Arangkada for November 7, 2017

Leo Lastimosa has attached the following document:

Arangkada for November 7, 2017

Snapshot of the item below:

Laktod nga impeachment

        Pormal nang niawhag ang Malakanyang ni Chief Justice Maria Lourdes Sereno sa Korte Suprema sa pagluwat sa iyang katungdanan. Kini bisan wa pa ang botasyon sa House of Representatives pag-impeach ni Sereno ug pagpada sa articles of impeachment ngadto sa Senado.

        Duha ang hubad sa agresibong awhag nga giluwatan sa bag-ong natudlo nga si Presidential Spokesperson Harry Roque: Una, posibleng masaligon ang Malakanyang sa iyang numero sa House ug sa Senado; apan ikaduha, posible sab nga nagduda si Presidente Rodrigo Duterte sa kamatinud-anon sa iyang mga alyado sa Senado.

                -o0o-

        Way lalis nga ma-impeach sa mga kongresista si Sereno. Gawas nga makabungog ang mayoriya ni Presidente Duterte sa House, usa sa tulo ka bahin ra sa mga sakop sa House ang gikinahanglan sa pag-impeach sa chief justice. Sa ato pa, 99 ra sa 297 ka kongresista ang kinahanglan nga modason sa impeachment ni Sereno.

        Sabotan na lang nila ni House Speaker Pantaleon Alvarez ug kaubanan kanus-a mag-botasyon pag-impeach ni Sereno: Sa di pa o human sa pag-aprobar sa duha ka bay balaoranan sa gisugyot nga P3.767 trilyones nga budget alang sa 2018.

                -o0o-

        Samtang gihukngay na sa mga senador ang mga lagda sa impeachment trial kon maduso gyod ang articles of impeachment batok ni Sereno, kasagaran nila nipalabi nga unahon ang 2018 budget ug nga unya na sa Enero sa bag-ong tuig sugdan ang husay.

        Mas apurado ang mga kongresista. Sa wa pa matudlo sa Malakanyang, si Roque masaligon nga ma-impeach na si Sereno karong buwana. Ug makasugod na ang impeachment trial sa Senado karong Disyembre.

                -o0o-

        Mas dako nga mayoriya sa mga senador ang gikinahanglan aron pagkonbikto ni Sereno, duha sa tulo ka bahin (⅔). Samtang unom ra ang mga senador nga klarong naa sa oposisyon, may sukaranan si Presidente Duterte nga mabalaka kon tinuod bang lunod-patay ang mga senador sa administrasyon.

        Naglungutlungot pa siya hangtod karon sa resolusyon nga nagkondenar sa extrajudicial killings (EJKs) nga gipirmahan sa 16 ka senador: Kiko Pangilinan, Bam Aquino, Joel Villanueva, Risa Hontiveros, Ralph Recto, Franklin Drilon, JV Ejercito, Sonny Trillanes, Win Gatchalian, Ping Lacson, Grace Poe, Nancy Binay, Chiz Escudero, Sonny Angara, Loren Legarda ug Leila De Lima. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.