Arangkada for October 7, 2017

Leo Lastimosa has attached the following document:

Arangkada for October 7, 2017

Snapshot of the item below:

Yano apan luho

        Apil sa labing gipakpakan sa mga dumadapig ni Presidente Rodrigo Duterte sa pagbanos niya sa Malakanyang, nga giambitan bisan sa katawhan nga wa kabotar niya sa piniliayng presidensiyal sa Mayo sa niaging tuig, mao ang iyang pag-awhag sa mga sakop sa iyang gabinete sa pagpuyo og yano nga mga kinabuhi.

        Dungan sa pasalig nga abli ang iyang pamunoan sa labing kabos sa katawhan, gimandoan ang iyang mga tinudlo sa labing tag-as nga katungdanan sa gobyerno sa pagpamalit sa labing baratuhong mga sakyanan aron sa pag-unong sa kabos nga mga motorista ug mga pasahero nga natanggong sa trapiko.

                -o0o-

        Mahimong ang determinasyon ni Presidente Duterte pagpaduol sa iyang pamunoan ngadto sa mga kabos nga maoy kinabag-an sa katawhan maoy nakaaghat niya sa pagbuyag ni Chief Justice Maria Lourdes Sereno nga gipasanginlang nagwaldas sa buhis sa katawhan.

        Bisan sa nahauna niya nga panghunaw og bisan unsang kalambigitan sa kampanya pagpalagpot ni Sereno sa katungdanan, karon nipasidaan nang presidente nga pasakaan og impeachment complaint si Sereno. Nga ang usa sa sukaranan mao ang pagpalit ni Sereno og P5 milyones nga bulletproof nga sakyanan.

                -o0o-

        Dalayegon unta ang baruganan ni Presidente Duterte kon iya pang gituman ang iyang kaugalingong sugo. Bisan sa iyang panagsa nga pasundayag sa kayano sa iyang liderato, mas abunda ang nisiwil nga mga timaan sa kakuwang niya og pagmatngon sa paggasto sa kuwarta sa katawhan.

        Pananglitan, niabot na og dul-an sa tunga sa bilyon ka pesos (P386,162,631.35) ang gasto sa iyang mga biyahe sa nagkalainlaing kanasuran sa kalibotan nga nagtangkil sa daghan niyang batabata ug turutot.

                -o0o-

        May pipila ka higayon nga mapagarbuhong gimantala sa Malakanyang ang mga hulagway ni Presidente Duterte nga niapil og linya sa mga pasahero sa Ninoy Aquino International Airport aron pagsakay og commercial flights paingon sa Davao.

        Ang wa ipakita sa Palasyo mao ang mas daghan ug mas subsob nga mga biyahe ni Presidente Duterte ginamit ang private jets ug mga ayroplano sa gobyerno sa matag semana nga pagpauli niya sa Davao. Labaw nang gitagoan pila ang gasto sa gobyerno sa iyang mga biyahe ug, kon hinuwaman man ang mga ayroplano, kinsa ang pribadong mga negosyante nga nihatag sa pabor. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.