Lapu City.
Ang 25 ka pahina nga desisyon nga gisuwat ni CA Justice Bernardo Abesamis giluwatan niadtong Enero 2000 pinasikad sa petisyon nga gipasaka niadtong 1997. Wa matuman ni Lim ang iyang saad sa pag-apelar sa desisyon atubangan sa Korte Suprema.
-o0o-
Di si Chan ang bugtong nangopya sa kampanya ni Lim. Nilusad sab sa samang kampanya niadtong ang ubang mga dakbayan ug kalungsoran sa Metro Manila. Apan nabadlong sila sa desisyon sa CA.
Nagtinguha si kanhi DILG Secretary Mike Sueno sa paglusad sa susamang kampanya sayo ning tuiga. Nadasig si Suenso sa kampanya nga gipakita niya ni Bohol Governor Edgar Chatto. Apan wa kaugpo ang kampanya ni Sueno kay naapsan sa pagtaktak ni Presidente Rodrigo Duterte niya gikan sa gabinete.
-o0o-
Sa wa pa molusad sa kampanya, aktibo si Chan sa pagpahibawo sa mga Oponganon sa iyang mga programa pagtabang sa nisurender nga mga tigbaligya ug tiggamitan og ilegal nga drugas: Gitudloan niya sila sa mga panginabuhi sama sa paghimo ug pagpamaligya og mga empanada ug mga parol sa Pasko.
Kon matinud-anon sa iyang tinguha pagtabang sa gidudahang mga durugista, nganong nakaako man si Chan pagpanlaktod sa balaod pinaagi sa pagpakauwaw nila ug sa inosente nilang mga silingan? Natugkad ba gyod niya ang gamot nga mga hinungdan sa problema sa drugas? O, sama sa ubang mapahimuslanong mga politiko, igo lang siya nga nagsakay-sakay sa panahon? [30] leo_lastimosa@abs-cbn.com
No comments:
Post a Comment