Tagulilong nga riple
May kasayuran nga gibandilyo si Presidente Rodrigo Duterte sa iyang mga diskurso nga lisod tuohan sa katawhan. Apan kanunay sila nga gipasaligan sa iyang mga tigpamaba nga ang presidente nakakuha sa labing tinagoan nga kasayuran gikan sa nagkalainlain nga mga ahensiya sa sud ug sa gawas sa nasud.
May kasayuran siya nga ipaagi lang og mga pasumbingay nga way detalye. Gibalikbalik niya pagpahibawo nga dul-an na sa gatos ka opisyal ang iyang gitaktak tungod sa pangurakot. Pipila ra ang nanganlan. Way nakaseguro sakto ba o gipaburot lang ang iyang pangangkon.
-o0o-
Sa iyang paig-atubang sa kahugpongan sa Overseas Filipino Workers (OFWs) sa niaging semana, yano nga gipahibawo sa presidente nga may gitaktak na sab siyang opisyal. Apan di niya nganlan tungod sa kabalaka nga mauwawan ang pamilya.
Sa wa pa mahinayak ang pagduda nga hinimu-himo lang og istorya, mga tinubdan sa Malakanyang nidason nga gitaktak gyod niya ang luyuluyong kalihim sa Department of Budget and Management (DBM). Apan di kanganlan kay iyang tinudlo ug suod kauban sa law office sa iyang labing sinaligan nga si Executive Secretary Salvador Medialdea.
-o0o-
May kasayuran si Presidente Duterte karong bag-o nga way ganahan nga mohatag og detalye: Ang iyang pangangkon nga riple gikan sa China ang nakaigo ug nakapatay sa bangis nga mga lider sa Maute Group sa Marawi nga silang Isnilon Hapilon ug Omar Maute.
Si Defense Secretary Delfin Lorenzana, inay nga modason sa pangangkon sa presidente, nipasalamat sa Estados Unidos tungod sa pagpagamit sa ilang drones, spy planes ug ubang kahimanan sa pagpaniid ug abundang kasayuran sa ISIS sa Middle East.
-o0o-
Mas abunda ang detalye sa 8th Scout Ranger Company sa Philippine Army sa pagkamatay nilang Hapilon ug Maute niadtong Lunes sa kadlawon:
- Sunudsunod nga naigo silang Hapilon (sa dughan) ug Maute (sa ulo) dihang nanggawas sa gitagoan nga building aron pag-ikyas paingon sa Lake Lanao; ug
- Nakaigo sa duha ang remote-controlled nga 50-caliber belt-fed machine guns ibabaw sa armoured personnel carriers (APCs) sa 1st Cavalry Squadron nga may thermal camera maong bisan ngitngit nakakita ang mga sundawo sa mga terorista ug mga bihag.
Kon wa pa kang kabantay, wa nilay naghisgot og riple sa China. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment