Lisod ang pagka-turutot
Ang opisyal nga sama katabian ni Presidente Rodrigo Duterte, nga hapit kada adlaw modiskurso, wa magkinahanglan og tigpamaba. Apan tungod sa kalibogan niya nga mga sulti, may pipila gani nga di motakdo sa kamatuoran, gikinahanglan ang tigpamaba aron mopasabot unsa ang tinuod niya nga gipasabot.
Mahimo lang epektibo ang tigpamaba kon suhito siya ug hingpit nga gisaligan sa presidente. Nga gituohan sa kadaghanon nga maoy nakahimo sa pastro ug sa negosyante nga si Ernesto Abella nga presidential spokesperson. Karon nitumaw nga si Abella di diay suhito ug wa diay saligi.
-o0o-
Gawas sa nagdahunog niya nga tingog, napamatud-an nga di kamaog si Abella sa iyang trabaho. Mas daghan siya og ambot kay sa kasayuran. Bisan taga Davao siya, mahimo nga wa hatagi si Abella og higayon nga makasulti sa presidente aron pagtugkad unsa gyoy naa sa iyang hunahuna.
Ang hubad ni Abella sa labing kontrobersiyal nga mga sulti sa presidente way kalainan sa pangagpas sa ubang mga tigpaniid. Labaw pa nga taphaw, kon di man makalibog. Kasagaran gisukwahi gyod gani sa presidente o gisapawan og mas masabtan nga katin-awan.
-o0o-
Apan ang labing dako nga atraso ni Abella mao ang tono sa kinatibuk-an niya nga panagang: Di angay nga tuohan dayon ang bisan unsa nga isulti ni Presidente Duterte; mas makaayo sa tanang hingtungdan kon huwaton una ang katin-awan ni Abella.
Ang resulta, nga klarong wa tuyoa ni Abella, mao ang pagtumaw sa di maayo nga hulagway: Ang presidente usahay magpataka diay og sulti, o may mga higayon nga wa kahibawo unsay iyang gipanulti, ug si Abella ang makapasabot sa tinuod niyang mensahe.
-o0o-
Gipulihan si Abella ni Kongresista Harry Roque, kinsa motambong sa labing una nga tigom sa gabinete liwas sa Kalagkalag. Abogado si Roque ug mas suhito sa media. Sama ba kasuhito sa panghunahuna ug gisaligan ba sa presidente?
Nitug-an si Presidente Duterte nga ganahan siya ni Roque kay managsama sila nga bastos og baba. Paabuton nato unsaon pagpasabot ni Roque ang sunod nga balikas ug bugalbugal sa kababayen-an sa presidente. Paabuton sab nato unsaon paghubad ni Roque ang sunod nga hulga sa presidente pagpangyatak sa tawhanong katungod nga gipatuo ni Roque nga iyang gipanalipdan. [30] leo_lastimosa@abs-cbn.com
No comments:
Post a Comment