Arangkada for July 12, 2017

Leo Lastimosa has attached the following document:

Arangkada for July 12, 2017

Snapshot of the item below:

Kapon sa Phivolcs Mactan

        Pila ka adlaw sa wa pang kusog nga linog nga nitay-og sa Leyte, Sugbo ug laing unom ka lalawigan sa Kabisay-an niadtong Huwebes, nilarga ang usa ka kawani sa Philippine Institute of Volcanology and Seismology (Phivolcs) sa Mactan.

        Kay duha ra may kawani sa Phivolcs Mactan sud na ron sa pila ka katuigan, usa na lay nagtikaw-tikaw sa lokal nilang buhatan ug nagkapuliki og panubag sa nagbaha nga mga pangutana mahitungod sa linog ug sa gatosan na ka aftershocks nga ang labing kusog nitay-og sa Kabisay-an niadtong Lunes sa buntag.

                -o0o-

        Ang nilarga alang sa 15 ka adlaw nga pagbansay-bansay sa ulohang buhatan sa Phivolcs mao ang seismic observer nga si Robinson Jorgio. Mahibalik siya sa Sugbo karon pang Hulyo 19, Miyerkules sunod semana. Kanus-a mobanos sab paglarga alang sa samang bansay-bansay sa kaulohan ang bugtong nahibilin sa Phivolcs Mactan nga si Science Research Specialist Rolando Montañez.

        Wa siloti ang duha. Naigo lang sa taphaw nga burukrasya. Apan ang tinuod nga mga biktima mao ang mga magbubuhis nga nahikawan sa labing batakan nga mga pangalagad sa Phivolcs panahon sa katalagman.

                -o0o-

        Tungod sa ulhos-ulhos nga bansay-bansay nilang Jorgio ug Montañez karong buwana, walo ka oras rang abli ang Phivolcs Mactan gikan sa alas-8 sa buntag hangtod sa alas-5 sa hapon.

        Kon simbako may laing kusog nga linog nga motay-og dinhi sa ato sa tungang gabii o bisan sa sayong buntag, bagting sa telepono ray madunggan sa mga manawag aron magpakisayod sa Phivolcs. Kay di man mahimong molabaw pa silang Jorgio ug Montañez sa burukrasya nga nigapos nila.

                -o0o-

        Way timaan nga nag-apura pagsulbad sa problema si Phivolcs Director Renato Solidum Jr. Kinsa wa magtagad paghapit sa Phivolcs Mactan sa iyang pagduaw sa Ormoc City niadtong Lunes. Siya untay labing suhito sa problema kay maoy nagduma sa Phivolcs sukad pa niadtong 2003.

        Inay dugangan ang mga kawani, giibanan ni Solidum ang kapuslanan sa Phivolcs Mactan: Ang lima ka intensity meters sa Sugbo direktang mohatag og kasayuran sa gikusgon sa linog ngadto sa ulohang buhatan ug ang text messages sa publiko sa gikusgon sa tay-og nga ilang mabatyagan mabasahan lang sa mga kawani sa ulohang buhatan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.