Kinsay modupa nila?
Apil sa labing makaluluoy nga mga biktima sa inhustisya ang mga drayber sa mga sakyanan nga pamasahero. Daghan uyamot ang mga buhatan sa gobyerno nga nanggukod nila sa bisan unsa nga kalapasan sa mga lagda sa trapiko nga ila nga nahimo. Apan way bisan usa nga nagtagad sa pagpanalipod sa ilang mga interes.
Ang Land Transportation Office (LTO) andam nga mosuspenso o mokanselar gyod sa ila nga mga lisensiya. Ang local government units (LGUs) determinado sab nga momulta nila. Apan way nanalipod nila gikan sa panaugdaog nga ila nga nahiagoman.
-o0o-
Kon may reklamo ang mga pasahero batok sa mga drayber sa PUJ, taxi ug bus, kuninitan dayon sila sa mga sakop sa media, apil na ang netizens nga nagtungkawo sa social media, ug dali ra kaayo nga imbestigahon ug multahan ug suspensuhon sa LTO.
Apan kon ang mga drayber ang mangreklamo way buhatan sa gobyerno nga maminaw dayon nila. Madapit lang nila ang pagtagad sa tradisyonal nga media ug social media kon grabe na ang pangabuso nga mahiagoman gikan sa mga polis, dagko nga mga politiko, o adunahan nga mga negosyante.
-o0o-
Kon reklamohan ang mga drayber nga wa makahatag og diskuwento sa plitehan sa ila nga mga pasahero nga senior citizens, o persons with disabilities, o mga tinun-an, tungluhon dayon sila sa tanan nga nagpakabana nga mga molupyo ug taralon dayon sa LTO.
Apan way naminaw sa ila nga reklamo nga, lahi sa mga negosyante nga makabawi sa diskuwento sa ila nga mga baligya ug serbisyo pinaagi sa tax rebates sa Bureau of Internal Revenue (BIR), wa silay kapasahan ug busa maibanan intawon ang gamay nila nga kinitaan.
-o0o-
Hingpit ang lagda sa mga buhatan sa gobyerno nga kinahanglan nga mosubay ug motiwas sa ilang mga ruta, di mangisnab ni magpasobra og mga pasahero, magsul-ob og uniporme ug magbutang og tawas sa ilang mga ilok.
Apan way bisan usa ka lagda nga nanalipod nila gikan sa tag-as nga boundaries o abangan nga gipahamtang sa ila nga operators. Sama nga way buhatan sa gobyerno nga nangisog pagpatuman sa kadaghan na subli-sublia nga kamandoan sa Korte Suprema nga angay sila hatagan sa mga benepisyo isip mga kawani. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment