Arangkada for January 17, 2018

Leo Lastimosa has attached the following document:

Arangkada for January 17, 2018

Snapshot of the item below:

Pagkutikuti o pagpanglutos?

        Sa iyang pagpanghimakak og bisan unsa nga kalambigitan sa pagpasera sa Securities and Exchange Commission (SEC) sa Rappler, ang online nga pamantalaan nga gipasanginlan nga nagsige og panaway sa iyang pamunoan, angay nga pahinumdoman si Presidente Rodrigo Duterte nga siya ang una nga namasangil nga mga Amerikanhon ang tinuod nga tag-iya sa Rappler.

        Sa ikaduha niya nga State of the Nation Address (SONA) niadtong Hulyo 24, 2017, gipasanginlan niya ang Rappler ug ABS-CBN nga nakalapas sa pagdili sa 1987 Constitution sa mga langyaw sa pagpanag-iya sa mga kompaniya sa media sa Pilipinas.

                -o0o-

        Kon basahon ang kinatibuk-an nga desisyon sa SEC sa pagkanselar sa rehistrasyon sa Rappler, imong masihag kinsa ang posible nga nakahunghong ni Duterte sa panginahanglan sa pagsusi sa tinuod nga pagpanag-iya sa Rappler ug uban nga kompaniya sa media.

        Pito ka buwan sa wa pa ang SONA, gibutyag sa SEC nga nisuwat nila si Solicitor General Jose Calida pag-awhag nga imbestigahon ang posible nga kalapasan sa Rappler sa sugo sa konstitusyon nga kinahanglan nga 100% nga Pilipinhon ang pagpanag-iya sa mga kompaniya sa media sa Pilipinas.

                -o0o-

        Naabtan og kapin sa tuig ang pakisusi sa kadagkoan sa SEC. Kinsa niinsistir nga gitahan sa Rappler ang pagpanag-iya ngadto sa Omidyar Network ni Pierre Omidyar nga maoy nagsugod sa eBay, ang kalibotanon nga e-commerce corporation sa California.

        May nakit-an sila nga probisyon sa Philippine Depositary Receipts (PDRs) sa Omidyar Network nga nagmando sa Rappler sa pagpananghid una sa Omidyar Network sa di pa mohimo og bisan unsa nga kausaban sa mga lagda sa kompaniya.

                -o0o-

        Magpadayon ang operasyon sa Rappler samtang isang-at sa ilang mga abogado ang kontrobersiya ngadto sa Court of Appeals (CA) uban sa usa sa labing lig-on nila nga mga panagang: Ang PDRs nakahimo sa Omidyar Network nga "investor" di tag-iya sa Rappler; ug ang gitumbok nga probisyon giaprobahan sa SEC atol sa rehistrasyon sa Rappler niadtong 2012, o unom ka tuig na ang nilabay.

        Kutikutihan ba lang nga mga abogado sila si Presidente Duterte ug Calida? O kabahin lang ni sa determinado nga pagmaniobra sa nagkalainlain nga buhatan sa gobyerno aron paglutos sa mga kompaniya sa media nga wa moluhod nila? [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.