Arangkada for August 15, 2017

Leo Lastimosa has attached the following document:

Arangkada for August 15, 2017

Snapshot of the item below:

Katakos sa paggasto

        Turno na sab sa mga tinudlo ni Presidente Rodrigo Duterte ang pagpanubag sa kalangay sa pagpatuman sa labing dagkong mga proyekto sa niaging usa ka tuig na nilang pangatungdanan. Ang presidente ug iyang mga sinaligan kusganon nga nisaway sa pamunoan ni kanhi Presidente Noynoy Aquino tungod sa kalangay sa pagpatuman sa ilang mga proyekto.

Gibanabana nga usa ka trilyon ka pesos nga balor sa mga proyekto ang wa mapatuman hangtod sa pagkapupos sa termino ni Aquino sa udtong tutok sa Hunyo 30 sa niaging tuig. Sa labing uwahing ihap sa mga senador, dul-an na sa P600 bilyones ang napasagdan nga wa maggasto sa pamunoang Duterte.

-o0o-

Usa sa gitumbok nga mga hinungdan sa kalangay sa pagpatuman sa mga proyekto sa pamunoang Aquino mao ang kamabinantayon nga di masubli ang kakurakot sa pagpatuman sa mga proyekto sa gipulihan sab niyang pamunoan ni kanhi Presidente Gloria Macapagal-Arroyo.

Apan ang kausaban nga gipatuman ni Aquino gihulagway nilang Presidente Duterte nga nasobrahan ra. Nga nasakripisyo na hinuon ang interes sa kinabag-an kay natanggong ang mga proyekto nga hagbay rang gigahinan og pundo pagtagbaw sa labing dinalian nilang mga panginahanglan.

-o0o-

Gisigehan og saway ni Presidente Duterte ang mga lagda sa subasta sa gobyerno nga kanunayng mopalabi sa kabarato kay alang niya mas mahinungdanon ang mas maayong kalidad sa mga proyekto ug mga panginahanglan sa gobyerno.

Gani, wa kaikyas ang kadagkoan sa Commission on Audit (COA) sa isog nga pasidaan ni Duterte nga pamunggotan sila tungod sa paglangay sa mga transaksiyon sa gobyerno. Gidasig sab ni Duterte ang iyang mga tinudlo sa paglapas sa mga lagda sa COA.

        -o0o-

        Apan bisan sa pangisog ni Duterte, natanggong gihapon ang mga proyekto nga nakapatuman sa pagduda sa katakos sa iyang pamunoan paggasto sa ilang gipangayo P3.7 trilyones nga nasudnong budget sa 2018. Apil sa nalangay ang pagtukod sa 47,492 ka bag-ong classrooms ug pagkuha og 53,831 ka magtutudlo ug 10,000 ka polis.

        Ang kinabag-an sa Kongreso maglumba pagpasar sa bisan unsang budget nga pangayuon sa presidente. Apan kon di makapasalig nga mahurot paggasto ang dakong budget, ma-kuwestiyonable sab ang kapuslanan sa gipangayo nilang bag-o ug dagkong buhis. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.