Arangkada for January 4, 2018

Leo Lastimosa has attached the following document:

Arangkada for January 4, 2018

Snapshot of the item below:

Paghikaw sa tabang

        Nagkinahanglan og tabang ang pamilya ni Richie John Pimentel, usa sa duha nga namatay sa Malabuyoc sa habagatang Sugbo tungod sa bagyo nga Agaton. Apan mahimo nga mahikawan sila sa hinabang sa nasudnon nga gobyerno nga P10,000 matag usa sa nangamatay sa katalagman.

        Kay kon paundayonan sa Office of Civil Defense (OCD) ang ila nga naandan, di nila isipon si Pimentel nga biktima ni Agaton. Kay wa maigo sa baha ni dahili sa yuta. Bahala na kon ang pagkadakin-as sa ngiob nila nga hagdanan naggumikan sa uwan ug brownout tungod ni Agaton.

                -o0o-

        Ambot kon ang lagda ba gyod ang kinahanglan nga usbon o ang hiktin lang nga panglantaw sa taga OCD ang angay nga palapdan. Apan angay nga hatagan na og kinutoban ang binuang nga tradisyon sa OCD nga, kay mao man ang tagduma, nanakod sab sa National Disaster Risk Reduction and Management Council (NDRRMC):

• Maningkamot sila nga maibanan ang gidaghanon sa nangamatay aron makapangangkon nga mas takos sa paglikay sa katalagman; ug
• Kon gamay ra ang angkunon nga nangamatay mas gamay ra sab ang gasto sa financial assistance.

                -o0o-

        Mas dako nga eskandalo ang gibutyag sa Commission on Audit (COA), nga utro nga kuti-kutihan, nga wa maggasto ang dakong bahin sa pundo sa OCD ug NDRRMC ug nahikawan ang mga biktima sa katalagman tungod sa di makiangayon nga mga lagda.

        Makauuwaw nga burukrasya ang nagtukmod sa mga biktima sa bagyo nga Yolanda pagtabok sa San Juanico Bridge paingon sa Samar, kay naggusbat man ang Tacloban, aron makakuha sa ilang birth certificates ug death certificates sa ilang minatay una nakuha ang nalangay na pag-ayo nga hinabang.

                -o0o-

        Maayo na lang nga wa mosunod sa OCD ug NDRRMC ang Kapitolyo sa Sugbo: Gihatagan og hinabang ni Gobernador Junjun Davide ang mga tagtungod ni Pimentel ug uban nga mga biktima sa way pagkuti-kuti direkta ba nga naigo ni Agaton o natakilpo lang sa dahili o gibahaan kay wa makapanlimpiyo sa kanal.

        Angay nga pamalandongan sa OCD ug NDRRMC ang pagtulon-an ni Arsobispo Teofilo Camomot kansang patayng lawas gibalhin gahapon sa museum nga gipasidungog niya: "Mas maayo nga masayop sa pagtabang kay sa masayop sa di pagtabang." [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.