Thursday, October 12, 2017

Arangkada for October 14, 2017

Leo Lastimosa has attached the following document:
Arangkada for October 14, 2017
Snapshot of the item below:

Pagpalayas sa Uropa

        Tumanon o dili sa mga embahador sa mga nasud sa Uropa ang pagpalayas ni Presidente Rodrigo Duterte nila sud lang sa 24 oras, ang atong nasud maoy mapilde:

  • Kon magpalinug-lingog lang sila pinaagi sa pagpabilin dinhi ug way himuon ang Malakanyang nga mga lakang pagpormalisar sa deklarasyon sa presidente, motumaw nga sama sa naandan pagarpar ra tong iya nga di angayng tuohan; apan
  • Kon manglayas sila gyod ang mga embahador sa European Union (EU), mas makalilisang ang mga implikasyon sa atong panginabuhi ug patigayon uban sa usa sa labing dako nga kalibotanon nga kahugpongan.

                -o0o-

        Ambot may nakapahibawo ba ni Presidente Duterte nga ang EU may 28 ka nasud: Austria, Belgium, Bulgaria, Croatia, Cyprus, Czech Republic, Denmark, Estonia, Finland, France, Germany, Greece, Hungary, Ireland, Italy, Latvia, Lithuania, Luxembourg, Malta, Netherlands, Poland, Portugal, Romania, Slovakia, Slovenia, Spain, Sweden ug United Kingdom.

        Nangonsulta ba sa iyang gabinete labi na ni Foreign Affairs Secretary Alan Peter Cayetano? Kinsa kuyog sa iyang economic managers sa Estados Unidos pagpangumbinser sa mga Amerikanhon pagbubo sa ilang puhonan sa Pilipinas dihang giluwatan ang labing uwahi niyang balikas sa EU, US, UN ug CIA?

                -o0o-

        Nahibawo ba si Presidente Duterte sa kinatibuk-an nga epekto sa iyang pagputol sa diplomatikanhon nga relasyon sa 28 ka nasud sa EU? Human sa pagpalayas sa mga embahador sa EU, angayng himuon sab ang mosunod:

  • Papaulion ang tanang sakop sa Pilipinhong diplomatic missions sa tanang nasud sa EU;
  • Tak-opan ang atong kawanangan, mga pantalan ug kadagatan sa trapiko sa mga pasahero ug kargamento gikan ug padung sa Pilipinas ug EU; ug
  • Papaulion ang minilyon ka Pilipinhon nga nagpuyo ug nagtrabaho sa EU dungan sa pagpalayas tanang molupyo sa EU dinhi.

                -o0o-

        Nakapasamot sa ka-apiki mao nga ang gihimo ni Presidente Duterte gipasikad sa sayop nga kasayuran: Nga ang EU di na mopasud sa higante nilang merkado sa kapin sa 6,000 ka produkto sa Pilipinas nga way buhis.

        Ang tinuod mao nga pipila ra ka delegado sa mga nasud sa Uropa ang nipasidaan nga silotan sa EU ang Pilipinas kon magpadayon ang extrajudicial killings. Ug nga padayon pang pagsubli ug karon pang Enero 2018 mohimo og desisyon ang EU. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: