Arangkada for July 5, 2017

Leo Lastimosa has attached the following document:

Arangkada for July 5, 2017

Snapshot of the item below:

Paburot sa buwa ni Dino

        Sa iyang pag-awhag nga ibasura ang Bus Rapid Transit (BRT) project sa Dakbayan sa Sugbo, sama rang gipasanginlan ni Presidential Assistant Michael Dino ang mga sakop sa gabinete ni Presidente Rodrigo Duterte nga dakong sayop sa ilang pag-aprobar sa higanteng proyekto.

        Mahimong ang tuyo ni Dino mao ra ang pagpakauwaw ni Cebu City Mayor Tomas Osmeña, pakapin na lang ang posibleng pagsabotahe sa P10.6 bilyones nga proyekto nga dugay nang gimatuto sa higpit niyang kaatbang, apan naduhig sa lahap niyang pagawal ang mga opisyal nga labing gisaligan sa presidente.

                -o0o-

        Labing dakong alas ni Dino mao ang pagpatuo nga siya ang representante ni Duterte sa Sugbo ug Kabisay-an. Mao nga bisan wa siyay klarong gahom, way mangahas pagbalibad niya: Kon mosakay og chopper sa militar; o kon magpa-escort og SWAT; o kon magpatapok og mga negosyante isip props sa iyang press conferences.

        Mao nga way molalis kon mopasalig nga isumbong sa presidente ang mga problema sa baha, basura ug trapiko ug kon manghudlat pagkanselar sa mga proyekto sama sa BRT. Gawas lang kon ang mga nagtugot sa mga proyekto mas hawod kay niya.

                -o0o-

        Labing sipa nga sagpa ni Dino wa maggikan ni Osmena kon dili sa hilumon nga pangu sa BRT Project Implementation Unit nga si Atty. Raffy Yap kinsa nipasabot nganong lisod nang makanselar ang proyekto:

• Kabahin ni sa Build Build Build portfolio sa Dutertenomics ug sa usa ka international agreement; ug
• Gawas nga gidasonan, giusbawan pa gyod sa Technical Board sa NEDA-Investment Coordination Committee (ICC) ang budget sa unang hugna sa BRT gikan sa  P10.6 bilyones ngadto sa P16.9 bilyones.

                -o0o-

        Magduha-duha tingali si Dino pagpangangkon nga makumbinser niya si Duterte pagbasura sa BRT kon mahibawo nga lisod kapasanginlan nga nagpataka ang pipila sa sakop sa NEDA-ICC: Finance Secretary Sonny Dominguez, NEDA Director General Ernesto Pernia, Budget Secretary Benjamin Diokno ug Agriculture Secretary Manny Piñol.

        Ug kon mangutana si Dino kinsay nisubli sa BRT ug niduso ini ngadto sa NEDA-ICC, ato lang siyang taguon sa ngan nga Transportation Secretary Arthur Tugade. Nga labaw pang di matulisok ni Dino. Kay classmate silang Tugade ug Duterte sa San Beda College of Law. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.