Arangkada for January 7, 2018

Leo Lastimosa has attached the following document:

Arangkada for January 7, 2018

Snapshot of the item below:

Pagbisto sa tinagoan

        Nakabasa na ko sa libro nga nakapatay-og sa pamunoan ni US President Donald Trump, "Fire and Fury," nga sinuwat sa kontrobersiyal nga peryodista nga si Michael Wolff. Kinsa nibutyag sa kayagaw, ka way tumong, tinampokay sa bukobuko ug ka-iresponsable sa hapit na mag-usa ka tuig nga pamunoan.

        Wa mabantog si Wolff sa nangagi niya nga mga libro ug mga lindog nga tukma og kasayuran. Gipasanginlan siya nga nagtumo-tumo og mga panghitabo aron lang sa pagpaukyab sa publiko. Apan gihulagway sab nga mao ang labing takos nga makabisto sa nangalisbo nga tinagoan ni Trump.

                -o0o-

        Nipasabot si Wolff nga gitugotan siya ni Trump nga maniid sa una nga 100 ka gatos sa iyang pamunoan. Mao nga nakasaksi siya sa aktuwal nga mga panghitabo sa White House ug nakahinabi sa mga opisyal nga labing sinaligan ni Trump.

        Si Steve Bannon, ang gitaktak nga chief strategist ni Trump, ang labing abunda nga tinubdan sa iyang kasayuran. Ang pagsuway ni Trump pagpugong sa libro nakapasayo sa pagawas ini gahapon inay nga unya pa sa Martes. Ug nakadapit sa mas daghan nga magbabasa.

                -o0o-

        Duha ka pasangil sa libro batok ni Trump ang ikatandi sa pamunoan ni Presidente Rodrigo Duterte:

• Samtang nipasidaan si Trump sa labing radikal nga kausaban sa Estados Unidos, wa siya kahibawo unsaon ug way tawo nga katahasan sa pagpatuman sa iya nga mga saad; ug
• Nagpataka lang siya og tudlo og mga opisyal tungod lang kay iya nga gika-negosyo o nailhan sa way pagsusi sa ilang katakos ug kahaom sa katungdanan.

                -o0o-

        Kinsa man ang Wolff sa pamunoan ni Duterte? May sipsip ba nga mga sakop ba sa media nga gihatagan niya sa sama nga pribilehiyo sa pagsud-gawas sa Malakanyang ug pagsunod-sunod sa iya nga kalihokan ug mahimo nga lud-on pag-ayo ug mosuka sab sa iyang nahibaw-an?

        O may Bannon sa iyang pamunoan nga motampok sab sa iyang bukobuko ug mobisto sa nangalisbo nila nga mga tinagoan? Sama ni Trump, daghan na uyamot nga mga tinudlo si Duterte nga iyang gitaktak tungod sa nagkalainlain nga mga bulilyaso. Apan, sama sa gidangatan ni Trump, mahimo nga di tanan nila mopili sa pagpakahilom sa ila nga gidangatan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.