Laktod nga sulbad
Kon magpaabot ang mga sakop sa Cebu City Council sa baruganan sa Department of Interior and Local Government (DILG) unsaon pag-ihap ang ilang mayoriya, mahimong maabtan sila og pila ka buwan. Kay wa mabantog ang DILG sa kapaspas nga mohimo og mga lakang nga naglambigit sa local government units nga layo ra sa luwag sa Malakanyang.
Kon mangita ka og ebidensiya sa kalangayan sa DILG, ayaw pagtan-aw sa layo. Di layo gikan sa Cebu City Hall ang Barangay Ermita. Nga human sa lima ka buwan caretaker ray nagtikaw-tikaw kay wa pay natudlo nga puli sa nasuspensong kapitan ug mga konsehal.
-o0o-
Ang bisan unsang legal opinion nga luwatan sa DILG, ma-pabor man sa Bando Osmeña Pundok Kauswagan (BOPK) nga way apil sa ihap si Bise Mayor Edgar Labella o sa Team Rama nga apil si Labella, wa say garantiya nga tahuron sa mga konsehal.
Dihang gikuwestiyon sa DILG ang legalidad sa pagpamaligya ni kanhi Mayor Mike Rama sa 45.2 ka ektaryang luna sa South Road Properties (SRP) ngadto sa higanteng mga kompaniya, niinsistir silang Rama ug iyang mga alyadong konsehal sa pagpadayon sa transaksiyon.
-o0o-
Si Atty. Thaddeus Bentulan nga nisubay sa nagkasungi nga mga hukom sa Korte Suprema nga nasentro sa kontrobersiya sa City Council nakapaniid nga si Associate Justice Mariano del Castillo maoy nisuwat sa dissenting opinion sa La Carlota case sa 2012 nga giwarawara sa Team Rama ug maoy nisuwat sa majority decision sa Javier case sa 2016 nga giwarawara sa BOPK.
Matod ni Bentulan ang nag-usab-usab nga mga desisyon sa labawng hukmanan sa niaging duha ka dekada nakamugna og lapad uyamot nga kalibog ug kaguliyang.
-o0o-
May mas laktod ug mas kasaligan nga kapilian ang BOPK sa pagpahamtang sa ilang bag-ong mayoriya sa City Council: Pagkumbinser og laing sakop sa Team Rama sa pagbalitok.
Kasaligan namong tinubdan nitug-an nga may duha o tulo ka konsehal nga niadto rang nipadayag sa ilang tinguha pagtalikod ni Rama. Gipasaligan na nilang mga haligi sa BOPK apan niawhag nga nga makigsulti una sila ni Mayor Osmeña. Di ganahan si Osmeña nga makigsulti nila. Hubad: Di ganahan si Osmeña nga mahigot sa ilang mga kundisyon. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment