Thursday, August 3, 2017

Arangkada for August 5, 2017

Leo Lastimosa has attached the following document:
Arangkada for August 5, 2017
Snapshot of the item below:

Di na kurog ni Lim

        Labing menos duha ang sukaranan sa mga pagduda sa kamatinud-anon sa kaso nga kalit lang nga gipasaka batok sa gipasanginlang drug lord nga si Peter Lim:

  • Una, ang taas nga kasaysayan sa talagsaong kasuod tali nilang Lim ug sa kadagkoan sa rehiyonal ug nasudnong mga buhatan sa Criminal Investigation and Detection Group (CIDG); ug
  • Ikaduha, taga CIDG ang labing nasuhito nga ang tinuod nga pinuy-anan ni Lim mao ang Sto. Niño Village sa Banilad, Cebu City ug di ang bay sa Barangay Kasambagan nga maoy ilang gihatdan sa supina.

                -o0o-

        Sa iyang bahin, si Supt. Royina Garma, hepe sa CIDG Central Visayas, nipasabot nga, samtang wa siya kahibawo sa mga sukaranan sa kasong gipasaka sa ilang ulohang buhatan batok ni Lim, matinud-anon ang iyang imbestigasyon sa pasangil ni Presidente Rodrigo Duterte nga drug lord si Lim.

        Niangkon si Garma nga lisod ang pag-imbestigar ni Lim tungod sa daghan ug gamhanang mga koneksiyon sa negosyante. Apan nipasalig nga iyang tumanon kutob sa mahimo ang sugo sa presidente. Nga susihon ang daghang kasayuran nga nadawat ni Duterte pagbanos niya sa Malakanyang nga nagtumbok ni Lim nga dakong haligi sa sindikato sa drugas.

                -o0o-

        Gitataw ni Garma sa pakighinabi sa Arangkada sa DYAB Abante Pa, Bisaya! nga padayon siyang nisalig sa iyang mga sakop bisan sa kahigayonan nga nakaapil sila og dawat sa daghan uyamot nga mga pabor gikan ni Lim sa nangaging katuigan.

        Nakabantay si Garma nga kasagaran sa iyang mga sakop hadlok ni Lim. Nga iyang nasubay nga nanukad sa pagpagawal ni Lim nga way bisan usa nga makatandog niya. Matod ni Garma nga gipahinumdoman niya ang mga sakop sa CIDG nga way kriminal bisan unsa kahawod nga molabaw sa balaod.

                -o0o-

        Sa way pagbutyag sa kalamboan sa ilang imbestigasyon ni Lim, si Garma nihisgot sa mga ruta sa pakisusi nga ilang gisubay:

  • Ang pakiglambigit sa Bureau of Internal Revenue (BIR) aron masubay ang tanang negosyo ug katigayonan ug mga kasosyo ni Lim sa Sugbo ug ubang bahin sa Pilipinas; ug
  • Ang pagsubli sa posibleng kalambigitan ni Lim sa pagpatay sa duha niya ka bodyguards nga silang Ananias Dy ug Bernard Liu nga nihatag og testimoniya batok niya. [30] leo_lastimosa@abs-cbn.com 
Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: