Arangkada for July 6, 2017

Leo Lastimosa has attached the following document:

Arangkada for July 6, 2017

Snapshot of the item below:

Pangiyugpos sa Kapitolyo

        Sa niaging buwan pa nga niabot ang bakuna batok sa dengue sa Sugbo. Apan wa mag-apura ang Kapitolyo sa pagsugod na og pamakuna sa mga bata nga nagpangedaron og gikan sa 9 ngadto sa 14 sa tanang kalungsoran ug mga dakbayan sa Sugbo.

        Unang nakasugod sa pagpamakuna ang barangay health centers sa Lapu-Lapu City niadtong Hunyo 9. Nisunod pagpamakuna ang health centers sa kabarangayan sa Mandaue City niadtong Hunyo 10. Karong semanaha nagsugod og pamakuna ang barangay health centers sa Cebu City. Apan nangiyugpos pa ang Cebu Provincial Health Office.

                -o0o-

        Si Dr. Rene Catan, ang provincial health officer sa Sugbo, nipasabot nganong nagdumili pa sila sa paggamit sa 400,000 ka libreng bakuna batok sa dengue gikan sa Department of Health (DOH):

• Wa pa siya makumbinser sa ka-epektibo ug kaluwas sa bag-o pang namugna nga bakuna;
• Sa ilang rekord sa Kapitolyo, mas daghang biktima sa dengue nga mga bata nga nagpangedaron og 8 paubos; ug
• Napakyas ang DOH pagpasabot sa buhatan ni Catan nganong gibalhin ang pagpamakuna batok sa dengue gikan sa public schools ngadto sa barangay health centers.

                -o0o-

        Diin mang langoba nagpuyo si Catan nga wa kahibawo nga ang bakuna giparobahan nang luwas ug epektibo sa World Health Organization (WHO)? Nga, simbako nataligam-an ni Catan, mas takos ug makinaadmanon niya sa pagsusi sa labing tukmang paagi pagbatok sa mga epidemiya sama sa dengue.

        Tingali nakadungog si Catan sa pagkuwestiyon sa mga senador sa bakuna. Nahadlok hinuon kong wa siyang kahibawo nga nakumbinser silang Health Secretary Paulyn Ubial sa kadinalian sa panginahanglan sa pagpamakuna tungod sa kadaghan sa mga kaso sa dengue sa Pilipinas apil na sa Sugbo.

                -o0o-

        Wa unta maapil ang Sugbo sa orihinal nga pilot areas sa libreng pamakuna batok sa dengue. Tungod sa kamahal sa bakuna, giuna ang Metro Manila, Calabarzon ug Central Luzon. Karong tuiga, giapil ang Central Visayas kay maoy ikaupat nga labing daghan og kaso.

        Apan Sugbo ray gihatagan sa DOH sa libreng bakuna. Busa kon padayong maglangay-langay si Catan, segurong hangpon sa Bohol ug Siquijor ang libreng mga bakuna. Simbako maigo sa dengue ang imong pamilya, nahibawo na ka kinsay tulisukon. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.