Arangkada for December 20, 2017

Leo Lastimosa has attached the following document:

Arangkada for December 20, 2017

Snapshot of the item below:

Pagkabanhaw ni Vinta

        Haskang paita. Kaingon nato nga makalingkawas na sa hingpit sa hulga sa bagyo nga si Vinta. Nga modayon na lang gyod og katunaw ang tapok sa mga panganod sa ibabaw sa Pacific Ocean ug di na makahasol sa bisan asa nga bahin sa Mindanao ug Kabisay-an.

        Apan sa akong pagsuwat ini, nipasidaan na sab ang Philippine Atmospheric, Geophysical and Astronomical Services Administration (PAGASA) sa pagbalik og kusog sa low pressure area (LPA) sa silangan nga bahin sa Mindanao ug mahimo na sab nga bagyo sa mosunod nga duha ka adlaw.

                -o0o-

        Sa ato pa, may kahigayonan na sab nga bagyo nga Vinta gihapon ang mosud sa Philippine Area of Responsibility (PAR) karong adlawa, Miyerkules, o ugma, Huwebes, ug mosaka sa Kabisay-an duha ka adlaw sa di pa ang Pasko.

        Kon simbako mahimo na sab nga bagyo, si Vinta way kalainan sa iyang gisundan nga si Urduja: Una nga nihulga pagsud sa PAR isip bagyo, dayon nahuyang ug nahimo nga LPA kay gibira sa daotan nga panahon sa Japan, ug nahimo na sab nga bagyo sa pagsud sa silangan nga Mindanao.

                -o0o-

        Nipasabot si Al Quiblat, ang tagduma sa PAGASA Mactan, nga nahuyang ang kanhi bagyo ngadto sa pagka LPA niadtong Lunes sa buntag tungod sa pagtidlom sa temperatura sa Pacific Ocean.

        Ang kainit man gud sa kadagatan ang usa sa makahatag og puwersa sa mga bagyo. Ang pagsulbong sa kainit sa Pacific Ocean sa pagsugod sa Nobyembre niadtong 2013 ang nakatampo sa makalilisang nga gikusgon sa hangin sa bangis nga bagyo nga Yolanda.

                -o0o-

        Pagbiya ni Urduja sa Kabisay-an niadtong Dominggo, nibalik ra sab dayon ang kaalimuot. Matod ni Quiblat wa pa gyod makalahos sa Kabisay-an ug Mindanao ang katugnaw nga hangtod karon natanggong lang gihapon sa Luzon.

        Gikan ra gyod diay to sa hangin ug uwan ni Urduja ang katugnaw nga atong nabatyagan sa niagi nga semana. Nga mahimo nga mahibalik kon mahinayon ang bagyo nga si Vinta. Di ka mabasol kon mopalabi sa kaalimuot, nga nakahasol nato sa labing dako nga bahin karong tuiga, kay sa kasamtangan nga katugnaw. Nga nagtangag og dako nga hulga batok sa mga kinabuhi ug kabtangan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.