Arangkada for December 17, 2017

Leo Lastimosa has attached the following document:

Arangkada for December 17, 2017

Snapshot of the item below:

Ganti sa katugnaw

        Human sa way kinutoban nga kaalimuot, nga nisangpot sa makahasol nga pagtabisay sa singot sa katawhan sa dako nga bahin sa tuig hangtod sa unang mga semana sa Disyembre, di ka mabasol kon nihangop sa sagunson nga pag-uwan sa nangagi nga mga adlaw. Sa kataposan, nia na gyod ang katugnaw sa Pasko.

        Di hinuon hingpit ang pagsaulog. Kay ang grabe nga bunok sa uwan nisangpot sa lapad ug lawom nga baha sa Leyte ug Samar ug uban nga mga dapit nga giungotan sa bagyong Urduja. Ug kon magpadayon ang uwan hangtod sa Lunes, gikabalak-an ang lapad nga pagdahili sa nahumok na nga yuta.

                -o0o-

        Haskang dugaya nato nga paabot sa tingtugnaw. Sukad pa sa pahibawo sa PAGASA niadtong Oktubre nga hapit nga mokagiw ang init nga Habagat sa bugnaw nga Amihan. Apan nabawo ta dihang niabot na gyod ang Amihan sa niaging buwan.

        Kay ang bugnaw nga hangin gikan sa Siberia ug China didto ra kutob sa Luzon. Gibabagan sa High Pressure Area sa ngilit sa Kabisay-an mao nga wa kalahos dinhi sa ato ug sa tibuok Mindanao. Hangtod nga niabot si Urduja.

                -o0o-

        Si Urduja mismo nanagana sa pagsud sa Philippine Area of Responsibility (PAR). Wa modayon pagsud sa niagi pa unta nga Dominggo kay gibira sa sistema sa Japan. Lunes na nakasud isip Low Pressure Area (LPA) ug Martes na nahimo nga bagyo.

        Apan ang kahinay sa irog ni Urduja mao ang labing dako niya nga hulga. Nakabuylo pagyabo sa bawon niya nga lapad nga uwan sa niagi nga upat na ka adlaw. Maayo na lang kay nipaspas na og diyutay ang pagpaingon sa kasadpan samtang nagsuwat ko ini.

                -o0o-

        Mogawas si Urduja sa Leyte ug Samar ug mopaingon sa Capiz karong buntag, motabok sa Palawan ugma ug mogawas na sa PAR sa Miyerkules. Apan karon pa lang gipasidan-an na ta sa PAGASA sa mosunod nga mas kusog nga bagyo nga si Vinta.

        Nga samtang motino nga magpadayon ang gikamingawan nga katugnaw mahimo nga moigo sa Sugbo ug Kabisay-an sa bisperas o sa adlaw gyod sa Pasko. Mao nga angay nga idungan sa pagpahimus sa makapakuray nga katugnaw ang hingpit sab nga pagmatngon. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.