Arangkada for January 12, 2018

Leo Lastimosa has attached the following document:

Arangkada for January 12, 2018

Snapshot of the item below:

Nakamenos sa mga kabos

        Atubangan sa panagana sa iyang tinudlo nga si Budget Secretary Benjamin Diokno sa katakos sa nasudnon nga panudlanan sa paglahutay pagbayad sa pagdoble sa suholan sa mga magtutudlo, si Presidente Rodrigo Duterte nimando nga isukip ang dako nga gasto sa ikaduha nga hugna sa Tax Reform for Acceleration and Inclusion (TRAIN) nga gitakda nga isumiter sa Malakanyang ngadto sa Kongreso karong tuiga.

        Gikuyawan ko nga mao ni iyang nahunahunaan nga paagi aron nga di makapangisog ang kinabag-an sa katawhan sa pagsupak sa bag-o nga mga buhis nga ila nga ipahamtang.

                -o0o-

        Kinsa man tuod ang mangahas sa pagsupak sa pagdoble sa suholan sa giila nga mga bayani nga maoy nag-umol sa kinaadman sa ato nga mga tinun-an? Kinsa man ang makaako sa pagbaraw sa pagdugang sa kita sa mga nagmatuto sa gihulagway ni Dr. Jose Rizal nga ugma sa nasud?

        Gipilde niya ang pagsupak ni Diokno sa pagdoble sa suholan sa bag-o nga mga polis ug sundawo pinaagi sa paghulga sa pag-resign. Karon gidis-armahan niyang daan si Diokno sa pasumbingay nga ang pagsupak sa iyang plano mao ang pagbudhi sa sakripisyo sa mga magtutudlo.

                -o0o-

        Igo lang hinuon nga gisunod ni Presidente Duterte ang gihimo nila ni Diokno, Finance Secretary Carlos Dominguez ug uban nga economic managers nga pagtandi sa pagsupak sa TRAIN ngadto sa pagpadayon sa kakabos, malnutrisyon ug kahuot sa trapiko.

        Atubangan sa nag-ung-ong nga makalilisang nga pagsaka sa presyo sa lana, bayranan sa kuryente, presyo sa mga palaliton ug plitehan sa mga sakyanan nga pamasahero, nabantang ang pait nga kamatuoran: Mga kabos ang labing maalaot sa bag-o nga mga buhis.

                -o0o-

        Mao nga nisimang na sab ang istorya nila ni Diokno ug kaubanan: Di kapugngan ang dugang nga palas-unon tungod sa TRAIN; apan temporaryo lang ang sakripisyo. Kay mobalik ra sa pag-us-os ang mga bayranan, presyo ug plitehan kon matukod na ang dugang kadalanan ug mahapsay na ang trapiko.

        Nakamenos lang gyod sila nato. Nagsalig sa talagsaon nga popularidad ni Presidente Duterte aron pagduso sa bisan unsa nila nga mahunahunaan. Bahala na kon mosamot ka-ut-ot ang kinabag-an nga mga kabos nga ilang gituohan nga way katakos sa paghunahuna unsa ang makaayo nila. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.